Summer School呢六個禮拜應該係嚟咗美國之後最開心嘅六個禮拜,我報讀咗兩堂一共六個學分嘅課程,每個禮拜一到四上堂,上晝兩個半鐘下晝兩個半鐘,通常每兩個禮拜都會有一個中期試要考,第六個禮拜就考Final,相對於平時十六個禮拜一個學期嘅課程相比,暑期班算係十分輕鬆簡單。  

我同Aaron一齊讀嘅呢兩班係psychology同Anthropology,兩堂都係出咗名易嘅!考試題目年年一樣,仲要係選擇題,啲past paper早就已經流到通街都係,我哋做完晒啲past paper,無驚無險就已經攞到A。  

我哋返學嘅呢幾個禮拜,小詠就響屋企執下屋學下煮飯,同時佢又買咗架車,好多時候佢會約埋Kim去行街shopping,順便認識下呢一個佢將要住三年嘅城市。 

第一個session嘅Summer School響六月尾結束,Alan佢哋打算讀埋第二個session,我就冇咁癲啦!點都要take返一個break去玩下,正當我同小詠計劃緊去邊度玩嘅時候,小玲同阿漢就打電話嚟話想入嚟探我同小詠 ,講吓講吓我就提議一齊去玩「不如趁仲有個幾月先至開學,我哋去LA同San Diego 吖?」小詠就話「吓?我啱啱先去完LA探過表姑媽,可唔可以去其他地方啊?」「咁我未去過呀嘛!再講啦, LA咁大,有好多地方可以去玩㗎!你上次都冇去Disneyland同Universal Studio,今次同埋小玲一齊去好玩啲吖嘛!」「咁又係,不過今次落去就唔好同表姑媽講啦,費事又要約出嚟見面,其實住喺親戚度真係好悶!」就係咁,我哋約好咗喺七月嘅第一個禮拜開車去南加州玩十日。 

1998年7月4日美國國慶啱啱好就係禮拜六,亦都係我第一年響美國過美國國慶。一般來講好多美國家庭響國慶呢一日都會響自己屋企約親戚朋友一齊開party燒嘢食,而我哋就決定咗呢一日開車落南加州玩。禮拜六一早小玲同阿漢先嚟咗我哋屋企滙合,我就去咗租車公司pick up咗架七人Minivan。由我屋企開車落LA大約360公里,如果唔塞車五個半鐘左右就應該到。 



我哋大約十點半左右出車,今次係我第一次揸長程車去玩,我同阿漢坐車頭,女士坐後邊,全個旅程我同阿漢就輪流做司機。 由屋企開車上5號高速公路向南行,大約20分鐘左右就已經離開咗我哋居住嘅城市。沿途風景由民居變成一望無際嘅果園同農地。 

好多人都以為加州只有三藩市同洛杉磯兩個大城市,都係工商業發達,但係其實加州除咗科技同金融兩大產業之外,亦都係一個農業大州!沿住5號公路可以見到唔同嘅果園同農場,今次係我第一次咁樣揸車去玩,真係大鄉里出城,如果有時間,其實係可以停落嚟去果園入邊摘水果。  

開車行咗大約三個鐘左右,到達咗一個小鎮,我哋決定停低落嚟入油休息同埋食晏。 
已有 0 人追稿