一個香港留學生在美國的生活: Club House

搬咗去三藩市之後，我習慣一早去做Gym，依家住嘅Condo Club House有自己嘅Gym，仲有一個小型室內泳池。雖然係同一楝大廈，要去Club House嘅話係要先去樓下大堂轉乘另一部𨋢。  

今日禮拜六，同平時一樣，一早起身食咗少少嘢就去Club house，正當我響樓下大堂等𨋢去Gym嘅時候，意外地見到Steward拖住件手提行李離開，我同佢擦肩而過，由始至終佢都唔知我係邊個，更加唔會知道我認識Heather。講起Steward同Heather，自從上年八月結咗婚到依家，我好少見到佢哋，響地下停車場就成日見到Heather架BMW停響度郁都郁過，記憶中對上一次碰到Heather應該係半年前。 

入到去Gym Room，得我一個人，於是我先去跑廿分鐘Track，跟住做器械，做到差唔多八點半，我準備執嘢返上樓，呢個時候突然有人入嚟，我一望，竟然係Heather！Heather第一眼見到我都有啲突然，跟著就笑一笑「早晨，阿偉。」「早晨呀，估唔到會響呢度碰到你。」「有乜出奇，大家隔離鄰舍。」「係呀，大住咁近，不過都好少碰面。」同我傾咗陣，Heather就去咗跑Track，「你慢慢做，我走先，有機會再約啦！」Heather 背住我揮揮手算係同我講再見。我一個人返上樓沖涼，休息咗一陣，十一點左右準備開車去Japan Town見下個上海妹碰下運氣。  

去到停車場發現Heather架BMW開走咗，我真係好耐冇見過呢架車郁過，而我嘅停車位就響正Heather架車對面。我買呢個Condo係連兩個地下停車位，大學畢業搬咗出三藩市我就Trade-in咗我架揸咗四年嘅CLK，換咗架E-Class，過咗冇耐我又買多架紅色Boxster。今日唔係返工係溝女，我選擇開架Boxster。正當我準備開車，Heather就咁啱返到嚟，Heather泊好車走過嚟主動同我打招呼「又見到你，原來呢架車係你，成日泊響度都唔見你揸？」「Weekend先會揸呢個車多啲，平時多數揸架E。」「哦，原來兩架都係你嘅，我都未坐過Boxster，幾時可以車下我呀？」「哈哈，Anytime，不過我依家有約，下次啦！」「咁好啦，再聯絡。」「好，再約。」跟著我開車直接去Japan Town。  

十二月三藩市天氣唔係天陰就係落雨，我一出車房外邊已經係滂沱大雨，由屋企去Japan Town要穿過Financial District，大雨交通一定塞，好彩禮拜六冇人返工，不過都用咗差不多一倍嘅時間先去到，入去地下停車場泊完車啱啱好十二點。我約咗上海妹響Japan Town正門入口間雪糕舖等，嗰度有幾張枱，仲有個細水池，我去到已經見到有個女仔坐咗響度。