日子過得好快!轉眼已經三月,三月七日係禮拜六,亦係小詠十九歲生日!我如常禮拜五上完堂即刻飛車出三藩市,今晚約咗Joe佢地成班朋友一齊同小詠慶祝,同情人節一樣,第一件事就係買禮物!我住嘅地方係鄕下,想揾間似樣嘅舖頭都難,食好嘢買靚嘢一定要去三藩市!禮物其實我一早就買咗,不過今日先有貨攞。我早兩個禮拜去咗日本阜附近一條叫做Fillmore嘅街,個度有間細細間嘅時裝店訂咗個斜孭袋,係西班牙全人手一針一線縫製,每一個都係獨一無二㗎!  

攞完個袋收好響車尾,跟著去宿舍接小詠同小玲,出乎意料之外小玲今晚答應參加小詠嘅生日飯局,除咗我同小詠佢一個人都唔識!聽小詠講佢好難先叫到小玲去,仲要帶佢去買衫同教佢化妝打扮!  

當我去到宿舍樓下見到小詠同小玲嗰下,真係嚇咗一跳!小玲經過改造之後,完全係另一個人!雖然唔係靚女,起碼唔再係林亞珍!小玲剪咗個清爽短髮,配咗隱形眼鏡,著咗件高嶺冷衫長牛仔褲,成個Look唔同晒!如果唔講,響街見到面都可能認唔出佢係小玲!  

Joe安排咗去三藩市唐人街旁邊嘅North Beach食意大利菜,呢一區又叫做Little Italy,有幾間老牌意大利餐廳好有名,今晚我地去嘅就係其中一間主打北方意大利菜嘅餐廳,餐廳位於一楝極之殘舊二層樓嘅地牢,我地要走落一條又窄又斜又高嘅木樓梯先落到去,餐廳好細好迫,目測大約坐四十人,我地今晚已經包咗佢三分一嘅場!我地約咗六點,去到Joe佢地未到,咁我地先攞枱坐底,小玲有啲怕羞唔太自然,咁我唯有打開話題等佢冇咁尷尬:「我啲朋友就到,你多啲出嚟同我地一齊玩啦!有小詠同你做伴你唔會悶㗎!」「多謝你地請埋我呀!我真係好少離開學校同宿舍!小詠叫我同佢一齊學車,買咗車會多啲出嚟。」傾咗一陣,Joe佢地一大班人陸陸續續出現,其中仲有個新朋友,叫做阿漢,佢係Amy帶嚟嘅,最初我以為係Amy男朋友,後來先知原來係小詠佢哋幾個女仔嘅主意,要介紹畀小玲!  

如果你問我,我一定反對做雞仔媒人!小詠又冇事先同我商量,我覺得有啲魯莽,不過已經約咗出嚟就算啦!咁我都好高興小詠可以同班女玩埋一齊,我唔響小詠身邊嘅日子佢地幾個都會約出嚟行街睇戲食飯,依家多咗小玲,佢地想介紹男朋友畀佢都唔出奇!  



由於唔係食中餐冇大圓枱,老闆將幾張四人枱合併成一張坐十二人長枱,我地啱啱好六男六女,Joe 阿漢David Dave Sam同我坐一邊,Amy小玲小詠yoyo Maggie 同Joyce坐另一邊,咁嘅安排下Joe就對住Amy,阿漢就順理成章對住小玲坐!令我意係成餐飯冇冷場,阿漢呢個人好識Social全晚同小玲有講有笑,幾個女仔玩得好開心!晚飯高潮係一個一早同餐廳予訂嘅tiramisu蛋糕,吹完生日歌之後影相同送禮物,Amy就問:「喂!我地人人都有禮物畀小詠,點解冇你嗰份㗎!」「我早就準備好啦!今晚十二點先送吖嘛!」Amy明知故問!本來我訂個袋就係Amy介紹,如果唔係我又點知去邊買? 
已有 0 人追稿