日子過得好快,轉眼就已經到咗禮拜六,呢個禮拜除咗每日下晝去Joey屋企教琴,其餘時間都響屋企hea,睇碟煲劇瞓覺。聖誕節晚飯就去咗Aaron屋企食,佢姨媽煮飯,總算唔洗一支公過,相對於舊年同小詠一齊表演,今年嘅聖誕係我人生中最平淡嘅一個聖誕。禮拜六下晝教完琴,我就直接出三藩市揾Joe。 我會陪小詠到一月中,接阿君機之後先會返屋企。 

小詠係禮拜日早機到三藩市,我一早起身Joe仲瞓緊,我食完早餐就一個人直接去機場,由Joe屋企去機場大約三十分鐘,本來班機應該八點半到,不過Delay咗,依家改到十點先到,我去到機場等咗大半個鐘,終於見到小詠出禁區!四個多月冇見,其實冇乜大分別,不過坐完十幾個鐘飛機,個樣有啲攰,小詠著住件圓領長袖上衣牛仔褲,仲扎咗條可愛嘅馬尾,我上前畀咗一個熊抱佢,再深深一吻,呢個係我第一次正式錫小詠,佢有啲不知所措,「喂!呢度大庭廣眾,咁多人,唔好啦!」「呢度又唔係香港,冇人識我哋,有乜所謂喎!就算俾人見到又如何,你係我女朋友吖嘛!」小詠伏響我心口:「終於見到你啦!」場面唔算太感人,不過真係幾warm!之後我推住行李車去停車場,小詠好好奇咁四圍望「小詠你第一次嚟三藩市?」「我好細個嚟過加州旅行,媽媽話我地住過三藩市三日,嗰次旅行主要係去南加州,我有個表姑媽住響LA!」「咁我地先settle down,之後兩個禮拜我地可以響三藩市四處玩,我一月中先返去開學。」  

小詠原來上機前幾日先confirm到另一間私立大學收咗佢,佢決定唔去City College而去呢間大學,雖然貴好多,不過始終係四年大學,好過2-year city college。我睇完地址再睇地圖,大約知道學校位置,膽粗粗就去搵路,第一次車小詠,點都唔衰得!結果都係行錯路轉咗幾個大圈先搵到。呢間係一間歷史悠久嘅私立教會大學,位於三藩中部一個小山上面,環境舒適,小詠父母早已經同學校聯絡好有工作人員接待入住宿舍,我響宿舍門口泊好車,將行李推入宿舍大堂,小詠根據指示響大堂對講機聯絡到宿舍Property Manager,等咗一陣,有個亞洲面孔嘅男仔落嚟,互相介紹之後,佢同小詠確認身份,簡單咁簽咗份文件,之後我地一齊將行李搬上樓。原來呢個男仔響大學讀緊PhD,佢係美國出生嘅韓國人,住響二樓,property manager係份part time,可以免費住宿。小詠就住響四樓,係一間雙人房。宿舍外表就比較舊,不過入邊算係乾淨, 4樓全層都係女仔嘅宿舍,搬到行李入房,見到小詠嘅roommate小玲,佢都係香港人,不過一睇就知係毒女,厚片黑膠眼鏡,蓬鬆開叉冬菇頭,hello Kitty 睡衣,我第一個感覺就係七十年代嘅林阿珍!雖然外表唔討好,不過人就十分隨和友善,小詠起碼會同小玲一齊住半年,當然要打好關係啦!所以放低行李之後,我都有邀請小玲去食飯,毒到出汁嘅小玲亦好正路咁拒絕我嘅邀請。  

我同小詠開車五分鐘左右去到之前食韓國燒烤附近,呢幾條街全部都係餐廳同雜貨店,有人叫呢區做新唐人街。我地隨便搵咗間越南粉食,跟手買咗啲日用品同食物,之後就送小詠返宿舍休息。 
已有 0 人追稿