一個香港留學生在美國的生活: 買地

2002年係Bay Area地產泡沫爆破嘅一年，對於好多人嚟講可能間樓唔見咗一半，不過對我同Joe嚟講就係入市嘅好時機。呢間舊屋位於Stanford University傍邊住宅區，塊地其實只有二萬尺多啲，即係大約Half Arca ，話大唔算大，不過亦唔算細，呢度啲屋平均都係Quarter Arca Lot。  

聖誕節前幾日好多人都放假，不過最後我都搵到個經紀出嚟睇樓，間屋原主人係個老太太，已經住響呢間屋差唔多半個世紀，早幾個月過咗身，由於遺產稅問題，加上間屋太舊冇仔女肯接手打理，於是決定放售。呢間一層高平房大約三千尺，後園佔地超過一萬尺，全都雜草叢生，仲有幾棵四五層樓高嘅大杉樹，賣家本來打算過埋新年先放Listing，不過個經紀同Joe相熟，畀我地先睇。間屋叫價二百九十八萬，最後我用二百八十萬買咗落嚟，間屋其實非常之老舊，如果裝修翻新起碼要用四五十萬，不過我打算拆咗間屋重建，呢二百八十萬其實係買地，因為個Location真係好正！傾好價錢就可以close escrow，由於我一炮過cash buy，唔洗經銀行，所以快好多，廿三號禮拜一，正式完成買賣交收，由於廿四號開始係假期，我要過咗年等埋Joe返嚟先決定點樣處理。 

離開個地產經紀Office，正準備返屋企，Heather電話打嚟「恭喜喎，買到正嘢！」「哈哈，多謝，運氣！咁啱碰到姐！Joe話呢啲機會可遇不可求！」「咁你唔好唔記得聽日餐飯喎，我等食㗎！」「知道啦！等陣去買餸！」「咁早買？」「聽日廿四號，好多supermarket收早㗎！」「咁聽日見啦！」  

屋企附近已經有間好大嘅Safeway，大部分材料都可以響度買到，我打算煮一個湯一個沙律加舊燒牛肉，甜品食雪糕就算，好快我就買齊哂所有要用嘅食材，聽日就可以開工煮。  

返到屋企將嘢放哂入雪櫃，再𢴇下間屋，睇吓鐘已經差唔多六點，今晚仲要跑兩場Christmas Party，自從同Joe拍擋，大部分對外同人打交道，交際應酬，都係我一腳踢，有時候我都覺得自己同做鴨冇乜分別，不過慢慢我都習慣咗，今晚第一場係去一個商會嘅Event，之後再去另一間銀行嘅聖誕Party，我沖完涼換返套飲衫出門口，落到去停車場攞車又碰到Heather「嘩！著到咁，約咗女朋友？」「去Event呀！個個男人去呢啲Function都係咁著㗎啦！」「唉！我平時陪Steward都去唔少，又悶又冇隱！我仲以為你會響屋企煮飯仔！」「唔洗急，買好哂嘢，聽日你實有得食！」「咁你慢慢Enjoy你嘅Event，唔好亂識女仔啊！哈哈！」跟著Heather就直接離開返上樓！  



望住離去嘅Heather背影，突然間覺得去呢啲Party係應該有個Partner，孤身隻影咁去好似有啲可憐，不過我本身仲係單身狗一隻，臨時臨急去邊度搵個靚女做Partner？苦笑一下，當然最後都係自己一個人開車赴會啦！