終於到咗禮拜六,我可以搬離阿婆間鬼屋,一早起身,阿婆已經唔見咗,反正我已經同佢講咗我今日搬,禮貌上已經做到足,等陣走嘅時候再寫張Thank you Note囉,正所謂相見不如不見… 正當我自悲自憐嘅時候,門鐘響起,原來Alan 佢哋到咗,Alan 幫我問朋友借咗架貨Van,我除咗十六個紙箱外,已入喼嘅衫褲鞋襪,書枱,凳,仲有兩個膠櫃用嚟放衫,嘢就唔多,只係張枱比較大,於是我地先搬張書枱上車,搬到出門口,Joe 啱啱到 ,Joe都開咗部Minivan嚟,做完簡單互相介紹後,我地幾個男人夾手夾腳,唔洗半個鐘已經搬晒上車,睇下隻錶,十一點未到,阿婆仲未返,於是我放低條匙就走人。  

阿君屋企十分近大學,開車唔洗5分鐘,係一楝三層高Apartment ,我哋住響三樓一個兩房兩厠差唔多千二尺單位,仲有一個可以睇到大學嘅騎樓,單位月租千四加水電費,於是我由十一月一號開始負責一半租金。 

上禮拜訂咗嘅新床早幾日已經送到,我訂咗張Queen Size,如果換咗響香港,已經係超級大,不過響美國呢個size十分普遍,客廳家私全部都有,話晒阿君已經住響度一年。搬枱入屋最麻煩,攪咗成個鐘先搬到上三樓,真係辛苦晒班兄弟,其他雜物紙箱好快都搬完,呢個時候Joe 見到我隻小提琴「吓?你幾時開始學埋小提琴?點冇聽你講過?」阿君就話「嘩!好利害!平時我可以有音樂聽了!」我就笑笑口咁話「我學咗三年多少少,啱啱先考完五級,我寄隻琴過嚟就係想繼續學,大學好似有音樂班可以報。」Joe 就好奇咁問「你真係屎忽痕!你唔係玩開鋼琴咩?我仲記得你中二嗰年攞咗個唔知乜嘢獎?」其實只有識我耐嘅朋友先知道,我最愛係鋼琴,最強亦係鋼琴,我同細佬阿傑都係四歲開始學鋼琴,阿媽升做校長之前除咗教書仲有兼教琴,而我阿爸更係小提琴愛好者,雖然阿爸冇考級,不過佢真係拉得唔錯,阿爸對我影響好大,我中三嗰年一口氣考完鋼琴八級同 PerformanceDip,就決定學埋Violin,可能有鋼琴基礎,學小提琴上手比較快,我本身又十分喜歡音樂,阿爸又幫我揾到個好老師,所以三年就考五級,勉勉強強又畀我過到關! Alan:「估唔到你會彈琴又會拉小提琴,阿健都有玩結他,揾次你地可以玩下合奏!」阿健:「好呀!不過我要練返下先得!好耐冇玩過!」Joe :「死仔包,識你咁耐都未聽過你拉小提琴,拉首歌嚟聽下啦!」其他人都起哄要我表演,無奈只好去紙箱揾琴譜,好彩阿媽有分門別類,我好快就揾到放琴書個箱,攞咗本琴譜,攞小提琴出嚟,調好琴絃,久違嘅琴音響起,我拉咗Vivaldi Violin Concerto in A Minor 1st Movement,幾個月冇練習,都仲拉到平時七八成水準,一曲奏完,靜咗幾秒,之後大家報以熱烈掌聲!Joe「唉!你玩晒啦!全世界啲女比你溝哂啦!我地食屎得啦!你冇朋友㗎啦!食自己啦!」Alan就話「阿偉你真係女見女愛!好啦,已經兩點!去揾地方食晏先啦!賀阿偉新屋入夥!」「我請我請!多謝咁多位兄弟幫手!」  

最後我地去咗近大學附近個Mall,揾咗間All you can eat Buffet食lunch,我一睇,間餐廳竟然響早幾日睇戲間戲院隔離!睇嚟呢度應該係大學生出沒嘅蒲點。 
已有 0 人追稿