[短篇] 最後留言: 2.3/

2.3/
////////////////////////
「仲有幾遠呀roy？」「差唔多啦，洪sir出事前係叫我地去大文小學架嘛，係山下面啦……」我地避難所尋晚俾屍群突襲，中學時嘅班主任洪sir搏命推開啲屍，等我地安全走到，佢最後叫我地去大文小學，聽講嗰度規模大啲，大家生存機會都大啲。於是我地十個人踏上我地十個月嚟第七次走佬征途。「唔掂啦，阿ben反曬白眼呀，咁點呀？」扶住ben嘅andy話。karen話「阿ben會唔會……」andy怒吼「你唔係想隊倒冧佢呀？我地F.1識啦…」「但係佢尋晚俾嗰啲嘢咬到呀嘛…」tom咁講。大家都無出聲，因為大家都心知俾屍咬到係無得救，只係個人體質問題，有啲人半個鐘就感染變成喪屍，都有人十日八日後先變。
「唔…唔好…嘈啦…趕去…避難所…有事…就唔…好理我……」打破寂默嘅係ben。千怡行埋去同andy一齊扶起佢，「就快到啦，洪sir之前話疫苗就快有得用，如果有疫苗就有辦法架啦。」。「末日後第二個月已經話做緊疫苗啦，結果呢？就快一年啦…我地等到咩？」betty質疑千怡。「洪sir帶住我地捱過咗三次走難，唔係佢我地會捱到宜家咩？最尋晚都係佢命都犧牲埋先救到我地咋！」我對大家講。眾人慚愧得無再出聲。千怡微笑住向我點頭。
小隊繼續前進，終於見到山坡下嘅學校。但附近突然傳嚟嘈雜人聲，tom大叫「後面有好大班人，有槍架！」我地即刻回頭，andy驚呼「係咪周圍打劫避難所個班呀？」「點睇都唔係普通倖存者啦，走啦！」我地邊講已經邊跑落山坡。但後方人馬向我地掟石仔，並且喝止我地「前面班人企係度！」。我地當然頭也不回，但佢地好快就改用槍，「砰砰」兩下響聲帶走咗betty同另一女仔，我地無時間驚，因為跟住兩發子彈打中咗ben，佢應聲倒地，千怡同andy被拉跌，一齊碌落山。「ben中槍呀！」「千怡！」「andy！」我地嘅呼喊聲此起彼落。隨住槍聲而嚟嘅係令人一樣懼怕嘅野獸叫聲「嗄呀！」，屍群被槍聲引嚟，開始湧現山坡同山坡下嘅路上。我地正正夾係兩方人馬之中。
前方越趨喧鬧，屍群開始向山坡上一湧而上，而後方亦都無一刻停止過向我地槍擊同投擲雜物，不斷有同伴中槍。我慌亂之下腳步一亂就仆低咗而碌落山坡。屍群同班賊正面衝撞之下，槍聲，吼叫聲，廝殺聲充斥住附近地方。我碌到落學校前嘅斜路時，已經滿身痛楚，頭昏腦脹。迷濛間似乎聽到andy把聲，「呀！頂……呀……呀，roy？點呀？」佢把聲向我靠近。我掙扎住想起身，andy爬咗過嚟「點呀？無中槍呀嘛？」我漸漸由矇矓中漸漸回復，睇清楚周圍嘅廝殺現場，整個山坡都係賊同屍，亂作一團，血染山頭，仲有爆曬缸嘅andy。「你睇下自己先啦爆L曬缸啦。」「DIU仲講！千怡唔見咗呀！」我即刻周圍望，其他同伴一個都搵唔到，十個人得返我地兩個落到山。
山坡上嘅賊開始撤退。屍群有啲追擊佢地，有啲享用戰利品，有啲開始落山四散。我地即刻向學校方向走，但我地傷勢都唔輕，逃走速度遠遠比唔上飢餓嘅屍。佢地好快就追上我地，有幾隻手從後抓住andy，幾隻屍向佢噬咬。「andy！」我驚叫。「走…」佢講咗一個字就俾幾隻屍撲倒分食。我衝上去想拉開啲屍，但已經有兩隻屍撳低咗我。「砰！」「啪嘞！」一下槍聲同木板拍斷嘅聲傳嚟。我驚魂未定，只係見到一個拳皇身形嘅男人同兩個後生仔女係我面前。「拳皇」伸手扶我「行唔行到？我地避難所係後面咋！」我腳步虛浮，「我要搵返女朋友同其他同伴先。」但屍群開始向避難所所攻嚟，「你宜家去盞送死咋！」個後生咁講。我拖住傷重嘅身體行前幾步話「咁就由我陪佢地啦。」，講完就跌低咗。「你行都行唔到，點搵呀！」個女仔扶起我。「拳皇」向逼近嘅屍開槍「點都好，無命就乜都唔洗講。阿威！叫大家撤退！」後生仔吹響哨子，佢地廝殺緊嘅同伴向後方學校退去。「拳皇」同個女仔一齊拉我走，我只能望住望住andy條屍越嚟越遠……
////////////////////////