你是一名在戰場上的無名士兵: Real - 第一章 - 3
你用布抹掉汗，並走到練兵場。裏面已經有不少人在對練。你推開柵欄，拿起放在桶裏的木劍，找了一個不會打擾到人的位置開始練習。身為一個士兵，除了要聽從指揮和按戰術行動外，基本的身體質素和戰鬥技巧也是必要的。不論你把自己說成多麼利害，不能在別人面前時刻給他們這種感覺也沒有用，特別是你得到的威名和你的實力不符的時候。
尼克看見獨自一人的你，便走過來。「一個人係好寂寞。」「做乜講啲咁嘅嘢？」「唔通唔係咩？」「依家唔係一個人定兩個人嘅問題。我哋係一隊軍隊，有咩事都係大家一齊頂。」「等陣先，咁你想點？」「講多無謂。練劍啦。」你將劍面向尼克，他也擺好姿勢。
你們練了一會兒，看見正上方的太陽令你們的汗流得更快，便停下來。「都夠啦？」「你啱啱就唔使咁重手嘅。」你回想起剛才尼克那一下差點把你左臂劈斷的斬擊，幸好你閃開才沒有發生意外。「如果喺依度就冇力，出到去係送死。」「我同意，不如去食嘢？」「好。」尼克跟着你放下劍。
練兵場內仍然有部分人在訓練，不過當中已經有人在氣喘吁吁。你和尼克經過受損的街區，看見頹垣敗瓦，甚至有人跪在地上哭泣，你覺得極度不舒服。「慘不忍睹。」「乜要阻止呢啲悲劇再重現，唔係就係我哋喺依度嘅原因咩？」你對衰聲歎氣的尼克說。「咁樣只係將對象轉咗第二啲人，成件事冇變過。」
「咁你有冇方法避免？定你以為大叫「我要和平」，呢個世界就會冇紛爭？我尋日咪試過，一係我哋死，一係佢哋死。」「我明，但係......」「你覺得我哋唔知、佢哋唔知？係人都想世界和平，唔使日日喺度打打殺殺。但問題嘅重點根本唔喺依度，而係人喺唔同方面嘅衝突。可以唔用暴力最好，但當需要嘅時候，仁慈只會導致更多嘅慘況。」
「咁你又以為我唔知？」「真係唔好再玩我，我就嚟分唔清啲人幾時係認真。不過呢樣絕對唔係講玩。」「見到家園被毀，親愛嘅人受傷甚至死，一心淨係想快啲完......」「但要行動先會快啲完。喺度求個天都冇用。」「而挺身而出嘅人要保護其他人。」「保護其他人......」尼克看見你帶有悔意地停下話語，便若有所思地不予回應。
你們吃過午飯後，便回到兵營等待。羅傑斯隊長在訓練時便說了準確的集合時間，所以你只好坐在長椅，數天上飛過的鳥兒來消磨時間。
當時間到，軍隊已經列好陣。「齊人未？唔會有人走咗去啩？」羅傑斯隊長在台上說。「咁好啦。我哋今次嘅戰術就係好似訓練嗰陣咁。如果冇人有問題嘅話，我哋出發。」
小鳥鳴叫的聲音仍在耳邊迴響，然而陽光從左方移到正上，更熾熱地圍着你。軍隊也在幾個有樹遮擋的地方休息了數次，轉眼間軍隊已經來到了城門約三百米外。城牆上一個敵人都沒有，只有城門緊緊關着。
「哇，點解依到水淨鵝飛嘅?」尼克問。「係囉！點解嘅？」眾士兵都覺得可疑。「嗯......我覺得不如再次問下我哋嘅巴奇勇士啦!」騎在馬上的羅傑斯隊長轉過頭，「劉巴奇！劉巴奇！」
「唔係啩......點解乜都關我事嘅......」你在心中又抱怨了一回。「唉，不過為咗升官發財，今次我一定唔可以再怯㗎喇！一於試一次啦！」你開始思考對策。
「巴奇勇士，我地要點做呢?」羅傑斯隊長問。「我好肯定佢而已經有正確答案，如果我咁明顯問，我只會落佢臉，對我都冇好處。」你看着羅傑斯隊長難以察覺，但假裝着疑惑的樣子
「再觀察一陣先啦。」你覺得有點奇怪。「好，冇問題。咁我地再等一陣啦！」隊長說。
你站在陣的第四行，前方的陣以盾兵、步兵隔行排，通常這些位置都是擋箭牌，你得找個方法生存。突然間，你看見旁邊的草叢有點晃動。「邊個！」你對着左邊的草叢大叫。士兵都對着聲音的來源擺出攻擊姿態。「放低武器！巴奇，你入去睇下。」羅傑斯隊長命令你走進那片可能暗藏危機的草堆，其他士兵也放下武器讓路給你。
你注視着草叢，拔出劍並慢慢接近。然後躲在裏面的人突然跑進森林。「喂！咪走！」你馬上追上去。樹木遮擋了光，整片樹林都比較暗，你一邊劈掉雜草一邊追上去。「你再走唔好怪我唔客氣！」你走進一片被樹木圍繞，有少許陽光透過來的草地。那個人在那裏停了下來。「哇！等陣先！」她雙手伸前對着你說。
她穿着厚厚、褐色的連身裙、黑色長褲和像沙子般深厚的皮革靴。給人一種美麗又不可接近的感覺。「喂！你望咩度？」「冇邊度。我先要問妳喺度做咩。」「嗱嗱嗱，等陣先，我喺嚟報料㗎，唔好咁衝動。」「我想問一個咁後生嘅女人喺度做咩？」「後生？我應該大過你。」你看着她苗條的身材，差點流下口水。「唔好講咁多，妳點解會喺度？」「我啱啱咪講咗係畀情報。大人，前面有埋伏，要小心行動。」「咩話?咁有咩方法引佢哋出嚟?」
「要令佢地出嚟，要講暗語㗎。」「咩話?咁個暗語係咩？快啲講!」「個暗語喺「開心笑，開心玩，殺佢老味!」」「有啲咁弱智嘅暗語，唔怪之得佢哋會畀我嚇走...」你無奈地說。此時你看見那位女子原來有一把佩劍。
「妳係旅人？」「如果你想咁叫嘅，都係嘅。」「多謝妳先。係喇， 妳叫咩名啊?」你問那名女子。「我叫雪倫。」你看見雪倫那秀麗的紅髮忍不住......「你有冇興趣同我地一齊攻打呢座城?」你問雪倫。「點解我要同你哋一齊？」「咁唔係點解妳要畀情報我哋？」「我有我自己嘅原因，你理咁多做咩？」「但都係冇辦法，跟規矩，我都係要帶妳返去見我隊長先。」