「起身啦~尷尬囉~再唔起身就....」

可能太攰啦,完全冇意欲申手禁息個鬧鐘

我望一望我隻手,咦?! 景霖呢!!!

「呀!」廚房傳黎慘叫聲同埋一陣燶味

我9秒9沖去廚房,見到景霖左手揸住鑊鏟,右腳踩住垃圾桶



我見到咁既情境,呆撚咗

「咦,起身啦,你乖乖地坐好,好快有得食」景霖擰轉身繼續整

原來佢想將條腸仔dum落垃圾桶,我即刻沖到佢背後,搶走鑊鏟上面目全非既腸仔

「哇,好好味呀,你做咩dum」心諗:只係有少少苦啫

「係咩,口花花啦你,去刷牙洗面啦」景霖笑住咁講



梳洗完,我就忐忑咁坐低等食野

「all day breakfast,請問邊位架」景霖攞住兩碟野出黎

「靚女!呢到呀,呢到呀」景霖放低早餐之後

我一手拉景霖坐上我大髀,一齊食

「呀!試下,好唔好食」景霖把條腸仔擺落口遞比我



「嗯,好食呀」我真係覺得自己影帝上身

「真係架?我尋日見你都係上網學煮野食,咁咪照樣上網學囉」

雖然條腸仔係燶既,而炒蛋有蛋殼,但係景霖平時連菜都唔識洗,今日居然為咗我下廚

「多謝你呀景霖」我眼濕濕咁樣講

「傻瓜,快啲食啦,轉頭我地仲要返公司呀」

食完之後,我地坐全叔車番公司

「到公司啦,老闆!明仔」

番公司之後,景霖叫大家去會議室回報進度



「幾日後商場就開幕啦,大家手頭上既野做成點?」景霖問

「老細,我地商場同餐廳佢地已經傾好合約啦,等妳簽埋名佢地就可以入去執舖」細強答

「我手頭上個幾間美國潮流品牌都應承咗進駐商場,都係等老細妳簽名就隨時可以運作啦」Ada答

「good,今次大家都做得到好好,係呢度真係好多謝大家咁盡心盡力幫公司度過難關」景霖講

「咁不如老細請食個Lunch啦,橫掂大家呢幾日咁忙,老細請食餐好架啦」我向住景霖瘋狂打眼色

「咁好啦,張志明你搞掂佢啦」

「好野」一眾同事都係度歡呼



食完Lunch後

我繼續係我個位做野,而景霖係CEO房到處理文件

「老細」 我敲門入去

「做咩呀景霖,有野煩緊?」我見到景霖皺晒眉頭諗緊野

「頭先唔該你呀....hehe。係呀,我有樣野覺得好奇怪,點解Ada有能力搞得掂幾個美國大品牌公司嘅?」景霖有啲疑惑咁問

「咁話曬Ada係美國都跟咗你阿媽咁多年,佢點都有啲辦法嘅。老細~不如我地去係商場開幕之後去巡視下呀,順便可以拍下拖」我雙眼發晒光咁望住景霖等佢既回復

「好呀」景霖好似細佬女咁樣覆我

嗯~我都諗到佢想同我去行下



係預備商場開幕前呢段時間,係生活上面,我同景霖每一朝起身,第一眼見到既都係對方,一齊收工之後都係返屋企食飯,攬住瞓覺。而係工作上,我負責商場開幕既野,景霖負責文件上既野,商場總算有驚無險咁成功開幕,我感覺到好似離目標越黎越近了