一個香港留學生在美國的生活: 師傅發辦

落堂之後，京子收拾完畢就先返屋企，京子都係住學校附近，係一個迷你Studio。一個人住，不過佢冇揸車，佢係騎單車返學，返工就要搭巴士，間餐廳響Downtown，搭巴士都係四個站，唔算遠。  

我返到屋企已經五點幾，沖咗個涼，去到餐廳啱啱好六點半、呢間日本餐廳係日本人開，師傅都係日本人，大約三十多個位，今晚只有京子一個waitress，可能係禮拜二關係，客人唔多，我入到餐廳京子好高興咁帶我去sushi bar介紹我畀壽司師傅同老闆認識，老闆係一個中年女人，十分和藹可親，壽司師傅係一位六十多歲阿伯，笑容滿面叫我坐低，問我想食乜，我用日文話「師傅發辦！」師傅笑著話「係！」呢個時候京子好驚訝咁問「你好似好知道日本餐喎！」我笑一笑「知少少啦！」其實我真係好鍾意食日本嘢，我爸媽好多時放假都會帶我同細佬去日本玩，我對飲飲食食特別有興趣，唯一可惜係唔可以飲酒！老闆娘話我廿一歲生日再嚟餐廳食佢請我飲過！  

可能因為京子關係，老闆娘同師傅都好熱情好客，前前後後食咗差唔多十二三碟，有壽司有熟食，壽司種類唔多，師傅話呢啲細阜仔冇人識食，訂啲特別嘅魚賣唔去！我記得Joe同我講要食好嘢一定要出三藩市，呢幾個禮拜一直忙開學，都係時候出城揾下阿Joe。  

食到八點幾，已經冇哂客人，我叫埋單，老闆娘只算我半價，$50都唔洗，我食咁多嘢，唔好意思，最後互相推讓後，我放低$100算係連Tips。京子當然高興，Tips係佢同師傅分，冇乜人會畀咁多 Tips。  

八點半京子準備收工，佢打算塔八點九班巴士，我見佢一個人，我就同佢講「不如我車你返屋企啦！」「唔方便嘅！」「順路姐，我車就就停響路邊，我車你啦！」於是佢就跟著我去攞車「嘩！㗎車好靚呀！你屋企肯定好𡃶你！」「我爸媽真係好𡃶我㗎！」「我未坐過咁好嘅車呀！」我笑一笑，幫佢開咗車門「你屋企地址響邊？」「你開車直行向大學方向，去到54th街轉右就到啦！」「真係好近學校喎！」「如果你唔嫌棄，我下次請你上嚟我屋企我煮俾你食啊？」「好呀！我未食過真正日本住家飯，咁幾時呀？」「我平時要返工，只有禮一四放假，不如下禮拜四啦？好唔好？」「好呀！上完堂我順便車你返屋企。」ESL係逢禮拜二四上堂嘅，所以禮拜四最方便。就係咁，我送咗佢返apartment樓下，我就返阿婆度。  



日子平靜中渡過，返學放學，每晚十二點半準時打畀小詠。禮拜五阿君去咗我屋企睇，順便幫我裝咗部電腦，好彩間房有電話線裝到Modem上網，咁就方便好多，我同阿婆講咗有時候會響阿君度過夜，方便做功課，阿婆不置可否，反正我一個禮拜都見唔到幾次，禮貌上通知佢就算啦！