「點解你哋 -」「唔好意思,原來你哋係佢哋介紹過嚟。」你話語未畢,她便鞠躬表示歉意。她把身子彎得像摺起來一樣,到底為了甚麼而要不斷卑躬屈膝?「又唔使咁,我比較好奇妳揸住嗰枝係咩嚟。」她用稚氣的笑容看着你,「我仲未介紹自己,我叫海迪路絲。」這時你發現她的手臂像是全年無休一樣,雖然幼小,但孔武有力,手掌更是磨損過千百次。

「我係劉巴奇,叫我巴奇得喇。」「巴奇,好高興認識你。」「我都係。」「好粗糙,完全唔似一個咁嘅年紀嘅女仔應有嘅手......」你一邊和她握手一邊感到不可思議。

「我想問下張設計圖上面嘅係乜嚟?」你問海迪路絲。「嗰樣嘢係袐密嚟㗎。」她說。「咁嗰樣嘢同妳啱啱攞出嚟嘅嗰嚿長棍有冇關係?」雪倫說。

「嗰個唔係長條棍嚟㗎!呢個係根據設計圖整出嚟嘅原型,我整出嚟試下效果。」海迪路絲說。

「咁呢樣嘢叫咩名?」你問。「呢個叫火槍,係由遠東傳過嚟嘅火藥再加上鐵球做成嘅,暫時用木嚟做外形。」海迪路絲說。





「咁火槍嘅作用係咩?」雪倫問。「火槍就好似弓箭一樣,不過佢嘅威力比弓箭強最少一千倍。」海迪路絲說。「你哋要唔要試下佢嘅威力?」她一邊用手磨擦火槍一邊發問。

「我想試下。」你說 。「我都想試下。」雪倫表示與你相同的興趣。

「你哋跟我嚟。」海迪路絲把帶你們到一個類似箭靶場的地下室,只是箭靶不是圓形,是由厚布組成的人形板。「個箭靶好似人咁。」你對這個前所未見的目標感到驚奇。

「因為子彈嘅速度比箭快好多,幾乎唔使考慮風速同下降之類嘅問題。你哋邊個想試先?」海迪路絲遞出火槍。

「妳試下先。」你對雪倫說。「好啊。呢個點揸㗎?」雪倫問。「嗱,妳右手攞住後面,左手攞住前面,然後舉喺妳嘅右肩前面。」海迪路絲不斷調整雪倫的姿勢。





雪倫按着海迪路絲的指示,「係咪咁樣?」「係啦,就係咁樣!如果你要開槍嘅話,你㩒下面嗰個制。」「我要點樣控制?」「當你嘅視線同目標、突出嚟嘅準心成一直線,就可以開槍。」

「我係咪應該淨係用一隻眼瞄準?」雪倫的雙眼不斷抖動,似乎找不到方法盯緊箭靶。「係。我漏咗講,唔好意思。」海迪路絲搔了搔後腦勺。

「碰砰!」「哇!」鐵球在人頭旁飛過,在牆上開了個大洞。

「點解我開槍嗰陣會覺得俾人拉咗一下?」雪倫開火的時候差點向後絆倒,幸好她馬上站穩雙腳才沒有讓褲子沾滿塵土。

「我又漏咗講,開槍之前要企穩。」海迪路絲非常尷尬地笑了幾下。





你觀察牆上的洞,「咦?點解依個咁似雜貨店老闆講嘅嗰個?」描述也幾乎一模一樣。

「巴奇?」雪倫在旁邊盯着你,似乎想你察覺自己在發呆。

「到我喇?」你從思考中脫離,接過海迪路絲遞過來的火槍,然後射了一發。

鐵球打中人形板時,人形板整個爆開了。你和雪倫都目瞪口呆。「咁大威力嘅?」「打落真人度會唔會都爆開?」你和雪倫都異口同聲地對火槍的威力發問。

「放心啦,打落真人度個人唔會爆開,啲腸啊,肺啊,飛晒出嚟咁姐。」海迪路絲用說笑的語氣回答。

「槍你地就試完喇,你哋仲有冇乜嘢想做?」她無視你們目瞪口呆的表情,若無其事般繼續她的導覽。

「妳想唔想跟我哋一齊走?」你認為海迪路絲便是你們需要的寶物,也沒有可能讓敵人招攬她。

雖然這樣會又讓一個平民被捲入戰爭,但這是迫不得已的。
已有 0 人追稿