你是一名在戰場上的無名士兵: 第13章 - 6

你覺得即使苟活，人生亦已走到終點。四肢殘廢，變成一個要女人餵自己吃飯的男人不是士兵應面臨的命運。士兵就應該戰死沙場、為國捐軀，現在是甚麼可笑的狀況？

如果上天真的憐憫你，就應該讓你戰死，而不是被古怪雷電貫穿全身，臉完全不受損，這樣完全對不起戰友們。

說起戰友們，他們愈是羨慕你，你就愈覺羞恥。也許求死不能正是上天給你的懲罰，祂要你承受更多痛苦。

「咩大把世界？世界好細㗎咋，行行下又會撞返見過嘅人。」雪倫說。

「我依家見到嘅世界就真係好細。」你反駁。





雪倫發現自己說錯話：「雖然真係冇乜人慘得過你......但你有我喺度！我每日都會陪住你！」她試圖用精力滿滿的姿勢配合觀點，但你無論如何都興奮不起來。

有見及此，她連忙以另一方式進攻：「你一定唔可以放棄！伊莎小姐咪話咗你有機會郁得返囉！好返之後你就可以，你就可以 -」她自知沒有多餘氣力發動攻勢，將主導權讓給你。

她低著頭等你發表心聲，你也不負她所願開口：「雪倫，我最唔甘心就係咁樣離開戰場。好地地俾我電死咪好囉，點解個天要搞到我死唔去不特止，仲要成世瞓喺張床度慘過死？」

雪倫愈聽愈慚愧，繼續低頭聆聽你的吶喊。

「我原本就預咗死，咁樣算點？」





雪倫冒著被你責罵的風險直視你的雙眼：「人哋話大難不死，必有後福。你唔死得 -」

「我好想死，雪倫，可唔可以幫我？」

雪倫含著嘴唇，伸直雙手在雙膝之間紓緩因憤怒而起的壓力低頭：「成日話死死死，啫係你唔想面對一啲嘢啦？你依家全身殘廢就喺度作威作福，以為自己有藉口可以唔面對，你目光可唔可以放遠啲呢？你未死，場仗又未打完，啫係你仲要打落去啦？咁樣叫我幫你解脫啫係你想臨陣走佬啦？劉巴奇，我同你講，你咁樣係最懦夫嘅行為，一日未死都係未死，未死就算斷手斷腳，好返之後就算你落唔到去都要喺依度幫手㗎啦？」

她喘著氣準備應對你的反擊，你原本無力的臉龐為了抵擋迎面飛來的箭也突然緊縮成一團。

「妳講得啱，我係有啲嘢唔想面對，但妳知唔知我依家有幾辛苦？好似俾人割咗個頭落嚟咁冇咗個身，乜都感覺唔到。」





「總之我係唔會殺你！你要搵就搵第二個人！」

「我以為妳好關心我......點知......」

「我幫唔到你，亦都唔會幫你。既然乜都做唔到，咁咪乜都唔好做囉。你依家要休息！」她站起來：「我去問伊莎醫生拎飯，你自己慢慢諗下！」

她「啪」一下關上門氣沖沖地離開。