女神老細係我女朋友: 第四十二章

「不如今晚上嚟我到食飯囉？」 景霖一上車我就問佢，我見景霖咁唔開心，就諗住叫景霖上嚟屋企食飯等佢開心啲。


「好啊。」景霖帶住好似有啲苦笑咁嘅表情答我，我隨即what’s app 阿媽。


（我:阿媽，今晚景霖上嚟食飯。）


（阿媽:衰仔唔早啲講，搞到我又覆去買多啲餸。）






（我:今日景霖有啲唔開心。）


（阿媽:你個衰仔做過啲咩嚟啊！）


（我:唔係我啊，翻嚟先講啦。）






收埋部電話之後我就攬住景霖俾佢挨落我到抖陣，全叔都識做咁熄咗個收音機。


「媽，翻嚟啦。」


「伯母，又嚟打攪你啦。」景霖同我一齊入屋打招呼。






「唉呀，都話叫阿媽囉，放低野坐低啦，就食得飯啦，阿仔你陪住景霖先。」講完阿媽就入翻廚房。


「阿媽。」景霖笑住咁樣應翻阿媽，但係我睇得出景霖眼眶好似濕濕地。


「做咩啊？」我帶景霖係梳化，撥一撥佢頭髮。


「冇事啊。。。伯母對我真係好。。。」儘管景霖佢口講冇事，但係我完全聽得出佢唔開心。


「梗係啦，阿媽錫你仲多過錫我，佢啱啱知道你今日上嚟食飯，仲特登落去買多咗餸俾你啊。」






「如果我都可以好似你咁就好啦。。。」景霖開始真係想流眼淚。


「傻妹嚟嘅，我地一早當咗你屋企人咁㗎啦，唔好亂諗嘢啦，嚟啦，埋去食飯啦。」我摸住景霖塊面，用手指輕輕抹乾佢就流出嚟嘅眼淚。


「唉呀景霖，做咩紅紅㗎，衰仔你做過啲咩嚟啊！」阿媽拎餸出嚟嗰陣望到景霖好似想喊咁就問我。


「冇事啊阿媽，啱啱有啲塵入眼咋嗎。」景霖捽一捽眼埋枱食飯。


成餐飯景霖同阿媽都好似個女同阿媽傾計咁樣。其實我雖然冇乜點見過伯母，但係就景霖同我講嘅嘢，佢自從世伯去咗之後都冇一個母親咁嘅形象係佢身邊，而伯母又好似對佢好嚴咁，一翻屋企又係傾景霖公司嘅事，我估景霖其實一直都好想搞翻好啲關係，有翻個媽咪，e個我諗甚至我做男朋友嘅都俾唔到，而家見到阿媽咁樣錫景霖，我諗或多或少都幫到景霖一直想要阿媽嘅心情。