返到屋企發覺阿君仲未返,咁Alan同阿健應該都未返,我估佢地可能玩到禮拜日先會返嚟。我休息咗一陣,check下email換過件衫,正準備出去賣外賣食晚飯嘅時候Aaron打嚟:「喂!返咗嚟都唔打畀我!點呀?玩得開唔開心呀?有冇溝到女呀?」「日日夜夜都掛住溝女!你同京子點呀?」「我呢個禮拜響佢度過咗兩晚,佢有問你幾時返,你返咗嚟就揾下人啦!」「我依家去食飯,你有冇嘢做?有就一齊食,見到面先講啦!」「冇呀!姨媽話尋晚隻火雞煲粥,我唔想再食同火雞有關嘅嘢!咁我依家出嚟,你話去邊?」「我要洗車,去學校附近有個細mall,有得食有車洗,你知唔知響邊?」「哦,嗰間人手洗車?我知道!隔離有間食sandwich,咁等陣見!」  

去到啱啱放低架車,就見到Aaron開車到咗,佢都要洗車,等佢放低車之後我地兩個入咗間Café食sandwich,呢間Café我嚟過幾次,通常都係洗車食晏,食物水準唔錯,Sandwich只要用料新鮮基本上好難整得難食。我一路咬住件roast beef sandwich 一路問Aaron:「講下你呢個禮拜做咗啲乜?淨係見京子?」Aaron即刻笑住講:「禮拜一同禮拜三兩晚都去咗京子度過夜,我同姨媽講去咗你度打機咋!你唔好爆響口呀!」「嘩!佢肯畀你去佢嗰度過夜?喂!你唔好唔記得你仲有個女朋友響香港,唔好玩咁大呀!仲有,京子係咪打算聖誕前返日本?」「係呀,好似廿二號飛,你唔去揾佢?」「小詠就到啦!我冇打算再揾京子。」「就係你條女就到先應該玩盡佢!你係咪扮正義呀?食得唔食罪大惡極呀!」「我真係想唞吓,下兩個禮拜仲有Final,第一個學期唔想考衰咗呀!」「咁我要唔要話佢知你返咗呀?我今晚可能去京子度過夜喎!」「又去?你都去得好密下喎!」「哈哈!唔記得話你知,我用晒你啲套,等陣要去買返盒先!」「我冇你咁得閑!我仲要返屋企𢴇屋洗衫!你小心腎虧呀!」「你放心!一晚三四次冇問題!」「咁你Enjoy!我返屋企!」  

食完飯架車啱啱洗好,同Aaron分別之後,我去咗超級市場買返啲嘢食返屋企。我同阿君本來都唔會煮飯,不過我已經下定決心開始努力去學,其實我由細到大都係菲庸帶大,阿媽唔會煮飯,阿爸更加只識飲識食,我唯有睇下電視呀食譜呀咁學,最近阿爸寄咗啲煲湯嘅書過嚟,今晚我就試下大白菜煲雞,洗雞洗莱煲落湯已經九點,起碼仲有兩個鐘先有湯飲,於是我睇碟追下日劇消磨時間,啱啱放碟入機,又收到Aaron打嚟嘅電話!「喂!你返到屋企未?」「你唔係去京子度咩?畀佢踢咗出嚟?」「我本來去佢餐廳接佢放工,點知去到老闆娘話佢已經走咗,咁我咪直接去佢屋企囉!點知都係冇人,打電話又冇人聽,等咗半個鐘都唔見佢咁我咪走囉!」「咁你唔返屋企揾我做乜呀?」「我同姨媽講咗今晚去你度玩!返正冇嘢做好悶呀!不如你今晚收留我啦!」「你鐘意咪過嚟囉!阿君又未返!我煲緊湯!」「咁我依家過嚟!」 
已有 0 人追稿