全實景系列《香檳大厦 1:55 am 行人止步》重製版 (已完結): 第二十二章：【6387 5551】
3:50 - 尖沙咀警署 2/F報案室
就快凌晨四點，陳盈盈獨自一個人坐喺位上面打喊露。報案室內，除咗佢之外，就無其他人。
警署嘅報案室一般都分開三更，早更由上午八時到下午四時，夜更由下午四時到凌晨十二時，最後一更叫「夜尾」，由凌晨十二點到早上八點，每更都會由一個小隊輪流當值，雖然喺警署裡面通常都唔會有乜嘢突發事情發生，而且又有閉路電視，所以守夜尾係相對地清閒，但陳盈盈係隊入面最新嗰個，其他師兄一係就行咇，一係就走咗入去後面間房坐，而樓面嘅職責就次次都有佢份。
15分鐘之前，有個駐守第二區嘅休班師兄，扶住一個全身濕晒，而且暈咗嘅女仔走嚟報案室搵幫手，ADO(助理值日官) - 孫麗，即刻上前處理。
「一身酒氣。」孫麗對住陳盈盈苦笑了一下。
飲醉酒嘅人從來都係最難處理嘅人，一係醉到胡言亂語，一係醉到不省人事，乜嘢口供都錄唔到，仲要有隨時畀人嘔到一身都係嘅準備。
「不如等我嚟啦﹗」陳盈盈自告奮勇提出去幫孫麗接手處理，卻被孫麗截住：「唔駛啦，你上次先做完一個，今次到我嚟啦……你幫我攞疊A4紙過嚟丫。」說著，孫麗從師兄手上接過嗰個女仔，一齊扶住入去內堂。
陳盈盈無再爭住處理，攞咗疊A4紙後，便走入去內堂嘅長櫈度交畀孫麗，此刻孫麗同師兄慢慢將個女仔橫放喺張長櫈度。陳盈盈見到嗰個師兄件風褸除咗濕晒之外，仲有幾灘米黃色嘅污跡，好明顯就係嘔吐物。
「咦，原來"劏"咗喇？咁都無咁驚。」陳盈盈笑住咁去攞啲濕紙巾畀師兄抹。與此同時，孫麗都向師兄詢問情況。一問之下，先知道原來個女仔係師兄喺警署門口個巴士站執返嚟。
呢宗係一單懷疑非禮案，就正正發生喺出面嘅柏麗大道個巴士站，個女仔睇上去頂多只有16歲，雨水之下佢嘅濃妝艷抹溶解咗唔少，飲醉酒瞓咗喺巴士站度，咁啱師兄落更經過呢頭，畀佢見到有一個大約四十幾歲嘅阿叔係咁對住個女仔上下其手，師兄上前問下發生乜嘢事，但個阿叔卻立即雞咁腳冒住大雨走咗去，師兄大約都估到個阿叔似係非禮緊個女仔，但人都走咗，佢又唔可以掉低個女仔去追個疑犯，就索性接咗個女仔入嚟警署。剛好陳盈盈佢地喺度，就交畀佢地處理。
「阿盈，你同師兄出返去坐下先。我處理埋啲嘢就同師兄錄份口供。」孫麗用疊A4紙墊起個女仔頭後面，個女仔隨身嘅小手袋跌咗喺地上，裡面嘅嘢散晒出嚟。
「如果再遲多兩步，怕且個女仔都畀人執咗上房都似。」師兄邊用濕紙巾抹著自己件風褸，一邊同陳盈盈行返出去報案室：「宜家啲o靚妹又係嘅，學乜人飲酒，明知醉咗就會有危險㗎啦，醉喺條街度，畀人溶咗都唔知乜嘢事﹗」
「好彩有師兄你喺度，唔係就多單老強㗎啦﹗」陳盈盈口裡說著，心中卻對師兄呢一番話感到不是味兒。
雖然後生女入世未深，危機意識唔高，但好多時呢一類非禮強姦案，普遍人都會認為係個女性唔啱，因為佢無好好保護自己，所以就算係畀人搞都係自己攞嚟嘅。陳盈盈都係女仔，又係一個警察，雖然佢對於呢啲風化案件接觸得多，但並無好似啲人咁諗，喺佢嘅世界，黑就係黑，白就係白，犯咗法侵犯咗人嘅人就係疑犯。佢覺得啲人將自己嘅犯罪意圖反過嚟講成受引誘之下犯罪，簡直係侮辱咗執法者嘅智慧，但偏偏有部份公眾人士，甚至係前局長都有呢種邏輯謬誤，實在係令人不敢恭維。
呢一類人，偏偏又要清一色係男人，包括眼前呢位官仔骨骨嘅師兄。
不過，呢啲咁唔公平嘅觀念，並唔係一時三刻可以改變，有時佢都覺得真係慳返啖氣好過。
「乜說話丫，都係份內事啫。」師兄失禮地應著：「係呢，你地幾點落更呀？」
「八點先交更呀，仲有四個鐘。」陳盈盈回道，坐返去自己個坐上面，寫緊自己原本跟開嘅報告。
「咁……咁你落更之後，有乜嘢做呀？」師兄繼續問著陳盈盈。
「返屋企。」陳盈盈專心致志咁望住部電腦，只用簡單三個字回應住師兄。
「有無興趣一齊去食個早晨全餐先返屋企？」師兄大住膽子咁問陳盈盈。
「唔好啦師兄，今日好攰，我想早啲返去休息。」陳盈盈嘅視線仍然停留喺電腦上，但隻手就喺Backspace個掣上面按著。
師兄欲言又止，似乎仲想撩陳盈盈傾計，但見陳盈盈回得單調，又唔好意思再問落去。
與此同時，孫麗走出嚟報案室，叫了一聲師兄：「師兄，個o靚妹醒咗少少呀，你方便過一過嚟錄埋份口供嘛？」
「OK，我宜家過嚟﹗」師兄口裡回答，但眼裡仍然望住陳盈盈，而陳盈盈卻依舊望住部電腦，師兄最終都企起身，繞過陳盈盈身邊走入去內堂。
師兄一走，陳盈盈立時鬆了一口氣。
佢唔鍾意呢一種人。
※※※※※※※※※※※※※※※※※※※※※※※※※※※※※※※※※※※※
就快凌晨四點，報案室內除了陳盈盈一個人外，任何人也沒有，佢打咗個喊露，伸咗個懶腰。
「沖杯咖啡飲下先﹗」陳盈盈拎起佢個杯，正打算起身走去水機嗰邊嘅時候，報案室內響起了一個聲音。
「嘟嘟﹗嘟嘟﹗」清脆而又響亮嘅訊息通知聲響徹了整個報案室，幾乎把陳盈盈嚇得跳起身。
佢肯定唔係自己手機發出嘅聲音，佢手機長期都係較靜音狀態，陳盈盈再望一望報案室門口，等咗幾秒都無人入嚟。
嗰兩聲通知聲應該喺報案室內傳出。
「唔通有同事留低咗電話？」一向八卦嘅陳盈盈循住剛剛發出嘟嘟聲嘅方向走過去，睇下係邊個留低咗電話。
發出電話訊息聲嘅喺報案室入面最角落嘅一張辦公檯，嗰張檯並唔係屬於任何一個同事嘅專用辦公檯，而係用嚟擺放文件同文具嘅檯，仲有一部廢置嘅電腦屏幕喺度，呢款大牛龜屏幕早已被淘汰，不過資訊應用科嘅同事硬係遲遲未嚟拎走佢。
陳盈盈走到檯面一睇，並唔見到有電話喺度，但佢明明就係聽到訊息聲係由呢度傳出嚟，佢彎低腰裝下辦公檯下面個鍵盤位置，見到有一部黑色物體嘅裝置正在閃動住小小嘅白燈。
「呀﹗你喺呢度﹗」陳盈盈笑住想拉出個鍵盤托出嚟，但卻拉唔郁，鍵盤位似乎被生鏽嘅路軌阻住咗，陳盈盈企返直個身，放低隻杯，捲起制服嘅衫袖，然後再次踎低，伸隻手入去鍵盤托裡面拉出嗰部電話。
電話被淘出，係一部iPHONE，型號唔算太新，黑色機身，陳盈盈對「生果牌」嘅電話一啲都唔陌生，但陌生嘅係佢從來未見過呢部電話。
陳盈盈肯定呢部電話唔係屬於任何一個同事，因為機身後面貼咗個編碼，個編碼代表咗呢部機係警署嘅資產，但凡所有電子儀器設備、大型電器及電腦等等物件，都會有呢有種財務部編碼。
「呢部機未見過嘅……」陳盈盈心中疑問著。
警務處自2006年起已經使用第三代指揮及控制通訊系統，作為無線溝通之用，基本上所有軍裝警員都會配備一套輕便嘅無線通訊裝置，隨時隨地都可以接收到控制台嘅指示。
「TSTDivPS - 1605 - 023」
陳盈盈望住電話後面個編號，的而且確係屬於警署財物。佢再返轉部機一睇，個訊息係嚟自一個「+852」字頭嘅無記錄電話，陳盈盈仲留意到個訊息唔止係SMS，而係MMS，即係多媒體訊息。
「都唔知係邊個嘅……」陳盈盈雖然係八卦，但不至於會隨便睇人地嘅私隱，如果部電話係佢上司嘅，而佢又唔覺意睇咗啲訊息，知道咗啲唔應該知嘅事嘅話，咁就水洗都唔清啦。「都係唔好理好啲……」陳盈盈諗過之後都係決定放返低部電話，扮無件事。
正當佢想放返入個鍵盤托裡面時，嗰部電話又傳來兩聲「嘟嘟」聲，陳盈盈又再次嚇一跳。
電話嘅屏幕再次亮起。「又係同一個號碼？」陳盈盈好奇，究竟有乜嘢人會咁夜發訊息出嚟。
不過今次陳盈盈睇到嘅唔止係一個訊息通知咁簡單，電話上方有一排細字正在顯示出來，那是訊息嘅內容正以快速閱覽方式顯示一次：
「救命……大廈……被困……樓……死人……」
快速閱覽嘅速度好快，啲細字轉眼即逝，陳盈盈睇唔切全部字句，但當佢見到「救命」同「死人」二個字詞，就即刻有好大反應。
「死人？」陳盈盈仲未搞得清自己究竟睇咗啲乜嘢，但呢一組字詞的確勾起佢無限嘅好奇心。心入面嘅交戰令佢久久未能放下部電話。
「部電話唔知係邊個，就咁開人訊息嚟睇好似唔應該……」
「但有晒Label係警署財物，點睇都係公家嘢掛……」
「不過就算係公家嘢，都唔知係咪其他部門嘅電話，萬一部機係EU嗰邊嘅，畀人發現我睇咗佢地嘅嘢點算……？」(編者按：EU全寫係Emergency Unit，中文名稱叫「衝鋒隊」)
「個訊息寫晒救命咁，可能真係有急事……」
陳盈盈停咗一陣，猛然醒起：「咪住，其實諗咁多做乜啫，問下孫麗咪可能會知部電話係邊個㗎囉﹗」說著，陳盈盈正想打開門跑入內堂，卻啱啱就遇上孫麗走入嚟，兩個人撞到應一應。陳盈盈衝力之猛，孫麗甚至被佢撞到跌低落地下。
「哎呀，痛死啦……」孫麗摸住個屁股連聲叫痛：「你做乜嘢呀，行路唔帶眼㗎？撞到我鬼死咁痛﹗」
「對對對…唔住呀師姐……我無心㗎……」陳盈盈立即走過去扶起孫麗：「你你你……有無事呀？」
無啦啦畀人一嘢撞落地，孫麗大失儀態，好彩頭先個師兄仲喺內室，應該見唔到佢個瘀相：「阿盈，你做乜嘢咁慌失失呀？」。孫麗一邊搭住陳盈盈膊頭，一邊企返起身，陳盈盈扶返佢入去報案室張櫈上面坐低。
「對唔住呀師姐，因為我有樣好緊要嘅事想走嚟問你呀。」陳盈盈好唔好意思咁講。
「三更半夜仲邊得嚟有緊要事呀？」孫麗望住陳盈盈，見到佢一臉楚楚可憐咁嘅樣，真係想嬲都嬲唔落，佢呼出一啖氣，再講：「乜嘢事咁緊要？」
「師姐，我想問下你呢……有無見過呢部電話呀？」陳盈盈喺個褲袋內攞出部電話。
孫麗接過陳盈盈手中嘅電話反過嚟一睇，然後「嘖」嘅一聲：「你就係為咗呢部嘢走嚟問我？」
陳盈盈點了點頭。
「我仲以為你有乜嘢緊要事添……」孫麗無佢咁好氣咁說：「你未見過呢部電話？」
陳盈盈擰擰頭。
「呢部電話係報案室㗎喎？你從來都未見過？」孫麗再反問陳盈盈一次。
陳盈盈繼續擰擰頭，一面驚訝嘅樣子：「呢部電話……係報案室㗎？」
「咁就奇啦，你返工時老頂無同你講過咩？」孫麗回道：「呢部機主要係畀啲做一樓一嘅女仔聯絡㗎嘛。」
陳盈盈若有所思咁，似乎一時三刻仲未聽得明部電話嘅用途。
「你有無印象喺幾年前咪連續發生咗幾宗鳳姐兇殺案嘅，咁之後有地區組職要求每個分區都可以設立返個流動電話號碼，專門畀呢班從事一樓一嘅女仔用，等佢地可以暗地用短訊報警，吖，個組織叫青乜嘢話？」孫麗嘗試簡單咁解釋一次畀陳盈盈知，但個組織名講到口邊又唔記得咗。
「青鳥？」陳盈盈答。
「係啦係啦，係青鳥呀﹗」孫麗望住陳盈盈答道：「做乜事呀？無啦啦問起呢個電話嘅？你唔好話我知佢響噃，我喺呢度三年嚟從來未聽過佢響過一次。」
陳盈盈呆咗喺度，一字一頓咁講：「部……電話……啱啱……有訊息……響……」
孫麗聽完陳盈盈講之後，兩個人你眼望我眼。孫麗比較快手，立即反過電話按開屏幕。
當初登記分區咁多組電話號碼嘅時候，內部嘅通訊科一次過直接同電訊商洽談服務，服務內容單一，而且清晰明確。因此電訊商已關閉所有商業推廣等滋擾性訊息。
即係話，訊息只有一個來源：「公眾人士。」呢一點孫麗好清楚。
屏幕被解鎖，就立即出現一個香港警務處嘅徽號，而徽號之上，有一則訊息通知正在顯示。
「2個未讀多媒體訊息」
「MMS？」孫麗心中好奇，直接按在電話中的「小郵件」符號上：「究竟仲會有乜嘢人用MMS？」
多媒體訊息包括相片或短片，喺未有3G網絡之前，係可以容許用戶透過電訊商發送有限流量嘅聲畫訊息，但自從有咗流動數據網絡，電訊商裝置喺各地嘅發射站，基本上每日都會處理上百億流量嘅數據傳輸。科技嘅發展，令多媒體訊息只有曇花一現嘅光景。
孫麗旁邊嘅陳盈盈都覺得好緊張，畢竟佢啱啱出學堂先半年，有好多事仲未經歷過。
打開MMS，首當其衝嘅畫面係一張極之蒼白嘅人面，以及一條伸到好長嘅脷，照片嘅下方隱約仲可以見到一條粗麻繩圈住相入面個人條頸。
「嘩……」孫麗同陳盈盈都畀呢一張相嚇到彈起身，驚聲尖叫咗出嚟，孫麗直頭嚇到向上拋開部電話，幸好陳盈盈手快接得住。
二人被嚇親，心頭噗噗聲咁跳。此時又打了一個雷聲，兩個又叫多一次出嚟。
「咩嚟㗎？」孫麗問。其實佢好明顯睇到係乜嘢，但實在係搞唔清點解自己會喺個報案電話睇到啲咁嘅嘢。
「係……係咪……死屍……嚟㗎？」陳盈盈口都震晒。
孫麗無出聲，深呼吸一口，定一定神：「警察嚟㗎，點可以咁失禮㗎，仲要喺啲細嘅面前咁騰雞點得……」孫麗心想。
孫麗再接過電話嚟睇，喺經過第一次睇見張相之後，似乎有咗心理準備，佢直接翻過去，再一次迎上嗰張面無血色嘅相片。
「師姐，仲有另一張相呀﹗」陳盈盈指住個屏幕右下角，上面寫住「1/2」，表示整個訊息共有兩張相片。
孫麗快手地向左邊滑走張死屍相，換嚟另一張更震撼嘅相片。
三個被吊住嘅人列成一排喺相入面出現，閃光燈打落去格外詭異。孫麗同陳盈盈個心又狂跳。
相片一過，有一段文字訊息伴隨，就係之前陳盈盈快速地睇過嘅嗰一段：
「救命，我叫許連祥，係關懷愛滋嘅外展員編號271，我同另一個同事譚俏冰喺香檳大廈5樓B室嘅單位被人困住，現場有死人，我地經理都被殺了，請快嚟救我地」
「香檳大廈﹗」陳盈盈同孫麗心入面警覺起來。
香檳大廈係區內其中一幢最多事發生嘅問題大廈，除咗係唔同幫派爭奪地盤、鳳樓控制範圍，以及安排賣淫活動之外，近年因為收購問題衍生咗更多奇奇怪怪而又好瑣碎繁複嘅案件，最普遍嘅就係成日警鐘誤鳴、斷水斷電、樓下嘅鋪頭被淋紅油等等，地產商同收購商覷覦香檳多時，卻仍未能全數收購八成業權。
一個黑社會兵家必爭之地，同時又有大量男人出入嘅地方，亦充斥過期居留嘅一樓一鳳，構成一幢別具特色嘅大廈。而紀Sir之前已經事先同分區內所有同僚講，只要有任何關於香檳大廈嘅風吹草動，都事必要同佢報告，因為香檳大廈係區內重點監察同打擊嘅項目之一。
紀Sir係尖沙咀分區警署第二把交椅 - 分區助理指揮官(行動組)紀偉雄總督察(CIP)。
陳盈盈反覆睇多次段訊息，短短70字元嘅訊息空間被全部用盡，孫麗同陳盈盈你眼望我眼，唔知點算好。佢地兩個從來都未接觸過任何謀殺或兇殺案件，程序上呢一類案件須要立即通報上級以及刑事偵緝科跟進。
「宜家點做呀？」陳盈盈好似無晒方向咁，唔知點處理：「師姐，係咪……要通知紀Sir呀？」
「紀Sir休緊假呀……」孫麗盤算住應該點做：「叫電台搵伙記上去睇下先啦。」
「但紀Sir休假前吩咐過如果有香檳大廈嘅任何Case，都要通知佢一聲喎……」陳盈盈有猶豫。
「宜家只係收到個訊息加兩張相，又唔係確定有事，可能……呢啲係滋擾訊息，甚至係惡作劇都唔定呢？」孫麗再說：「未查清楚就通報畀紀Sir，萬一係流料點算？」
孫麗諗咗一陣，就立即起身走入去內室搵通訊員，陳盈盈都第一時間跟過去。
「寶哥，可唔可以Call下電台睇下有冇同事喺香檳附近。」孫麗叫道，成個Office嘅同事都望住佢地兩個人。
一個中年肥胖嘅男人應了一聲，立即按了個掣對住個咪講：「Control Calling，夜更有無伙記喺金巴利道或者金馬倫道附近？」孫麗走到去通訊員寶哥隔離，聽住回應。
「嘟」的一聲，寶哥嘅耳筒傳來聲音：「4867喺附近，Over﹗」
寶哥檢查巡邏路線，然後轉向同孫麗講：「阿文同阿超喺附近，做乜事呀？」
孫麗無同寶哥解釋，直接拿過寶哥個耳機自己戴上：「阿文，報案室收到有人發短訊救助，有人被脅持喺香檳大廈5樓一個單位，，唔確定係咪玩嘢，你地上去Check下。Over﹗」
「Roger﹗4867同16385宜家上去Check。」阿文回覆。
「阿盈，你去查呢間機構，睇下係咪有呢兩個人喺度做嘢……」孫麗轉過頭同陳盈盈講。
話聲未落，孫麗喺耳機中聽到另一把聲，令佢嚇一跳。
「阿文，我係IP(註：Inspector of Police，即係督察)李Sir，啱啱PCO個Order唔駛去，你地照行咇得啦」李Sir講完，放低耳機同咪，望住孫麗同陳盈盈。
「你兩個做乜事呀？」李Sir雙眼著晒火咁望實孫麗陳盈盈：「一條短訊就要我地啲伙記走嚟走去？宜家仲嫌唔夠嗰啲虛報Case多呀？一條Message就去一次我地咪好唔得閒？」
「唔係呀李Sir……」孫麗都未講完，又畀李Sir打斷：「阿麗，你係ADO嚟㗎，你應該要識得安排前線伙記點樣做嘢，而唔係乜嘢都要去做，明白嗎？」
「報告李Sir，我地係收到呢部電話嘅短訊，話有人被禁錮喺香檳大廈，而且話有死人，所以先想叫同事上去Check下，Sir﹗」陳盈盈立正同李Sir解釋，同時將部電話交畀李Sir睇。
「阿盈，我問你，呢部係咪正規報案用嘅電話？」李Sir睇住裡面嘅相同埋訊息，同時質問陳盈盈。
「我……我唔知道，Sir﹗」陳盈盈只係第一次見過呢部電話，佢都唔敢肯定係咪，但礙於李Sir咁惡，佢唔敢亂講說話。
「我淨係知道，香港市民如果有任何向警求助嘅需要，係會打999報警，如果係聾啞人士需要求助，佢地要先登記992緊急短訊服務，先至可以使用短訊報警，我未聽過有其他方法可以要求警方做嘢。」李Sir轉向寶哥問：「係唔係呀，寶哥？」
「係……係……」寶哥額頭出晒汗，明顯地係冷汗。寶哥望向孫麗，只見佢兩眼發紅，強忍住淚唔畀佢地流出嚟。
突然間畀李Sir咁樣鬧，孫麗一腔鬱結無處可走，谷到上眼框裡面，好想喊，但佢唔想喺李Sir面前喊。能夠身為ADO係孫麗自豪嘅一點，佢自問一向都好識安排工作，對DO有交帶、對「睇樓」(即報案室內做打點工作的警員)有體諒，佢認為今次收到呢個訊息而應該要去處理，都係一個正確嘅決定。
可惜，佢嘅小隊上司並唔係咁睇。
孫麗好清楚，呢個由青鳥提出嘅試驗計劃，警署內幾個督察都認同，而唔認同嘅，就只有李Sir一個。李Sir一早就表明認為成個計劃多此一舉，根本就唔會有姐姐仔用，但就增加咗畀人濫用甚至玩電話嘅風險。而事實證明咗李Sir嘅判斷無錯，呢三年嚟部電話從來未響過。
而李Sir唔認同計劃嘅主要原因，大概係因為李Sir同其他小隊嘅督察心底裡就有病。
心病。
「李Sir，但我認為每一個求助嘅個案，都應該去調查清楚，先知道警察服務係咪有被濫用，如果真係有人求助，而我地唔去調查嘅話，就係我地失職，Sir﹗」陳盈盈吸咗一口氣，大膽地同李Sir講咗呢一翻話，講完之後面紅耳赤，唔敢直視李Sir。
成個辦公室一粒聲都無，全部人都望住陳盈盈同李Sir二人。
「PC14485，你宜家係咪咁同我講嘢？」李Sir兩隻眼望定住陳盈盈，眼神就好似可以食咗佢咁。
「李Sir，我都係實話實說。Sir﹗」陳盈盈再吸一口氣壯膽，然後叫出來。
「好﹗」李Sir攞起部電話，打開屏幕，按出了訊息匣，將裡面嘅唯一嘅兩條訊息刪除，然後將部手機拋向孫麗。孫麗一時來不及反應，接唔住部電話，跌咗落地下。
「我宜家收唔到任何訊息，明唔明白？」李Sir一字一頓咁講，然後對住大家講：「全部返埋位做嘢﹗」
李Sir頭也不回咁走返入佢間督察房。其他人則慢慢地返反去自己個位做嘢。孫麗執返起地下部電話，拉住嚇到呆咗嘅陳盈盈出返去報案室。
此時，隔離區嘅師兄都跟住孫麗同陳盈盈走出去報案室，頭先佢一直坐喺裡面望住佢地係辦公室嘅呢一場爭辯，其實佢自己個心頭都跳得好緊要。佢出到去報案室，見到陳盈盈坐咗喺張辦公椅上，低住頭無出聲。
「喂，我撐你㗎，你講得好好㗎，雖然唔知你阿頭做乜事咁樣……但頭先呢……你真係好型呀﹗」師兄拍一拍陳盈盈個膊頭，想畀啲安慰佢，卻不料陳盈盈一手捉住師兄隻手，突然企起身望住佢。
「師兄，雖然我唔知你叫乜嘢名，但我可唔可以拜託你，幫我地上去睇下個單位係咪有事發生，已經過咗好耐，佢地可能有危險。」陳盈盈哄到好前，壓低把聲喺師兄耳邊講。
「你相信……個訊息？」師兄聽到陳盈盈嘅請求，退後了一步，有啲驚訝咁問。
陳盈盈用力點點頭，眼神中充滿懇切。
「師兄，你就幫下我地手上去睇下啦，唔該你啦﹗」孫麗都出埋一份聲叫師兄。
「我唔相信有人會搵呢啲嘢開玩笑，我相信真係有人等緊我地去幫手，你唔好覺得係幫我地，你就當係真係有市民報案，上去查下啦。」陳盈盈再三請求：「最多我收工請返你食早餐啦﹗唔該你丫﹗」
「咁……好啦，我上去望下啦。」師兄答應：「唔好叫我做師兄啦，我叫阿謙啊，你地記低我電話丫，6387 5551。」
「63…8…75…551」孫麗按著號碼同時，陳盈盈搵咗把遮畀阿謙。
無幾耐，阿謙佢自己部電話響起來：「……踏上這無盡旅途，過去飄散消散失散花火，重燃點起鼓舞……」
阿謙走到警署門口，回頭望向孫麗同陳盈盈說：「等我Call。」
※※※※※※※※※※※※※※※※※※※※※※※※※※※※※※※※※※※※
檯面上，放住一部亮著咗嘅iPhone7電話，李Sir坐喺自己張大班椅上思索著，良久，佢攞起部電話，打了一串字，發送了出去。
李Sir用力咁摸住自己塊面，佢覺得有啲緊張，亦都有啲擔心。
佢企起身走去窗邊，窗下面係廣而闊嘅彌敦道，大雨彷彿侵佔了成個世界，無處可逃。
(待續)