搵cc遇著女同事....返工又比你屌，放工又比你屌: 第二十四章‧你想要一個點樣既家？
前文提要：
Snowy 帶左我去赤柱海旁，並無好撚老土既山盟海誓，反而聽左個一d都唔好笑既笑話。
聽完哩個笑話，我並無因而對佢有咩改觀。因為我從來都無睇唔起佢，又點會無啦啦有改觀呢？就算我有，都只不過係睇唔起佢既半桶水。我地要賣，就連良心都賣埋！點會淨係PTGF?我地都係賣笑既！
或者咁講好過份，但哩個笑貧不笑娼既社會，每個人都係出黎賣。爭在佢賣既係一種體驗，一份生活態度；而我地賣既係靈魂同果樽鹽。
一直以黎，永遠都係賣產品既賤價d 嫁啦！睇下蘋果，人地一舊生活態度就賣正常人四份一個月人工啦！
講完之後，我地沉寂左一段頗長既時間。佢似乎並無打算開口。
我：「每個人都有故事。你有，我有。但最緊要唔好比個故事困住。人地既故事係人地既故事，聽過就算啦，唔需要去經歷。一般去追求人地既經歷都無咩好下場。」
Snowy用一個好有信心既眼神望住我，笑左一笑：「係咩？咩叫好下場？」
我：「咁你想點樣去收場？」
點知Snowy緊緊咁抱住我，輕輕咁鍚左我既臉頰一下：「其實，我最希望哩一場可以直到永遠…可以嗎？」
我：「如果哩一刻就係永遠的話…」
「咕…」去到哩一個咁既時刻，我個肚可能係為左投訴我既重色輕佢而反抗。
由於Snowy成個人攬左落黎，佢應該聽得清楚過我。
佢放一放手，雙眼聚精匯神咁樣望住我個肚，篤左佢兩下，講左一句令我決定收身(皮)既說話：「肚仔~乜你咁百厭ga？我同你爸爸傾緊計喎~拿~鍚啖姐姐，姐姐就同你去食飯好無？」之後佢就詐詐帝帝咁將塊臉貼埋去我個肚果度，「乖啦！」
之後再向上望一望：「仲有你喎，Mar~cus~」
其實我真係好頂唔順d 女玩埋哩d 白痴野。但係，如果對方係一個咁可愛既女仔的話，我又覺得成件事完全係一件藝術…
仲有一件事就係，我…臉紅了…身經百戰的我竟然臉紅了！
我終於明白，d 日本宅點解會成日見到d 卡通會衷心咁發出讚嘆，成日話：「好萌丫！」
去到哩一刻，如果一個廿幾歲既女仔仲可以用「萌」哩個字去形容的話，佢真係好萌丫！
我好唔好意思咁錫左佢一啖。點知…佢竟然咬左我嘴唇一下…雖然唔係大力，不過令我縮左一縮。
心諗：好彩上次你無咁講對小馬…唔係就真係變左東方馬士…
錫完之後，佢竟然講左一句令我差d 跳海既說話：「Marcus~bb~ 再黎多一次丫~」
仆你個街…你仲黎?!
於是我為左避免重覆犯錯，我輕輕咁鏈左佢個鼻一下：「食飯啦。仲唔行。」
之後我就帶左佢去一個海邊既西餐廳。一間望海既餐廳。好似好撚浪漫咁。
當我去想同Waiter 要一個窗邊望海既位置時，Snowy 一拉就拉住我走左過去一個角落頭位。
Snowy：「我要坐哩張！」
我：「有窗口位喎，點解唔要？」
Snowy：「我就係唔想你望住個海。我要你望住我。嘻嘻…」
邊講佢已經邊坐低左，無奈到極點之下，我只有坐埋去果個位o係度屌牆。
同佢傾計既過程中，我發現Snowy既真實內心年齡大概係16-18歲左右。佢會因為一d 好白痴既野而笑；因為我既一d 遊歷經歷而緊張；因為一d Sad but true既野而唔開心。簡單d 黎講一句，就係情緒波幅好很大。或者講，係一個小朋友。
去到哩一個位，我估大家都有興趣知道一個問題。而我都有，所以我忍無可忍要發問。
我：「我估你屋企人應該唔知你咁樣去…尋找真愛ga la，但…你唔驚佢地知道咩？」
Snowy：「屋企人？咩黎ga？食得嫁？」
我：「…小姐，唔通你石頭爆出黎嫁？就算係鬼父加義母，都叫有丫下嘛？」
Snowy：「哈哈！鬼父！真係幾啱用黎形容果個男人。我…一個月淨係見到果個男人三次左右啦…媽媽？唔…你問邊一個？佢每一年半載就會帶一個新既女人返黎，我都唔知邊個先係我媽媽…」
我：「…你…d 家庭倫理似乎真係好複雜咁喎。」
Snowy：「唔好講我啦，講下你丫。你屋企點ga？」
我：「屋企？咩黎嫁？食得嫁？」
Snowy：「…哈哈哈哈，你好衰嫁。」
我：「以彼之道還施彼身是也！」
Snowy：「都唔知你講乜。咪咁小氣啦…男人！」
我：「OKoK，咁你理想上既家係點？」
我聽佢講大概半個鐘，例如屋企要擺d 咩d 咩之類。要點佈置點佈置…最後佢都係講唔出一個所以然來。
Snowy：「咁你呢？」
我：「呵呵，擺設設計果d 野我平日工作已經做到好悶。不過，對我黎講，邊度有一個我愛既人等緊我返去，邊度就係家。當然，如果有八百尺左右就最好啦。」
無錯！對於我地哩一代人黎講，可能畢生奮鬥的目標可以簡單地量化──八百尺、一千尺、二千尺！
可悲，這裡是香港，這裡充滿「奇跡」。
(一間Skip左一段不能說的秘密)
果一晚，最後我地上左佢屋企。
雖然佢一直強調間屋係租返黎既…
但係，睇個裝潢，絕對係自住物業先會咁樣裝修法。
幸運地未出過去租樓既你，你一定唔知有咩分別呢？
九十年代頭，大家買完屋既裝修，一般都以實用為主。但去到九十年代中開始，人人炒樓。個個都買間樓返黎，再租比人幫自己供。於是就出現以下三種情況：
- 自住裝修樓 – 顧名思義，就係業主為買黎自住，所以放左好多錢去裝修。所有裝修以實用為主。用料靚，不計成本。哩一類樓基本上唔會o係租務市場出現，就算會出現都大部份選客選到癲，又或者貴到仆街！
- 普裝/豪裝樓 – 就係一仲有良心既業主，買左間樓返黎收租。仲有d 人性地用返咁上下既料去裝修間樓。起碼都仲諗住要保值或者租貴d。哩一類裝修一般見倒用到既地方既用料都過得去，但見唔倒既地方就求其執一執就算。哩一種同下一種就基本上o係市場上平分秋色。
- 化妝樓 – 就好似整容同化妝之間既分別。化妝樓只係用一d 好平好基本既外表野去遮住左間樓既問題…住落就甩灰發霉乜撚都齊。
佢哩間屋就係第一種，而且見佢屋企既擺設，唔似一d 功利到不得了既港女。
實用心理學其中一課，就係話睇人唔好睇佢平時偽裝出黎既環境同狀態，而要睇佢o係最舒服同安全之下表現出黎既，先係真性情！
就好似屋企，如果一個人自己住或者自己間房，入面既擺設同混亂程度，可以好清楚睇倒一個人既性格。
而佢房中既擺設，三個字：有品味。再加四個字就係：亂中有序。
真正有品味既人，唔係好似某d 補習天皇咁，成屋都係LB，連牆紙都係LB。No!哩d 只係暴發戶。就算佢有幾多錢都好，都唔會識得真正享受生活。
真正有錢人既屋企，所有野都唔係講牌子既，因為幾乎全部都係訂造。唔會有大大個牌子。
簡約而統一，單純而貴氣。
佢屋入面既野又未話去到好貴既地步，但睇得出…佢絕對就係一個從細就有錢既人。
一個從細開始就有錢既人，絕對唔會喋喋不休咁同你介紹佢有d 咩咩咩品牌，有d 咩咩咩Designer Chair。因為對佢地黎講，哩d 野根本就係佢地生活既一部份。
你唔會出街同人講，我今日食左樓下間魚蛋粉，d 魚蛋又香又彈牙。噢sorry, 而家d 人連死老豆都放上臉書，又可能真係會…我道歉…
Snowy：「登登~ 哩度就係我屋企啦~~」