一個香港留學生在美國的生活: 小詠外傳-暑假（4）

過去嗰兩個週末，阿漢同小玲又入咗嚟一次住咗一晚，小詠自己又出咗去一次住咗兩日，基本上都係行街睇戲食飯，而呢個週未小玲要去溫哥華參加佢表姐婚禮，所以冇法陪小詠。 

時間過得好快，轉眼已經到咗七月中，第一個Summer Session快要完結，再過多兩個禮拜阿浩就會到美國，到時兩姐弟一齊，互相有個照應。 

禮拜四晚終於考完試又交咗Final Project，小詠於是揸車去租碟，打算租套最新日劇返屋企睇，出咗門冇耐手提電話響起，係一個415號碼（415係San Francisco Area Code）猶豫咗一陣，小詠最後都係接咗個電話「Hello?」「喂？小詠？我係Chris呀！認唔認得我呀？」「哦！Chris！好耐冇聽你把聲，差啲唔記得！」「我呢個禮拜六會入嚟大學城，你有冇時間見下面？大家聚下舊食餐飯啦？」「咁！我睇吓啦！唔知得唔得閒！」小詠有啲猶豫咁講「你而家唔使答我住，反正我都會入嚟，我星期六打俾你先再講啦！拜拜！」  

Chris係有錢嘅香港富三代，人雖然唔算高大威猛，不過亦唔係樣衰，人有錢又口甜舌滑，揸住架開篷SL500，你話冇女冧佢就假嘅！小詠其實都知道佢一直都想溝佢，絕大部份女仔其實都好enjoy畀人追嘅感覺，不過自從同左我一齊之後，佢就冇再留意其他人，而家Chris突然出現，又點會唔心動呢！反正呢個禮拜六冇節目，一個人煲碟，倒不如出嚟見過面食餐飯！  

老實講， Chris絕對係一個情場老手，對於女人嘅心理瞭如指掌！禮拜六小詠一早起咗身，本來以為Chris會打嚟約佢食晏，點知等極都冇電話，本來小詠有諗過打畀Chris，不過又覺得唔係好妥！到咗四點幾，小詠以為Chris放飛機，電話就響起「Sorry呀我今朝早要幫屋企人處理啲銀行嘢，攪到下晝一點銀行關門先走得！我即刻飛車入嚟，所以依家先到！我已經響大學附近，你屋企響邊呀？我嚟接你！」小詠本來推一推唔咁快應承去食飯，點知聽到佢咁講又心軟！其實Chris一早已經到咗，只係等到依家先打呢個電話！「不如你話我知響邊，我開車嚟搵你啦！」「一架車方便啲，冇理由仲要你開心車！男仕風度嘛！」講到咁，小詠就將屋企地址畀咗Chris！唔夠五分鐘，Chris已經響樓下出現！  



小詠一落到樓，Chris就為佢開車門閂車門，懶係有紳士風度嗰隻！後來好耐之後我問返小詠，Chris做到咁明顯，點解仲要上佢架車？小詠就話完全係好奇心驅使，身不由己，想睇吓之後會發生咩事！  

男朋友會做嘅嘢， Chris都差唔多做足晒，一上到車又送玫瑰花又送朱古力，跟住就同小詠講：「你唔好誤會啊，我知你有男朋友㗎，我冇其他意思，純粹係朋友第一次出去食飯，唔好意思兩手空空！」呢啲咁假嘅說話同藉口，唔知點解就係有女受！  

小詠今晚著咗條藍色牛仔短裙黃色短袖碎花T恤 扎咗頭髮，再加上一對綁帶涼鞋，將佢精緻嘅五官同修長雙腿完全襯托出嚟！「我哋今晚食牛扒好唔好？」「你話事啦！我咩都食嘅！」Chris於開車去咗舊城區一間老牌扒房，當然佢早就訂咗一間獨立貴賓房，呢間扒房我同小詠住咗響度咁耐都未聽過，都唔知Chris點會搵到！ 

Chris啱啱過咗21歲，可以叫酒，佢開咗支紅酒，就問小詠：「你飲唔飲呀？」「我唔夠21喎！」「酒係我叫，響Private dining room，冇人理邊個飲，你唔好飲醉就冇事嘅！」「咁我飲少少啦！」  

呢一餐飯食咗足足三個鐘有多，成支紅酒飲哂！小詠雖然話飲少少，最後都係飲咗差唔多兩杯（一支紅酒等如四杯半）。埋單嘅時候Chris仲好清醒，跟本冇事，不過小詠就已經面紅半醉！