在一段時間後,「我哋依家去到邊?」你問。「我啱啱睇緊啲資料,發現咗啲好奇怪嘅嘢。」凱倫說。「咩奇怪嘢?」「呢度嘅歷史似乎喺十五年前已經開始改變。」

「妳嘅意思係?」「我哋要捉嘅嗰個人可能留咗喺度十五年。」「咁你哋返去十五年前捉佢咪得囉,點解要留喺改變咗嘅歷史同佢玩?」「時間唔係咁運作㗎,雖然我好想詳細咁解釋,不過我都係講快啲。」

「當有個人喺未來回到過去嗰陣,過去嘅時間流動速度會同未來嘅一樣,啫係有兩個時間一齊郁。所以當有另一個人想返去同一個時間嘅時候,佢只可以返去原本嗰個人已經返咗去而且流動咗嘅同一時間。」

「我唔明,可唔可以再短啲清楚啲?」「啫係有兩嚿木,當你喺中間斬開第一嚿木,你都只可以喺第二嚿木嘅中間斬開,兩嚿木嘅長度永遠都係一樣,斬開咗嘅木攞唔返。」

「咁就算你搵到嗰個人,歷史都係改變咗。」「要影響到咁遠嘅未來係需要時間,我哋只需要喺呢段時間入面返去歷史改變嘅時間點修正返就得。又或者咁講,就算趕唔切我哋都唔會知。」





「如果未來係可以任人穿越時空,你哋點管得咁多?」「時間旅行本身就係禁物,今次係因為我哋手頭上嘅一啲嘢先變成咁,原本根本冇人會咁做,喺知道咗風險之後,我哋已經消滅晒所有時光機,留返兩部以備不時之需。」

「你哋嗰邊又搞緊啲咩?」「我講咗畀你聽,之後我哋都係會消除返你嘅記憶,你聽嚟都冇用。」

你在馬上除了對同伴的擔心外,還有對虛無的不安,如果現在經歷的這一切都將消失,那麼活在這個世界的意義是甚麼?

凱倫好像看到了你的哀愁,「你又唔使咁擔心,嗰個人都知會好大鑊,所以其實歷史係冇乜大改變,呢場戰爭依然會存在。」「妳咁講係咩意思?」「嗰個人應該係取代咗呢個時代某一個人嘅角色,然後跟返佢做過嘅嘢,我估應該係王之類嘅角色。不過你唔使諗依啲,都係嗰句,你打仗就得。」

「你只要記住,呢場戰爭對於你同我都係「依家」,冇人知結果係點,而「依家」係可以決定未來。」凱倫好像刻意收起情緒。





「嗯。」雖然事蹟只是過眼雲煙,但你還是決定帶這艘沒有目的地的船到終點。

「可能到頭來,根本冇需要修正。」凱倫用極度乏味的語氣說。「吓?」你完全不明白她的意思。
「你之後就會明白㗎喇,如果你啱啱有留心聽我講嘢嘅,你應該估到少少。」凱倫繼續用乏味的語氣說。

你們又再騎了一段距離,此時天色已經變得昏暗。

「離返到去仲有幾遠?」你看到馬沒有絲毫的疲倦。「你攰喇?攰嘅可以喺度過夜嘅。」凱倫說。「但係我擔心我啲同伴。」你說。「但係我好攰......啊....」凱倫用右手扶着然後伸了一個懶腰。「原來係妳自己攰,但係我哋仲有幾耐先到?」你問。

「仲要騎一段時間,你唔肚餓㗎咩?過埋食啲嘢先啦。」凱倫跳下馬。「好啊。」你跟着她跳下馬,凱倫拿出剛才的槍,按下扳機後兩隻馬化成綠色光線回到槍內。
已有 0 人追稿