[短篇] 最後留言: 1/

1/

           「依度呀...爺爺...」 細妹把聲係我腦海又再浮現，同樣嘅地方，同樣嘅情景。每一晚當我合埋眼，就會見到我三歲嘅孫女「細妹」，夢見以前同佢去公園玩嘅情景。我抺去額上嘅汗水，抬頭望下嗰一片鑲嵌上點點星光嘅深藍天空，係市區已經消失咗好多年嘅星空。周圍好靜，好似嗰一晚咁靚咁靜，然後...「吼...嗚...」。 突然陣陣原始吼叫打破一切，就好似宜家咁...
 
「晚晚都係咁...」「咁起碼都知佢地大約位置嘅。」「華叔你得唔得架？」𡃁妹問我。我知佢係關心我，但我都忍唔住話佢。「阿叔唔得？阿叔上山捉野豬嗰陣你都未出世呀！」，佢一邊幫我執物資，一邊又問「咁我陪你去啦？」。我望住佢包住繃帶嘅腳話，「跛咗仲去鬼去馬？留係度幫手啦...」。佢望望周圍淨低嘅人，無再講嘢就行開咗。
 
我望住佢嘅背影，依刻我好想見到細妹大個，同佢一樣讀大學... 𡃁妹將一個大麻包袋，同一堆簡陋嘅裝備交咗俾我。佢旁邊撐住拐杖嘅老人家忠伯話「麻包袋入面有個木盒，盒入面就係嗰幾枝疫苗。送到去下一區會有人接應。」我點頭。𡃁妹由裝備中抽出一張殘舊地圖，係我地依區嘅地圖。兩個紅圈之間嘅路線就係我要通過嘅地方。地圖上仲有其他顏色嘅標示，應該係其他人一路傳送時所畫。「仲有枝錄音筆。」「錄音筆？要嚟做乜？」。我望望部機，機身上佈滿花痕同點點乾涸血跡。「係前面幾站送疫苗嘅人留低嘅說話。」我睇住仲有七八成電嘅罕見電器，一邊諗用資源叉電不如用嚟聯絡啦，一邊打開入面嘅錄音。
 
  「今日係三月三號。我地準備出發送疫苗出去…我地研究所就快頂唔住，但係教授佢地…佢地決定留低擋住班感染者…」突然一陣爆炸聲掩蓋一切…睇嚟係三個月前第一批送疫苗嘅人。𡃁妹搶走枝錄音筆，「我講先！」「又關你事？」「忠伯叫我同你一齊去呀！」佢講完就坐埋一邊。「唉，多個人多個照應。」忠伯係我旁邊講。我睇住周圍嘅老弱，同佢講「咁你地自己小心呀。」𡃁妹錄完音，將錄音筆交俾我。我根本唔知屋企人仲係咪到，但…我明點解大家想錄低啲說話。
 




「嗯…我…我叫郭華，以前賣豬肉嘅…估唔到依幾年要劏屍…我唔知你地聽唔聽到，但係…我好想同你地講…對唔住…我…＂」我一路講一路諗起細妹嘅笑聲，佢同佢阿媽細個一樣咁活潑，我啲眼淚都慢慢流咗落嚟。我抹抹面就準備出發。