【全劇終】《我喺街執咗個失憶嘅女仔返屋企》: 一個人的遊樂園（下）

「走得咁快？」我沿住前面條路行。
 
一路行嗰陣我喺度諗：就算真係俾我地知道閃靈現象唔會出現咁又點？其實唔會有咩改變，小悠唔會因為咁而記返啲咩；對我更加唔會有影響。
 
不過可能我地都太悶，至會求其搵啲嘢打發吓時間，畢竟喺主題公園入面玩捉依因，我真係未試過。
 
行行吓忽然見到前面有得掟公仔，好似自從小學之後就冇再玩過，於是我唱咗堆散銀掟，最後贏咗隻龍貓公仔。
 
哈，小悠見到一定好開心。
 




之後我一條友去咗坐過山車、碰碰車、跳樓機，連旋轉木馬都玩埋，都撞唔到小悠。
 
然後我又去返睇熊貓，睇雀仔，睇鯊魚，乜柒都睇勻晒之後，我突然覺得好on9。
 
平時嗰啲孤獨等級表睇就睇得多，估唔到今日終於試到一條友嚟主題公園玩嘅滋味。
 
我望吓隻錶，原來已經就嚟6點。
 
呢個時候，我見到小食店嗰度有個好似小悠嘅女仔食緊腸仔。
 




哈，仲唔俾我搵到你？我準備嚇佢一跳。
 
「……」
 
好彩收得切聲，原來我認錯人。
 
算，都係去食個雪糕，再坐吓摩天輪。日落之後小悠應該會喺入口嗰邊等我。
 
「今日雪糕買一送一呀。」個店員講。
 




「吓…咁唔要喇，唔該。」得嗰一條友，原來想食杯雪糕都咁難…
 
摩天輪嗰邊冇人排隊，我戇戇鳩鳩坐咗上去，對面放咗頭先贏返嚟嗰隻龍貓，我而家一定好似戇豆先生。
 
睇住外面嘅風景愈嚟愈高，我突然想試吓如果而家合埋眼，再開眼嗰陣小悠會唔會出現喺我眼前。
 
我慢慢瞇埋眼，心入面數咗10聲——
 
眼前依然只係一隻龍貓公仔。
 
即係話我冇估錯，閃靈現象已經唔會再發生？
 
一直以嚟，我認為小悠同普通人嘅分別就只係在於閃靈現象，亦都係呢個原因，我先會帶佢返屋企，甚至帶埋佢返學校。
 
如果閃靈現象唔再發生，所有嘢就會無可否認地變得冇必要，我大可以送佢去醫院話發現咗個失憶嘅女仔，我就會回到冇小悠之前嘅日常。




 
只係，我稍微想像一吓就覺得好寂寞。
 
冇咗小悠喺隔離吱吱喳喳，我有啲唔慣。
 
呢一刻，我心入面竟然希望閃靈現象快啲發生。
 
我應該係癲咗，至會祈求一個直到今日為止都喺度極力避免嘅靈異現象再度出現，就好似將逐漸回復正軌嘅日常親手推開一樣。
 
「小心上落，拎齊嘢呀。」職員打開摩天輪度門，我拎返隻龍貓，決定去樂園入口等小悠。
 
行到一半嗰陣，或者頭先嘅祈願真係有效——小悠突然間由燈柱後面彈出嚟。
 
「…你下次行路可唔可以有聲？」我盡量扮作冷靜。
 




「…阿帆？點解你會喺度？」
 
「呢句應該我問你，你又閃靈呀？」
 
「我頭先買買吓雪糕，突然間就嚟咗呢度喇…」我而家先見到佢拎住兩杯雪糕，仲問我要唔要。
 
我食咗一啖，啲雪糕一早開始溶，變到好難食。
 
「日落未？」
 
小悠指一指遠方嘅天空，太陽正喺度落緊山。
 
「…咁即係點呀？」
 
「即係我都唔知！關於閃靈現象依然係一個謎！」佢一路食雪糕一路講。




 
我嘆一口氣：「…即係搞咁多嘢都係冇意義嘅。」
 
「唔係呀，今日好有意義。」
 
「喺學習動物生態方面，又真係幾有意義嘅…」
 
「今日係阿帆你第一次帶我出街玩。」
 
我冇諗過佢會咁樣答，所以窒咗窒，塊面突然有啲熱：「…平時我都有帶你出街啦。」
 
「平時嗰啲點同？今日係…我唔識講呀，總之就唔一樣啦。」
 
…佢應該係想表達，主題公園係個正式嘅「約會地點」（咁…不單指情侶之間嘅），我心入面感謝佢嘅詞窮，唔係應該會俾佢見到我塊面更加紅。






如果大家想鞭打我寫快啲，歡迎去ｐｅｎａｎａ讚爆佢！！！每５０讚（滿１００讚後每１００讚）會加更
https://www.penana.com/story/96007/%E6%88%91%E5%96%BA%E8%A1%97%E5%9F%B7%E5%92%97%E5%80%8B%E5%A4%B1%E6%86%B6%E5%98%85%E5%A5%B3%E4%BB%94%E8%BF%94%E5%B1%8B%E4%BC%81-%E6%A0%A1%E5%9C%92-%E6%84%9B%E6%83%85-%E9%9D%88%E7%95%B0/
ＬＩＮＫ都貼埋，唔係唔去呀？！