【全劇終】《我喺街執咗個失憶嘅女仔返屋企》: 聯校宿營篇：最後之戰（上）

我一路跑，腦裏一路回憶起種種：
 
「由今日開始，令我感興趣嘅對象又多咗一個——5E班插班生，高小悠。」
 
「你有冇諗過高小悠呢個人係點嚟？」
 
「陣間我會代表POWER，向高小悠發出加入學生會嘅邀請。」
 
「今晚可以同你傾計，真係好開心。」
 




「睇嚟你真係每一刻都想要同佢一齊。」
 
「我只係想提你，小悠可能唔係表面睇咁單純。」
 
由喺街遇到小悠嗰一刻開始，我嘅生活起咗翻天覆地嘅變化。
 
同佢相處嘅每一日，我都會有新發現一樣，遠遠顛覆我嘅想像。
 
一直充斥喺我生活嘅平凡日常，竟然會有逐漸崩壞嘅一日。
 




甚至開始變成一種習慣。
 
開學之後，羅凱撒不停向我暗示，佢有可能知道關於小悠嘅嘢。
 
雖然我唔知背後原因，但係我真係好想知道，點解小悠會勾起佢嘅興趣。
 
同埋，到底小悠係咩人、點解佢會閃靈。
 
我有種預感，見到羅凱撒之後就會離答案近一步——
 




關於呢個除咗名之外，我對佢一無所知嘅女仔。
 
「終於搵到你喇，羅凱撒。」
 
喺我眼前就係由下晝開始一直唔知匿埋喺邊嘅羅凱撒。
 
佢慢慢轉身：「估唔到你到而家都未俾人foul。」
 
呢度係附近山頭嘅最高點，企喺度可以睇晒今次比賽嘅活動範圍。
 
「你匿埋喺度做乜？唔落去搶分？」
 
「哼，身為POWER嘅王牌，我梗係要壓軸登場。」講完之後佢例牌用中指一下托眼鏡。
 
我嘆一口氣，決定入正題：「我帶咗樣你應該好想要嘅嘢俾你。」




 
「睇嚟，你都唔係我想像中咁廢。」
 
「你知道我講緊嗰樣係咩？」
 
佢一副懶係咩都知道嘅笑容：「快啲拎支旗出嚟，我代表我校全體學生多謝你對POWER作出嘅貢獻。」
 
今次到我冷笑，我帶支旗嚟果然冇錯：「俾你都得，不過有條件。」
 
佢諗咗一陣問：「你想要咩條件？」
 
「我要知道關於小悠嘅嘢。」
 
「明明同佢一齊住嗰個係你，你竟然走嚟問返我？」
 




「點解你對小悠咁有興趣？你係咪知道啲咩？仲有…」我猶疑咗一陣，都係講出口：
 
「你地尋晚半夜單獨出去做咩？」
 
羅凱撒一啲震驚都冇，好似一早知我會咁問咁：
 
「如果我拒絕你提出嘅條件？」
 
「屌，咁我咪唔俾支旗你囉，咁都要問。」
 
「哼，乜你認為我冇辦法喺你手上搶支旗過嚟？」
 
我學佢哼一聲：「咁你咪試吓囉？」
 
雖然一開始冇諗過要同佢隻揪，不過羅凱撒望落咁柔弱，我話唔定會揪贏。




 
就算揪唔贏，我就攞埋支旗爬上樹，佢得唔到佢想要嘅嘢自然會急，急起上嚟就會應承我頭先嘅條件。
 
當然我由頭到尾都冇諗過真係俾支旗佢，等佢講完我想知道嘅嘢之後，我就一Q將支旗掉落山，到時睇佢點執。
 
我一邊諗住我個完美計劃，一邊準備同羅凱撒做個了結。