你是一名在戰場上的無名士兵: 第9章 - 1
格利得林和數十名敵方士兵站在你面前。「雖然我都估到......咁你想點？」你舉高雙手。「同我單挑！」格利得林說。「咩話？你知我.....一定.....唔夠....你打。」你斷斷續續地說。
對方是有十幾年經驗的老兵，你只是一個數個月前才入伍的新兵。你的身體開始顫抖。「你尋晚衝入我座城殺我啲人嗰陣唔係好英勇㗎咩？點解依家好似隻老鼠係咁震？」格利得林用威脅的語氣說。
「今次大鑊喇，要死喇，要死喇......」你的身體震得更快。「點解你今日同尋日完全唔同？唔通你嗰個英勇嘅皮底下其實只係一隻蟲仔？」「嗱，如果你唔想打嘅話，得，你啲同伴全部都會死。」格利得林說。
「！」你聽到這句說話後，心中充滿了掙扎，「正合我意。」你低下頭細聲說並露出一個奸詐的微笑。你還是決定要和格利得林決一死戰。
「好！我同你單挑。」你面對着格利得林說。「啱啱明明咁驚，點解依家又敢咁做？睇嚟你好注重你啲同伴。」格利得林說。「人冇啲嘢去激發係好難做嘢嘅，咁規則係點？」你說。「好簡單。邊個死邊個就輸。」格利得林說。「司令！使唔使玩咁大啊？」一名敵方士兵說。
「唔使驚，我好快就會打低呢個廢柴，除非.......」格利得林說。「咩啊？司令？」剛剛那位敵方士兵說。
「你哋好快就會知㗎嘞。」格利得林說。「你唔好無視我好啵！你到底喺度想做啲咩？」你說。「呢啲嘢唔關你事。呢場決鬥有三條規則。一，兩個人都要用盡全力。二，直到某一方死先會完。三，你剩係得一把劍可以用，把劍冇咗，你可以用拳頭打。」格利得林說。
「好！我哋不如快啲開始啦。」你說。「雪倫，海迪路絲，尼克，羅傑斯隊長，大隻佬，你哋喺邊度？唔該唔好有事啊......」你抱着緊張的心情準備決鬥，同時也擔心自己的伙伴。
「你哋！圍個圈！」格利得林命令士兵。
士兵圍成一個圈圈，你和格利得林在圓圈兩側。「如果佢哋想殺我嘅話，就咁衝出嚟咪得，點解要咁做？」你拔出劍面向格利得林。「三！二！一！」士兵們倒數。你擺出戰鬥姿態，你頭上流着數滴因為緊張而流的汗。「開始！」你和格利得林都在等待對方先出手。
「睇嚟佢係想等我攻先，咁就順佢意啦。」你握着劍朝格利得林衝去。「咁快就出手？睇嚟你真係乜都唔驚。」格利得林說。
你們的劍「哼」一聲地碰撞在一起。「點解，點解要留返得我一個？」你激動地說。你在雙劍的狹縫間看見格利得林在笑。
「我只不過係想試下啲嘢啫。」格利得林說。「無論邊個輸邊個贏都好，我都會放返佢哋，不過要睇下佢哋走唔走得返出嚟先。」格利得林說。
你們分開，「你想試啲乜嘢？」你握着劍向格利得林從右至左劈去。「我想睇下你係咪真係有啲咁嘅能力。」格利得林向後跳避開了你的攻擊。「咩能力？」你刺向格利得林的胸部。
天色突然變黑，「轟！」閃電陪伴着大雨落下。格利得林把你的劍彈開。「大鑊！」「上堂嗰陣冇教你唔好隨便用刺擊咩？」格利得林作勢刺向你。你向右方閃避，趁他的空檔向頭部斬去。「上堂嗰陣冇教你......」你還未說完，格利得林便向右翻滾拉開距離。
「快啲隊死佢啦將軍！」「幫我哋嘅同伴報仇！」士兵們在雨下仍然散發着對你的怨念。「啱啱嗰下算平手啦？」雨水把你的頭髮沾濕。「你的確有啲料到，不過我想睇嘅唔係依樣。」水從格利得林的披風上掉下來。
「咁你想睇咩？」你問。「轟！」又一道落雷劃過天際。「你頂得住我再講啦！」格利得林朝你衝來。他從左邊發動攻擊，你擋下後他又從上方劈下來，你又再擋下。「你啲攻擊方式咁野蠻嘅？」你正擋住格利得林從上方的攻擊。「好過你嗰啲唔軟唔硬嘅攻擊！」格利得林鬆開後又從右方襲來。
你想擋住，但格利得林連你的劍也斬飛了，劍從你的手上脫掉，滑到幾米外的地面上。「到此為止喇...」你歎了一口氣，然後格利得林用劍尖頂住你的喉嚨。「你依個自以為是嘅廢物，依家係咪好驚？」「人終須有一死，你喺度了結我都冇問題。」「你唔驚你啲同伴都死埋咩？」
劍上的水點不斷滑落，「呢個就係重點，因為你根本唔會殺我。」你說。「原因我完全唔知點解，但我知道。」「哼，你尋日去我座城嗰陣用咗一招好強嘅格鬥技，你點做到？」「你問我我都唔知。如果我知，我就唔使同你喺度......」
你突然覺得背後被人射了一箭，「呢個感覺係？」你思考着。「喺度咩啊？」當格利得林嘗試用劍刺穿你的喉嚨時，你馬上向後閃避。「冇錯，畀我睇下啦。」格利得林拋開劍，雙手張開。「呢條友係咪痴咗線？」你覺得格利得林已經瘋了。
「轟！」因為雨的關係，你的裝備變得很重。「好，既然你咁想睇，我就畀你親身感受下啦！」你利用你驚人的跳躍力跳到半空，然後在空中翻了幾個筋斗，你再把身體調整好，然後把全身的力量集中在右腳，向格利利得林踢去。「風雷電！」
「冇錯喇，我要嘅就係依招，嚟啦，將你嘅力量證明畀我睇啦！」格利得林好像完全不怕自己會被踢中。
當你正飛向格利得林時，他拿出一個白色的方塊掉向你。「你到底......」當你踢碎白色方塊時，突然爆出一道紫光，以及震耳欲聾的聲音「咩事啊？哎呀！」你因為被突如其來的紫光所影響，失去平衡而跌在地上。
「成功咗喇。」這是你在昏迷聽到的最後一道聲音。
你醒來後自己在一個有大型鍋爐的城市。這個城市位於一個低谷，應該是在一場大爆炸後重新造成的。等等，這不難道就是？