全實景系列《香檳大厦 1:55 am 行人止步》重製版 (已完結): 【後記2：小冰的回憶2】
2019年11月29日
香檳大廈B座低層一樓星座冰室 – 17:58
※※※※※※※※※※※※※※※※※※※※※※※※※※※※※※※※※※
「喂，靚女又嚟呀﹗照舊係咪？」星座冰室嘅老闆笑面迎上嚟問。
「係呀，唔該老闆。」我走去角落張檯坐低。
星座冰室已經係最後一間仲未搬出嘅店鋪，整幢香檳大廈已經被收購晒，幾乎係百份之百被收購。自從嗰件事發生之後，唔止係B座，就連住喺A座住宅單位嘅人都搬得就搬，走得就走；啲大業主放到就放，即使畀人壓價都寧願接受；就連只係短暫喺度搵食嘅姐姐仔都早已離棄呢度，全部都過晒去附近嘅大廈做。
香檳大廈，只淨返啲老鋪喺度。
記憶中，角落張檯係我地幾個同事以前成日都會坐喺度，做完外展覺得肚餓就會過嚟休息下，食個宵夜先走。靠牆嘅位永遠都係經理坐，佢坐得咁入走唔甩，所以經常都係佢萬歲。
「番茄鮮牛撈蛋轉米線，您嘅﹗」老闆用親切嘅笑容迎上呢碗招牌產品。「譚小姐，唔好意思要同您講聲，我地做埋呢個月就唔做啦……」親切嘅笑容夾雜住點點苦澀。
「老闆……知唔知呢度會點呀？」我靜咗一靜，心情複雜。
「呢度？呢度唔做啦，都做咗幾十年，仲未捱夠咩？退休囉都無辦法。」老闆嘆氣，我知道佢一直都唔想賣走星座冰室，但無奈收購商已經收夠業權，即使再唔想搬走亦沒有辦法。
「咁您知道香檳會點樣嗎？」大抵我嘅面色實在太差，老闆都留意到，佢無即刻回答我，取而代之係用佢膊頭上搭住嘅檯布喺我面前嘅位置拭抹。
抹咗幾下，老闆先再出聲：「成幢拆卸重建，聽啲消息講好似係起酒店……」佢似乎之前係盤算緊點回應呢個問題：「其實……譚小姐，咪話我話您丫，都已經過咗差唔多三年，我諗您……您都係要接受現實啦……」
我點點頭無出聲，開始靜靜地食埋我面前碗米線。
「您慢慢食啦，我唔阻您先啦。」老闆見我無反應，都唔好意思再講落去。佢行開前我好清楚聽到佢嘅嘆氣。
我默默地吃著，淚水又開始湧出來。
我嘅眼淚為咗佢地不知流咗幾多次，可惜每一次嘅調查都係無結果。呢一段日子我除咗來回警局同香檳大廈之外，星座冰室已經變我唯一可以回憶到佢地嘅地方。
香檳大廈嘅其他嘅鋪頭，我都曾經有探訪過，錢虹相機鋪、戴東尼酒店呢啲商鋪甚至聯絡過不下數十次，而B座上面嘅每一個單位，如果開到門嘅，我都有走過入去睇，但慢慢地呢啲鋪頭、上面嘅姐姐仔陸續搬走晒，我就更加搵唔到任何有用嘅嘢，可以幫我搵出阿Ken同黃經理。
淚水沿住鼻尖滴到碗米線中。我聽到好大聲嘅叫喊聲，喺外面傳出嚟。老闆第一時間走出門口睇下發生乜嘢事。
我用紙巾抹走臉上面嘅眼淚，趕快食完碗米線，放下錢就離開星座冰室。
「阿細，乜你咁唔小心架，有無撞親呀？」老闆扶起地上面一個後生仔，後生仔旁邊仲有一架反轉咗嘅鐵轆車仔，地上面就跌咗好多箱罐頭。
個後生仔用手捽下自己條腰，一面痛苦卻又唔好意思嘅神情：「對唔住呀老闆，無諗過啲罐頭真係咁重，轉唔到彎所以炒咗車。」
「人無事就得啦﹗一齊執返佢啦﹗」老闆一邊講一邊開始執。執嘅時候同我打個照面：「走啦譚小姐？」
「係呀，唔該老闆，啲錢我放咗喺檯面啦﹗」我同老闆點點頭，同時望住佢地執貨。
鐵轆車仔反轉嘅地方，牆上面嘅漆油被罐頭嘅箱角刮甩咗，露出了一大遍舊牆嘅色，啡啡的灰灰的顏色夾雜住暗紅色的字。
「譚…俏冰？」我確認自己並沒有眼花，喺漆油剝落嘅牆身上面的確係我嘅名字！
「點解…會有…我個名…」我震驚得無法出聲，雙腳不由自主咁行過幅牆到。
喺我個名上面仲有半隻中文字，一時三刻我諗唔到係乜嘢字，是以我用手將未剝落嘅漆油一大塊咁撕落嚟，旁邊嘅老闆同職員發呆咁望住我。
「譚小姐您……」老闆叫住。但我無理會到，繼續撕開牆上嘅漆油。
一邊撕，啲眼淚一邊不停咁湧出嚟。除咗我個名之外，史提芬、阿Ken、阿琛嘅中文全名都出現喺牆上面，仲有一部份我唔認識嘅人名。
「黃…兆初…1984年12月10日 - 2016年7月9日……」我喃喃自語地讀黃經理個名，以及寫喺佢個名後面嘅日期。
「7月9日……7月9日……」我忍唔住用手掩住咀，嚎哭般跌坐喺地上面：「7月9日係我最後見到佢地嘅日期啊﹗」
星座冰室嘅老闆走過來扶住我，我整個人軟弱無力咁攤坐係地上，因為換氣過度，覺得有點頭暈。
「啲名……點解有字係道牆上面？」個職員行近埋幅牆研判：「啲字跡好似好耐咁啦喎。」
「喂…老闆，咁搞笑，上面仲有雷萬鈞個名嘅？」職員覺得好好笑，指住雷萬鈞個名叫老闆睇：「條友梗係想做有錢佬想到傻咗定啦。」
我知道啲字只會係我識嘅人寫，而寫埋一齊一定係有啲意思。
我望住牆上面嘅字，心中彷彿見到一點光。
(後記2完)