女神老細係我女朋友: 第十七章
「得唔得閒？老闆你......想搵我做咩？」
「我想你一陣間同我去食飯見個客。」
「見客？點解要我同老闆你去見？」
「頭先阿Sam交咗份proposal入嚟俾我，佢話大部分都係你做，你最熟，所以我想你一陣見客嗰陣幫我解釋下份proposal。」
阿Sam係我嗰group阿head，我今日都係第一次見佢，搞鑊咁嘅嘢我嘆都有。
梗係我最熟啦，尋日成group都冇人翻，我自己就OT做咗成大半份咁濟。
入嚟嗰陣仲有啲驚，點知原來係叫我去見客。雖然同老細佢食飯都好，但係見客，我真係麻麻，加上尋晚唔係瞓得幾好，本來諗住同細強食個快飯早啲翻屋企沖涼瞓覺，而家俾老細叫到我去同佢見客，都唔知點算。
「老細我一陣間約咗.....」
「尋日已經推咗個客落今晚，本來今日晏晝見，我唔想冇咗個客，會計翻OT錢俾你。」
「係......」
「咁你出翻去執埋啲嘢，陣間出去落住樓下阿全到等我。」
本來仲諗住推咗老細佢，不過咁樣俾佢窒停我，真係唔夠佢講。
我出翻房埋位執嘢，細強又一如既往咁跣張櫈過嚟。
「點啊阿明，老細又搵你咩事啊？又整濕你叫你上佢屋企啊？」細強又扮出啱啱嘅詭笑樣問。
「唉，咪亂講啦，我都想啊，老細佢叫我一陣去同佢見翻尋日推遲咗個客，話份proposal我最熟喎 ，本來仲想推咗佢。」
「哦~都好啊，都叫同老細食飯啊，好過冇啊。」
「唉，唔講啦，老細叫我落樓下等佢喎，落去先啦廢事一陣要老細等我，聽日見啦，拜拜。」
「拜拜~~」
我同細強講講完拜拜之後就落咗樓下，一出𨋢已經見到全叔係出面架車外面食梗煙。
「全叔。」我同全叔揮手打招呼。
「喂明仔，景霖話你會落嚟先，又整濕條褲啊？哈哈。」
「咪講笑啦全叔，係老闆叫我同佢去食飯見客喎。」
「哦，咁咪當同景霖食餐飯囉，有你著數啦靚仔。」真係唔知點解全叔同細強講啲嘢咁似，都唔知係咪兩父子嚟。
老細冇過幾耐就落咗嚟，我地一齊去咗間睇落好高級嘅餐廳，我用盡我差唔多最返一絲精神去同個客講解份proposal，因為真係好攰，其實我都唔知今餐飯價錢幾多，因為係入公司數。
餐飯食完都完都11點咁濟，講到我口水都乾埋，我真係攰到頂唔順。
離開咗餐廳，我諗住自己搵巴士翻屋企，廢事麻煩全叔兜個圈搞到老細夜咗翻屋企。
奇怪嘅係，老細冇打到電話俾全叔，落到去亦都唔見全叔架車。
「全叔呢？」
「阿全佢今晚要陪個女食生日飯，所以嚟唔到。」
「吓咁老闆你咪要自己一個翻屋企？」
老細點點頭。
雖然我真係好攰好攰，攰到想直接係到瞓覺，但係見時間咁夜，e到嚟老細屋企又遠，就算唔係想溝老細，作為一個男人都應該要送一個女仔翻屋企嘅。
「老闆不如......我送你翻屋企？」我膽粗粗咁問老細。