一個香港留學生在美國的生活: Cabo（9）

騎駱駝同玩ATV都係Cabo非常熱門嘅活動，如果冇一早買定飛，跟本係玩唔到！兩個活動都係響西邊海灘，坐小型客運巴士大約三十分鐘車程。去到駱駝場九點半，我地用咗大約半個鐘register同safety check，我哋騎嘅係雙峯駱駝，一隻可以騎兩個人，本來我地買咗四人票係可以一人騎一隻，不過始終係第一次騎，Millie有啲怕，所以佢堅持要同我騎同一隻！  

個墨西哥導遊幫忙下，我同Millie幾經辛苦終爬上隻駱駝度，同騎馬一樣，駝峰上係有個saddle可以坐人，Millie坐前面我就坐後面，個導遊就拖住隻駱駝響前面帶路，沿途都係沙灘，不過呢個沙灘係望唔到盡頭嘅，導遊一路行一路介紹Cabo嘅歷史同特色，Cabo San Lucas最早期係屬於Pericu人種原居地，後來直到十六世歐洲人嚟到而成為西班牙人嘅屬地，而Los Cabos譯做英文係The Cape意思。  

騎駱駝其實唔辛苦，駱駝行得又慢又平穩，行響沙上面又冇高低起伏。行咗大概一個鐘左右，我地去到另一個小鎮，其實只係一個休息站，有十間八間屋，有廁所有餐廳，仲有個警崗同救護站。餐廳非常有規模，近沙灘仲有個超大型火爐，上面嘅烤肉香味我哋遠一遠都已經聞到！餐廳供應嘅係地道墨西哥菜，不過味道就比起響加州食過變種美國口味墨西哥餐好得多，價錢平種類多，仲有好多我哋從未見過嘅菜式，飲品主要係鮮果汁同Tequila，中文應該叫做龍舌蘭酒，係墨西哥特產，響美國都非常普遍，好多時落酒吧都會飲到，不過種類同價錢更係冇得同呢度比，成餐飯連酒水加埋都係十二三蚊，呢個價錢響三藩市兩人食個港式茶餐都唔得。  

食完晏，騎返上隻駱駝，沿著啱啱嚟條路行返去，響背囊攞個電話打算打畀Aaron睇吓佢會唔玩ATV，點知佢冇開機，Millie亦搵唔到Doris！冇法啦，唯我哋兩個繼續行程。  

ATV場距離騎駱駝好近，我地係坐當地人用腳踩嘅四輪車，太約十五分鐘就到，ATV即刻係All-terrain Vehicle，一般係雙座位，架車勁大架，單係個轆已經大半個人咁高，今次Millie就要一人一架車去玩，除咗我地，整個場地大約有十架車左右，不過地方非常之空曠，足夠我哋瘋狂飛馳。  



返到酒店差唔多四點，夜晚本來Book咗間餐廳同Aaron兩個食，睇嚟又可能變成我同Millie撐枱腳！「我返房沖個涼換件衫先，今晚去邊度食？」「本來今晚Book咗食扒，Aaron又唔知響邊，不如我同你食？」「反正我都唔知Doris響邊，咁就一齊啦！」「咁我都返Villa休息陣，電話聯絡！」 

響洒店大堂分開各自返房，我返到去Villa仍然冇人，好明顯由今早我離開到依家Aaron都冇返過嚟，於是我攞衫去沖涼，呢個時候電話響「我無家可歸，我攞衫過嚟你度沖涼得唔？」「吓？你開唔到門？」「你估下點解？見到面先講！」Millie收咗線，咁我唯有等佢到先，不過我估應該係Doris返咗，唔通Aaron個死仔都響Millie間房？