[短篇] 最後留言: 2.54/ END /
2.54/ END /
我撐扶起隊長越過馬路，行上公路。依部份路段係一段架空橋嘅路段，首先係向上嘅斜直路，大約1000米，然後穿過左右兩旁嘅建築物，向右拐係一段天橋上嘅直路，一直伸延到一個分岔路段，匯合主幹道嘅兩線，然後往前不遠往左通往其他地方，往右直去有一小路走出天橋公路，終點運動場就係出口附近。我地緩慢前進，係雜物滿地嘅行車路上行走。天開始光，公路遠處開始傳嚟屍叫。我地係垃圾同雜物間穿行，平安行進至公路拐彎處。依度開始見到有廢車排滿行車道，甚至地上有睡袋同罐頭，似乎曾有人聚居，都有少數屍係地上攤臥。
我地係車同車，喪屍同雜物之間穿行。雖然我地身上有傷，加上只可靜靜通過，免得嘈醒啲屍，令前進速度頗慢，但總算捱過依段直路。我地望到前面無幾遠就係幾條行車線匯合處。「小心。。。依度應該多屍。。。」隊長提醒，我留心注意周圍動靜。我地嚟到交匯處，首先聞到一陣惡臭，倘闊嘅行車道上堆滿各樣車輛，有啲翻倒，有啲撞到扁曬，有啲出緊煙，周圍更加佈滿咗人體殘肢同喪屍遺骸，腐臭味同大小二便嘅氣味形成惡臭。依度嘅環境比我去過嘅人屍戰場更為惡劣。我遊目四顧，見到依然只得少數喪屍係度。隊長嘅目光由周圍環境轉向我，「隊長，唔多妥喎。。。」「快啲過罷啦。。。」。我地前行幾步，後面車道又傳嚟槍擊聲。「係佢地啦。。。」「追。。。」我一望之下，見到嘅係一大隊人馬，應該係追擊而嚟嘅賊，人數比之前多好多，起碼三四十人，帶頭嘅十幾人有槍。我地匿係一架的士後面，破裂嘅車窗更被擊碎，槍擊聲此起彼落，巨響朧罩住我地。我地背靠的士向前爬行。隨住槍聲而起嘅係屍叫同吠聲。「有屍狗呀。。。」我驚道，「唔怪得一路咁少屍啦。。。」隊長左顧右盼。我地啱啱爬過的士，前面架貨van車尾有兩隻屍爬出，我地合力踢開佢地。隊長𡚒力斬向佢地身上，直至吠聲逼近，一隻屍犬撲向我。我捉住佢流口水同血嘅口，向後掉佢去後面車群。前面車道雖然只有少量喪屍，但眼見其中有最少十隻屍犬。
兩方人馬越逼越近，隊長又再拉我避入車堆中。兩隻屍犬首先中槍倒下，剩餘嘅屍犬同喪屍向賊群進攻。我地趁住又一場大廝殺嘅空隙，繼續向前躲避，爬過一架旅遊大巴之後，就見到前面向左轉嘅車道，再遠啲向右轉落去嗰邊，就係我地嘅出口。我地係大巴旁爬起身，就有兩隻屍抓向我，而且佢地身後都有三四隻屍犬衝近。千鈞一髮之下，我只諗到斬兩隻屍嘅手，但我雙臂被抓出幾度深長血痕，仍甩唔到佢地。隊長都揮刀斬向兩屍腰腹，然後𡚒力推撞佢地，一同倒向屍犬。隊長被兩屍抓實，但好彩喪屍轉而噬咬佢地。我趁亂拉起隊長逃離獵食現場，前面車堆中不斷有喪屍走出，但後方槍聲唔容許我地退後。我斬殺一隻屍後，後方屍犬咬住隊長左腳，我地搏命砍佢都唔放口。周圍戰況非常混亂，我同隊長，賊群，喪屍及屍犬互相搏殺，結果係賊人嘅亂槍幫隊長解圍，幾槍打死屍犬。我扶住隊長急步往出口車道，過埋依段路落返地下，然後運動場基地就係街尾。
天橋下嘅街道已有一隊人在守候。「係佢地。。。」隊長向對方揮揮手，天橋下帶頭嘅大叔用望遠鏡望住我地，揮手指示手下迎接我地。「係運動場嘅隊長。。。」我點頭「到啦。。。」對方派出四個隊員向我地跑近，一邊接近我地一邊向我地舉槍大叫「趴低！」。我地應聲向前一撲，佢地就向後方槍擊。賊人同運動場部隊駁火。我同隊長同後方屍犬夾係中間，一前一後艱難地向前爬，但槍林彈雨中兩隻屍犬依然撲咗上嚟，我即刻向佢地踼去，踼開兩隻但繼續有三四隻撲嚟，隊長回望，想過嚟幫我。「繼續行呀隊長。。。」邊講邊踢開一隻喪屍犬，但另外兩隻咬住我雙腳。隊長猶豫，我揮刀斬向腳上嘅兩犬，引得另外嘅屍犬爭食同類。但前方主車道嘅屍群已向依邊湧嚟。我掙扎起身，隊長回頭拉我行。但我地走出幾步，屍犬再次追上咬我隻腳，我見到趕嚟支援嘅四人向屍群射擊，已經離我地唔遠了。我俾屍犬拖落地之前，將隊長向右邊大力一推。我狠狠地將刀插入佢頭上，踢佢向後面俾佢地同類分食。同時我向正前方屍群大叫後，其他屍犬又要咬我，我回頭向左邊車道跑。我回望隊長，見到四人已拉起佢，我向佢點頭後，視線已經俾湧近嘅屍群同屍犬遮蓋。。。
我身後傳嚟隊長嘅大喊「roy！」，隨之而嚟嘅係此起彼落嘅槍聲，同窮追不捨嘅屍吼犬吠。。。
如果我走得甩。。。我想搵返你呀千怡。。。
//////////
「辛苦你，飲啖水先。」我係運動場看台望向門外馬路方向，手仍然震緊。佢地幫我包紮咗手上傷口，但只有佢地嘅隊長敢靠近我，其他人怕我變異個個避開曬。「你身體覺得點？我地有專家，好快可以幫你打疫苗。」「放心。。。我應該未變住嘅。。。」我轉身面向運動場內繁忙安穩嘅基地，球場及草地上整齊排列無數帳篷，看台則劃分為唔同區域，有哨崗有物資區，雖然基地有過千人居住，但絲毫唔覺混亂嘈雜。人們三五成群，有講有笑，氣氛溫暖寧靜，我卻更加覺得寒冷。我嘅同伴係我身後冷冰冰嘅戰場奮勇戰死，我都唔應該屬於依度。。。。
「我想返去。。。」「唔差在少少時間，疫苗都耍試藥。。。你地犠牲好多先嚟到，我諗你啲同伴都想你生存。。。」我諗起所有犠牲嘅同伴，同兩幅截然相反嘅風景，我再次面向戰場嘅方向，陽光照耀四周，新一日又開始, 我嘅眼淚亦唔爭氣咁湧出嚟。。。。
//////////
隊長同一啲受傷嘅運動場成員打咗疫苗後，大部分都無變異。成功送達疫苗嘅消息傳返去各倖存區。半年後，運動場基地專家成功用僅有嘅疫苗研製成更多嘅解藥, 開始發送到各避難所......