一個香港留學生在美國的生活: 英國

我同小詠去旅行嘅時間都唔一樣，小詠係過咗聖誕之後先至去日本，目的地係北海道，佢哋會響北海道玩兩個星期自駕遊，而我哋呢就會響平安夜出發去英國。  

英國對於我來講唔係乜嘢特別新鮮嘅地方，大大話話我同細佬起碼嚟過倫敦六七次，阿爸嘅碩士學位就係響英國讀嘅，聽講佢同阿媽都係響英國讀書嘅時候識，由於佢哋兩個都鍾意玩音樂，後生嘅時候就成日都會去歐洲唔同城市嘅歌劇院睇歌劇。而今次我哋去英國玩嘅另一個原因，就係參加阿爸一個舊同事個女嘅婚禮。婚禮係響明年嘅1月8號，去完婚禮之後幾日我哋就會飛番香港。  

我哋一家四口到咗倫敦之後，阿爸租車，跟住去咗我哋響倫敦嘅屋企，冇錯呀，我哋響倫敦係有一間屋嘅，阿爸好多年前已經買落，係準備佢同阿媽退休之後搬過嚟倫敦住。阿爸阿媽都有居英權，早就已經入咗英國籍，佢哋計劃等我同細佬大學畢業之後，佢哋就會退休。 

香港回歸中國大陸其實對好多香港人有好大影響，阿爸阿媽有好多朋友同事都移咗民，大部份都去咗英國同加拿大，尤其是喺倫敦，隨便數一數已經可以數到七八個阿爸嘅朋友響度落地生根，所以跟住嗰幾日響倫敦嘅活動大部份都係同以前香港嘅朋友敘舊見面食飯，呢啲uncle auntie好多都係由細睇到我大，佢哋大都係六四之後，九十年代初離開香港，當年佢地走嘅時候我年紀小，對時局唔了解，只係覺得移民係一個潮流。  

由於已經唔係第一次嚟倫敦，大部份主要出名嘅景點其實我都已經去過，不過以前去嘅時候係一家人一齊去，同埋嗰陣時比較細個好多嘢都唔係好明，完全係阿爸阿媽話去咁咪去囉！ 今次再嚟倫敦，感覺就已經完全唔一樣，自從一個人去咗美國讀書之後，感覺上獨立自由咗好多，幫阿爸阿媽去同夠朋友見面應酬嘅時候，我決定一個人自己出去玩。讀中學嘅時候我對歐洲歷史已經十分有興趣，尤其是對一啲古舊嘅建築物，教堂古堡，同埋博物館，細個同阿爸阿媽嚟嘅時候一知半解完全唔知係乜，今次我打算用呢兩個禮拜好好咁玩返夠本！  



同阿爸阿媽交代好之後，我就一個人背住個背囊，拎住地圖，一個人上路。倫敦嘅交通好方便，巴士同地鐵基本上已經覆蓋城市主要嘅景點，加上響美國住咗一年半，用英文溝通完全唔係一個問題。呢兩日我一個人已經參觀左國會大樓西敏寺同白金漢宮。之後，我決定一個人用全日嘅時間參觀大英博物館，本來係好平凡嘅一件，但係世事往往就係咁出人意料之外！  

呢一日係禮拜六，一早我哋一家人響附近一間酒店食咗個英式早餐，阿爸阿媽同細佬就揸車去咗牛津探望一位老教授，話說呢位教授當年教過阿爸國際關係，而家已經退咗休，不過阿爸同佢咁多年都有聯絡，所以每次嚟英國都會探佢嘅。而我呢就真係冇興趣揸過幾鐘頭車入牛津，於是我決定去博物館逛逛。有我住嘅地方去博物館係可以坐巴士，呢種紅色Double Decker香港已經成為古董，坐響上邊真係勾起好多喺香港細個嘅回憶。去到博物館大概10:00左右，啱啱開門，博物館係免費嘅，由於係禮拜六，去到嘅時候已經人山人海，除咗遊客仲有好多學生。我租咗個Audio Tour Headset，帶住個耳機一個人慢慢咁參觀，估唔到嘅係，當我入到去博物館行左唔夠一個鐘，我竟然碰倒我響美國教琴嘅學生，Addie！