你是一名在戰場上的無名士兵: 第8章 - 4
雪倫甚麼都沒有說，把頭靠在你背後。你看着前方，希望回去後處罰不會太嚴重。
你再看到湖，「係湖啊！」雪倫說。你望向右邊，「好靚，不過我哋仲有冇機會見到？」你說。「...」雪倫沉默了數秒，「我信我哋最後都會冇事。」雪倫說。「最好嘅結果當然係咁，但現實通常都唔係最好。」
「唔係最好啫，盡量向好嗰方面去咪得囉？」「問題就出喺好嘅結局唔夠完美...」你流下眼淚。你為了不讓雪倫看見這個樣子，繼續望向前方。「我哋喺埋一齊就得㗎喇。」雪倫說。「妳啱啱先畀人捉完，唔驚㗎咩？」你的聲音變得沙啞，眼淚也流得更多。
「與其擔心壞嘅嘢出現咗之後要點處理，唔係應該將心放喺令好嘅嘢出現咩？」雪倫說。「個湖真係好靚，如果有機會我哋一定要再嚟。」雪倫說。「嗯。」你非常忐忑，不知如何是好，一方面是怕失去身邊的人，一方面是對未來的盼望，不管是哪方面，都令你的眼淚流得更快。
「你咁大個人仲喺度喊咩？過去咗嘅嘢就過去咗，我哋應該向前望。」「但係...」「唔係話要當過去嘅嘢冇發生過，而係利用呢啲經歷嚟令未來變得更好。」
「唔好喊啦，我喺度。」「.............」你想把時間停留在這一刻，這樣就不用去處理那些公務，上戰場，擔心身邊的隊友。在這永恆的道路和她在一起。
「我都睇到你啲眼淚滴喺地下喇。」「吓？」你轉頭。「講笑啫，咁樣邊有可能睇到？」雪倫說。「快啲另返去，邊有人騎馬唔睇前面。」「係...係。」
雖然現在有很多讓你很困惑的地方，但只要一個一個地解決，終有一日可以全部解決，先從最近的事物入手吧。
你離開湖，進入兩側是森林的道路。「啱啱啲風吹散晒我啲頭髮。」雪倫說。「佢哋捉咗妳，有冇對妳做啲咩？」你問。「冇，佢哋淨係話要搵我嗰陣就會同我講。」「我哋估到佢係點入嚟，咁佢點出去？」「你有冇睇清楚格利得林係點出去？」
「佢喺城門出咗去。但係，唔代表佢冇派人去整路。」「整路？」「唔可以排除城牆附近有咩通道可以入去城入面。」「條路應該一早就喺度，格利得林係派人開返條路。」「原來係咁，咁所有嘢都講得通喇。」
你看雪倫衣冠整潔，就很好奇。「睇嚟佢係知道如果佢哋對妳做咗啲咩嘅話我一定唔會放過佢哋。」「咁樣嘢又講唔成，你分分鐘又可能會死，我都睇唔到咁樣做對佢哋有咩好處。」
「不如你返到去之前諗點同隊長解釋先。」「見步行步啦。」「你唔驚佢送你去坐咩？」「講事實有好多種方法，就算妳講啲唔講啲，但妳講嘅全部係事實，其他人都冇辦法話妳講大話。」「真係有咁易？」「呢啲就睇妳信唔信，如果人哋醒嘅咪知，蠢嘅咪唔知，係運氣嘅問題，睇妳肯唔肯搏，不過有啲緊要關頭就唔好咁做。」
「咁你陣間做唔做？」「咳咳...都係嗰句，見步行步啦。」你已經看見在遠方的城，而且有很多的火光在照亮城前的路。「我大鑊喇。」「你救咗我，應該唔會罰咁重嘅。」「希望係咁啦。」
「做咩啊？」雪倫說。當你們走過由數十名士兵照亮的城門通道時，「佢哋返嚟喇！」一位守門的士兵說。
「太好喇！」羅傑斯隊長從城內的人羣中衝了出來。「巴奇副隊長，雪倫小姐！你哋可以返嚟真係太好喇！」羅傑斯隊長說。「我見到你哋唔見咗嗰陣真係驚到個心離一離。」羅傑斯隊長說。
「你應該搵我傾下先。」羅傑斯隊長說。「係囉，你如果要去救人，應該搵我借啲嘢先去。」海迪路絲說。
「總之，返到嚟就得啦。」尼克說。「係啊，頭先真係好驚險。」你說。「你去救雪倫小姐嗰陣發生咗咩事？」羅傑斯隊長問。「係咁嘅......」你將拯救雪倫的經過，和格利得林的對話經過全部說出來。
「原來係咁......」隊長沉默了一會兒，彷彿在思考着甚麼。「咁我哋聽日先討論啦，你哋一定好攰。」羅傑斯隊長說。「好，咁我哋返去先喇。」你和雪倫下馬。
你和雪倫走在通往兵營和房屋的路上，「啫係瞓完就大鑊。」你說。「哈哈，唔一定嘅。」雪倫笑了幾下。
「咁...聽日見。」雪倫走向房屋。「嗯。」你轉左走向兵營。
當你在兵營區走動時，有一個拿着火把的士兵看見你，「佢返咗嚟喇！」然後有數十個人衝出來，「做乜嘢......」他們把你舉起，「歡迎副隊長返嚟！」他們把你拋起，你掉下來後又再拋起，「好！雖然我都好開心，但我今日好攰，不如聽日先慶祝？」「哦哦哦！！！！！」士兵們把你放下來。
「副隊長，我哋好擔心你。」「如果你死咗，我哋都唔知點算好。」「你今日已經係第二次失蹤之後又返嚟。」「你喺敵人座城入面做咗啲咩？」「居然可以一個人潛入去仲可以無事返返嚟，不愧係副隊長！」士兵們對你展露出不同的想法，你確實感到對他們有點不負責任，「各位，好多謝你哋，有乜嘢，我哋聽日去飲再講。」「好嘢！！！！」士兵們回到各自的帳幕，有些則繼續戒備。
你回到兵營，看見尼克在磨亮自己的劍。「尼克。」你說。「做咩？」尼克說。「多謝你救咗我。」你說。「又唔使咁講，打仗呢啲嘢可能下次就係到你救返我。」尼克說。
你看着尼克在黑夜中稍有褪色的金髮，「係喇巴奇。」「係？」「你仲記唔記得我哋第一次上戰場嗰件事？」「可唔可以唔好講。」「我係想講，如果冇埋你，我應該點算好？」
你一言不發，「我哋咁辛苦撐到嚟依度，希望你可以同我一齊頭到最後。」「你唔怪我？」「點解我要怪你？怪你喺一班野蠻人手上救咗一個女人？定係怪你唔理命令走咗出去？」「應該係第二樣同第三樣。」
「聽我講，雖然你應該明過我，有時候有啲嘢你一定要做，唔好因為人哋叫你唔好就唔做。」「你知士兵唔應該帶住任何個人感情㗎呵。」「咁你啱啱有冇？」「我冇諗咁多。」「咁你啫係有。」
「我明，喺嗰次之後...」「我哋唔應該辜負佢哋嘅心意，你嗰陣做唔到嘅嘢你依家做到，咁就可以。」「但......」「喺打仗，你每樣嘢都跟規矩做會死得好快，一定要識變通。當然，有時都要識變通咁唔識變通。」
你努力不去回想腦中不斷溢出的回憶，「得閒飲茶。」你說。「哈，你真係要用呢句嚟結束呢場對話。」尼克看起來不屑地轉過身躺在地上。
那一天發生的事，你至今也不能忘記，不過留待之後再說吧。
你躺在地上，怎樣也睡不着，決定去找海迪路絲。她和護衛的房間在兵營區的另一邊，和雪倫的位置不同。你走在只有少量火光的街道上，彷彿拖着身體般。你進入肉紅色外牆的房屋，走上樓梯，海迪路絲的門外，敲了五下門。「咩事？」海迪路絲說。「係咁嘅，我有啲嘢想同你講。」你說。
你進入海迪路絲的房間，發現桌上佈滿了類似設計圖的東西，旁邊還有一大堆製作材料，整個房間看起來有點混亂。
「你想搵我傾咩？」「你最近點啊？」你問。「冇啊，整下嘢咁囉。」海迪路絲說。「我最近整咗樣嘢。」海迪路絲說。
你看見海迪路絲拿出一個小瓶子。「咩嚟㗎？」你問。「依個係我上次整緊嘅嗰個「開朗藥水。」」海迪路絲說。
「你上次搞錯咗嗰個嘢？」你問。「係啊，上次搞到你咁真係唔好意思。」海迪路絲說。
「唔緊要。」你說。「啊......哈哈......哈哈......」你看海迪路絲的臉好像很紅。
你摸了摸海迪路絲的頭。「啊......啊......好舒服啊......」海迪路絲的臉變得更紅了。
你又摸了海迪路絲的頭。「啊.......好正啊.......可唔可以再嚟多次？」海迪路絲依靠在你的身上，你感覺到海迪路絲身體的冰冷。
你又再摸了海迪路絲的頭。「咕......咕......」海迪路絲睡着了。你把海迪路絲抱到床上，便離開了房間。
你發現已夜深了，於是你回到兵營睡覺。
「喀喀喀！」你聽見公雞啼叫的聲音，於是你馬上起來。
在你對面的尼克早已出去了，你在外面聽見吵鬧的聲音，出去後看見士兵們正在拿着磚頭，好像在弄什麼。
你決定去找羅傑斯隊長。你跑到兵營，誰不知你一個人都看不見。「隊長？隊長？」你大叫。
「你好啊，劉巴奇先生。」你聽見一把很熟悉的聲音。「格利得林？」你說。「冇錯，正是在下。你以為我真係會咁容易畀你走咩？」格利得林說。