一個香港留學生在美國的生活: 買樓

往後嘅日子響Chatroom再冇試過Rebecca兩姊妹咁正嘅女，最多都係大家對住個Mon打下飛機！想約見面就更加之困難。轉眼已經十一月，再過多兩個禮拜就係Thanksgiving。往年呢啲假期都會同小詠諗下去邊度玩，今年當然唔會啦！以我所知，呢個學期除咗我見過條鬼仔之外，仲冇幾個男仔溝緊佢，我已經冇理咁多，呢啲八卦消息都係Aaron嗰度八返嚟！ 

Aaron呢一日又走咗嚟我屋企「Thanksgiving Week有冇plan？」之前有段時間佢姨媽返咗香港，間屋得佢一個人，日日帶女返屋企，最近佢姨媽返咗嚟，又開始日日響我屋企浦！「冇呀！你唔洗去LA陪Lisa咩？」「 

去呀！見你一個人咪睇下你要唔要一齊去囉！」「唔啦！做電燈膽咩！我可能出三藩市，Joe話有個新樓盤落成，叫我去睇下。」「無啦啦做乜睇樓？」「當投資又是好自住又好，反正畢業之後打算搬去三藩市住。」「你唔係未有身份咩？」「Joe話佢老豆公司可以幫我辦到綠卡，咁我咪交畀佢囉，我唔理啦！」「我禮拜五一放學就開車落去，咁放完假先見！」  

放假前嗰幾日不停忙住做Project同考Mid-term，基本上除咗屋企同圖書館之外，乜地方都冇去，忙到禮拜五Deadline交埋份International Banking，終於可以鬆一口氣，下晝返到屋企執幾件衫就開車去三藩市。  

自從Joe結咗婚之後，佢同Joyce就搬咗去Los Alto同佢阿爸阿媽一齊住，話方便照顧Joyce喎，咁佢本來住開Berkeley間Condo就丟空咗，而我就耐唔中會去住一兩晚順便幫佢睇下間屋收下信咁，咁呢個Thanksgiving長假都唔例外，到咗Joe屋企休息咗一陣，夜晚就約咗小玲同阿漢食飯。  



自從Napa Trip之後，我都係第一次同佢地見面，本來打算約Amy，可惜Amy已經約好同男朋友去Oregon Road Trip。Amy同小玲一直有見面聯絡，Amy同我提過小玲打算畢業後會搬去自己一個人住回復單身，阿漢年尾就畢業，比小玲早一個學期，佢哋好似已經同意畢業後就會分開，不過我今次見面好似以前一樣，唔似打算分手，阿漢：「阿偉你成個禮拜響三藩市有乜嘢做？」「出嚟幫Joe睇下間屋，順便去睇下China Basin個新樓盤。」「你打算買屋？China Basin好似只有Condo喎！」「係呀，諗住買個兩房先，投資又好，畢業搬嚟三藩市住又得！」「我都有興趣喎！反正冇嘢做，你介唔介意我地一齊？」「我冇所謂，我聽日十一點Appointment。」小玲「我唔去啦，你地兩個去睇啦！我返學校仲有嘢做。」  

禮拜六一早約咗阿漢響楝新起嘅Condo大堂等，大廈仲裝修緊，只有幾個示範單位可以參觀，大堂就改成Sales office。Joe嘅阿爸近十年有做地產投資，行內都識唔少人，呢個樓盤嘅發展商就係佢地識嘅朋友，我去到搵到其中一個Sales Manager「哦！你就係Joe嘅同學！等我介紹啦！呢度有一房兩房單位，頂層有兩個單位係四房Penthouse，我地睇一房先？」「唔洗啦，一房太細，睇兩房啦！」China Basin位於三藩市東邊近Bay bridge入口，本來係工業區同碼頭，後來重新填海重建，變成今日嘅新區，附近都係大大小小不同建築地盤同新樓，仲有個啱啱起好嘅Baseball Park，係Home of San Francisco Giants，呢區買物業，發展潛力無限。  

參觀完三個分別面響唔同方向嘅兩房單位，我決定落訂購入一個近頂層大廳望向東北方，可以睇到大橋同Baseball Park。至於阿漢就睇唔啱，「我其實都係睇下先，畢業要先搵工再搵屋，如果返工返South Bay，買咗三藩市咪大鑊！」辦好手續，簽完合二約同交低支票，我同阿漢準備離開，呢個時候阿漢「咦！佢都嚟睇樓？」