做完Spa已經五點半,由會所去食飯嘅扒房又要45分鐘車程,去到已經六點半,根據Joe講,呢間Steakhouse有好耐歷史,間餐廳外表就好有美國西部牛仔小鎮嘅味道,同Clint Eastwood拍嘅片一樣,餐廳裝修全部喺19世紀格調,入到裏面第一眼見到一個美洲大水牛頭標本,好震撼!Joe訂咗枱,餐廳好多人,十分熱鬧,坐低咗之後侍應送上餐牌,菜單好簡單簡單,全部係各種不同嘅牛扒,份量十分大,最後我同Joe都點咗20oz Bone-in Ribeye,再加個sautéed mushroom and spinach,「兄弟,上次同你做生日已經係六年前啦!時間過得真快!估唔到六年後響美國又可以同你祝生日!」「係呀!好彩有你同我過生日,如果冇你我都唔知呢幾個禮拜點過!」「你應該認到新朋友啦!」「有幾個新同班同學,都係香港人,仲有個馬來西亞華僑,過咗聖誕會搬出嚟同佢住!」「早就應該啦!間鬼屋點住人呀!」「下次你再入嚟我介紹佢地畀你識啦!」都係嗰句,我兩個唔夠秤,只可以叫杯可樂。甜品叫咗一個Mud Pie,仲大過我塊面,我同Joe兩個人都食唔哂!埋單當然又係Joe請客!之後仲要車我返屋企!有個咁嘅老友真係好感動!  

返到屋企沖完涼,瞓響床度就收到阿爸阿媽電話,當然係同我講生日快樂啦!一講就講咗成個鐘,之後細佬阿傑又打嚟!又講咗一陣,阿傑響Vancouver 讀寄宿學校,生活比較苦悶,佢要入大學阿爸阿媽先畀佢搬出去住。  

半夜十二點正,電話準時響起,「阿偉,生日快樂!」係小詠可愛嘅聲音,「小詠,我好掛住你啊!如果你響度同我一齊過生日就好啦!」「你日日帶住條頸巾咪好似我陪住你一樣囉!」「頸巾又點一樣!我想攬住你真人,可以攬住一齊瞓!」「你就想!咸濕仔!」就係咁,一路講電話一路打飛機,講咗成粒鐘先收線!真係期待小詠過嚟,咁就唔洗再打飛機啦!  

禮拜一十九歲生日正日,第一年冇家人響身邊過,冇啲失落。換好衫返學,一早約咗阿君食早餐,估唔到阿君買咗份禮物「生日快樂!」「嘩!多謝!」阿君送咗個歐洲名牌車匙扣畀我!我即場將車匙換上去!太感動啦!食完早餐上堂,如住常一樣,落堂同Alan 阿健一齊去食晏,阿君同Kim都響度。

Kim「阿偉生日快樂啊!」「多謝多謝!」Alan就話:「唔好唔記得今晚食韓國菜呀!訂咗六點半!」「咁我放學返屋企沖涼換衫先,係唔係各自揸車去呀?」阿君話:「阿偉其實你可以搬部分東西到我家,反正有地方,你十二月也會搬來住!」我就話:「唔係幾好嘅!」Alan:「其實你應該早早搬出嚟去阿君度,遲又係搬,早又係搬,你同阿婆講佢可能仲開心!」「等我今晚打返屋企同阿媽商量下先啦!唔係我會死得好慘㗎!」 



其實我心真係好想快啲搬,不過我知阿爸一定反對,所以今晚先同阿媽講,咁會易啲成功! 

 

夜晚食飯嘅韓國餐廳其實都唔係咁遠,開車大約30分鐘,在城南比較新嘅開發區,我住最遠亦係最後一個到「真係唔好意思要大家等!」Alan:「約咗六點半,依家先六點廿五,你又冇遲到!你快啲坐低點菜先啦!今日你生日大晒!」我就唔客氣點咗兩盤牛肋骨,辣雞肉辣豬肉,一個海鮮餅再加個牛尾湯。餐枱中間有個烤爐,大部分時間都係Alan幫手烤肉,食物水準真係唔錯!埋單佢地堅持要請我,之後返咗去Alan屋企切蛋糕。 
已有 0 人追稿