精神科護士的見聞: 6. 隨時受傷的工作

90年代周星馳電影，有一招功夫令人閒風喪膽，叫做「奪命較剪腳」。
其威力驚人，被制服者無力反擊。
現實中我見過人用一次。
那時我還是學生，和2個丫sir當夜。
當時我地各佔一個地方，各自做自己野。
忽然聽到連續巨響，細聽一下發現那是撞門聲。
我地馬上巡視，發現原來係啤房（注解1）有動靜。
房內病人正不斷踢門，大叫著：「放我走！」
由於加上叔叔只有4個人，所以要十分小心。
只見帶頭人一鼓作氣向前衝，其餘人左右配合，病人好快訓低，只見帶頭人使出「套命較剪腳」，空出雙手同病人講數，病人最終被制服。





其實好多丫sir都有私下學功夫，做呢行真係十分危險。
病人隨時會出手，職員警戒性要十分強。

記得初入職，有次經驗特別深刻。
阿偉係一個70歲退休老伯，有一個女兒，嫁了人搬出去住，家中主要有老婆。
阿偉近幾年性情大變。
小小事都會發脾氣，容易暴躁。
有野諗到就馬上要做，要別人遷就佢一個。
和家人磨擦增加，曾多次出手打老婆。




入院當日因為飯餸唔合意出拳打老婆，
女兒聽到媽媽打電話哭訴，決定報警求助，爸爸被制服後送往急症室，再轉送入來。

最初兩日阿偉情緒不能自控，滿口粗口，每個職員都被問候母親。醫生處方一些情緒穩定藥物，他也不肯服用，認為自己沒有問題。療程完全沒有進展。
有一日，醫生決定採取強硬手段，在護士站同佢講數，以下為對話。
醫生：「做咩唔食藥？」
偉：「點解我要食藥？」
醫生：「因為你情緒暴躁，控制唔到自己。」
偉：「我控制到喎。」
醫生：「你咁都叫控制到，快d食藥，再唔食我就綁住你黎打針。」




偉：「綁咩綁，我係唔食藥咖喇！」
醫生：「唔食藥咪打你針囉。」
偉：「你打我針我咪打你囉！」
說時遲那時快，只見阿偉拎起佢張櫈，打算掃去醫生之際，同事們反應迅速，已經從後制服阿偉。我馬上搶走阿偉手上嘅櫈，不過控制唔好力道，掃向其中一個同事塊面，搞到人地眼鏡都飛走埋。阿偉在一片混亂中被制服。
最後眼鏡被走嘅同事要去急症室睇醫生，仲報埋工傷。
可能當時情況混亂，佢到今日都唔知兇手係我。

過左兩個月，阿偉情況慢慢穩定，安排佢調去其他房。
有次收工見到阿偉同老婆女女在醫院行街（注解2），見到佢地和樂融融，就知道阿偉好番好多。


注解1：啤房係一間房，用作處理極暴力的病人，多數為獨立房，以免病人傷害其他人。
注解2:行街，一些病情穩定嘅病人，醫生會批准佢行街，病人可以在探病時間和家人落樓下行下，去餐廳食嘢都得。