一個香港留學生在美國的生活: 豪客

Personal Shopper服務我聽就聽過，不過就從來未試過，我跟著Heather上咗三樓一個VIP Room，房入面除咗有張大梳化之外，仲有一張放咗水果點心飲品同支Champagne，「阿偉，你隨便招呼自己，如果你有嘢想買，可以同Alice講，我平時買嘢都係搵佢，服務好好㗎！」「你慢慢試衫，我等陣先睇。」過咗冇耐，外邊就有人推咗兩個衣架，大約三十件衫入嚟，呢啲都係予早Heather響雜誌睇到嘅款式，跟著由佢個Personal Shopper幫佢搵好晒一次過畀Heather試，Heather試衫嘅時候好多時都會問我意見，包括手飾同鞋嘅配襯，睇住Heather試衫其實都係一種享受，Heather係嗰種冷豔高傲型，身材窈窕，嗰個樣都幾似李嘉欣，正當我望住佢諗到入晒神嘅時候，「喂，呢件得唔得，嗰胸會唔會開得太低？」Heather著咗件黑色露膊低V領長裙晚禮服，四寸黑色高跟鞋，胸口有串同對耳環一套嘅鑽石頸錬，襯托住一對唔算大不過十分堅挺雪白胸部，睇到我呆晒，連細佬都有少少反應！「睇夠未？你畀下意見啦？我下個月有個event要去，呢套係戰衣嚟㗎！」「嘩，你行Oscar咩，著到咁？」「你唔好理，套衫得唔得？」我舉起大拇指，「得！你行兩步轉個圈睇下？」Heather好聽話咁照做，嗰一刻真係有啲似Oscar啲明星行紅地毯Feel，雍容華貴大方得體，「真係好靚，又有氣質。」「你係讚我定係讚件衫呀？」「更係讚你啦，人著衫，衫襯人，人唔靚，件衫點靚都冇用。」聽到我咁講，Heather只係笑一笑，跟著又再繼續試衫。  

差不多用咗兩個幾鐘，試咗三四十件衫鞋同手袋，最後Heather選咗啱啱嗰件晚禮服同埋幾套返工著嘅套裝，兩個手袋同三對鞋，埋單竟然要兩萬五！「我買完啦！你要唔要睇吓男裝？」「我平時都響最底層Shopping，反正有時間，我落去睇睇。」「咁你要唔要Alice幫你？」「唔使啦，就算我買都係買一千幾百，我自己搞掂。」  

去到地牢男裝部，其實我都係隨便逛逛，冇乜特別嘢想買，間中都有一兩歌Sales同我打招呼，雖然我冇Heather嗰種專人服務，不過我都有一兩個相熟嘅Sales。「點解你睇親都係啲咁casual嘅衫嘅？唔見你睇吓西裝？」Heather有啲好奇咁問，「我啲西裝全部都係香港一個老師傅做，價錢比起美國平咗一大半，上海師傅手工又好，價錢又平，冇乜理由我響呢度買㗎 ！」「咁又係，不過如果你想響度做西裝，我都可以介紹呢度嘅師傅俾你，貴咗肯定貴過香港，你有需要先同我講啦！」  

我行咗兩個圈，最後買咗一條呔同兩件T恤，加埋都唔使五百，到畀錢嘅時候，Heather同個Sales講「入埋我Account，當係我多謝你幫我整好隻𥦬。」「點得呀，我自己畀啦！」「我話得就得啦！」「咁我請食飯啦！」「我一早話咗我請。」結果無啦啦Heather就送咗條呔同T恤畀我，感覺有啲怪怪咁，不過我都唔係啲婆婆媽媽嘅人，一於照單全收！