一個香港留學生在美國的生活: Heather

「咦！點解有其他人睇我嗰單位？我已經買咗落咗訂！」Heather有啲唔高興咁問佢個Sales！典型港女Attitude！我於是轉身行過去打招呼「Hello Heather，你記唔記得我？我係阿漢朋友，前兩日響售樓處見過面，我叫阿偉，我買咗你樓下單位。」「哦！我記得！點解你會嚟睇我單位嘅？」「我其實過嚟辨埋啲手續準備裝修，見有時間咪上嚟睇下其他單位囉！你唔介意吖嘛？」「唔介意，我都係今日先簽埋張約，依家睇下點裝修！」「哦！我都要搵人裝修，約咗下個禮拜先傾細節！」「你有時間可以同我地一齊睇下，我都係第一次攪裝修，大家交換下意見！」  

Heather雖然港女，不過傾落又唔係太串，今日陪佢嚟嘅仲有個architect同general contractor，響美國起屋設計同裝修都分開唔同人做。Heather對裝修要求十分之高，我跟住佢地一邊行一邊聽，越聽越心驚，由選料選傢俬設計裝修，全部都用名牌高級貨，傢俬全部歐洲入口，我嗰兩房單位Budget大約十五到廿萬，已經非常之貴，而Heather呢個單位起碼百五到兩百萬，真係大富貴！不過聽完佢地嘅設計，都畀我好多靈感同方向，仲學咗唔少野！ 

我一直陪住Heather行哂成個樓盤，有部份設計意念其實我都適用，只不過我唔會用到咁貴咁高檔嘅料！Heather同佢地傾完大至上嘅意向，就要等個architect劃圖入紙City攞裝修permit。前前後後起碼六到八個禮拜先可以開工裝修，裝修又最少四至六個月，所以最快要下年年中先可以入伙！  

睇完樓已經中午差唔多十二點，我打算一個人去Union Square逛逛順便食個晏，Heather：「你跟住有乜嘢做？你唔洗返工咩？」「我仲係學生，S大最後一年，呢個禮拜放Thanksgiving，所以出嚟睇吓屋，準備畢咗業搬出嚟住！」「嘩！仲讀緊書真幸福！我下晝仲要返工呀！咁你搵到人做裝修未？」「我已經有人幫手裝修，我朋友屋企做地產發展，有自己一隊人，所以我唔洗煩！」我指嘅朋友就係Joe。講講下我地已經行咗去大堂，Heather：「我哋第日都係鄰居，咁有機會再見！我叫車先！仲要趕返工！」「你冇揸車？」「今日冇，Downtown泊車又貴又難搵位，放工仲要大塞車！搭Bart方便好多，第日搬咗嚟呢度行路都係廿分鐘！」「咁你響邊度返工？我可以車你！我本來打算去Union Square買下嘢食個晏！」「Errr，如果順路就麻煩你啦！呢個時候Call Taxi都唔容易！」「我又放假冇嘢做！順路姐！咁你洗唔洗食埋晏先？我本來打算食完晏先去買嘢！」禮貌上我點都要問下嘅！估唔到Heather竟然主動約食飯「我攞咗半日假，兩點先要返到公司，不如食飯先？有冇提議？」「你Office響邊？」「Embarcadero and Market。」「咁就去Embarcadero Center，附近有好多餐廳。」  

泊好車，我同Heather去咗Embarcadero Center後面橫街一間意大利餐廳，坐低點咗菜，等食嘅口時候我就問「係呢，點解今日得你一個？你Fiancé呢？」「Steward？佢咁忙邊有時間攪裝修吖！佢好多時都唔響Bay Area。」  「一個人攪裝修唔容易！」「我淨係同師傅講我要求，Stewart埋單！哈哈！」「真幸福！」Heather笑笑口冇口應我！食飯嘅時候仲同佢傾咗好多嘢，知道佢香港移民過嚟讀大學，香港讀九龍塘名女校，大學時本來住East Coast，Grad School過咗嚟三藩市，之後認識咗Stewart。Heather年紀比我大四年，啱啱過咗廿六歲，言談中我感覺到佢知道Stewart係花花公子，至於佢知唔知道Stewart同好多女上床我就唔淸楚，唔知點解我同佢算係第一次見面，但係佢好主動講咁多嘢，所以直覺話我知佢同Stewart一齊其實有好多問題。  



食完飯我地就分開各有各離開，佢返工我去買嘢，我地連交換電話聯絡方式都冇。而我就一直留響三藩市直到過完Thanksgiving 先返入大學城。