【全劇終】《我喺街執咗個失憶嘅女仔返屋企》: 回程（上）

等上旅遊巴嗰陣，小悠一直同隔離校嘅女仔傾計，提都冇提頭先嘅意外。
 
望住佢一臉如常嘅表情，我甚至懷疑佢連頭先喺房發生咩事都唔係好知。
 
「哥，我地屋企見喇。」阿妹臨上車前同我講。
 
「…哦好呀，屋企見囉。」我目光依然緊隨小悠。
 
「你把聲做咩？係咪好攰呀？」
 




我回過神來：「…我把聲？可能係。」
 
「你直接返屋企抖吓啦，我去買埋外賣返嚟。」
 
同阿妹道別冇耐，我地嗰架完美體現咩叫浪費資源嘅特大旅遊巴都到咗。
 
上車之後，我是但搵咗個位坐低。
 
其他人陸續搵位坐，最後到小悠，佢坐咗喺我後面嗰排，經過嗰陣同我講：「我今次坐阿帆後面～」
 




一切如常，冇任何唔尋常嘅地方。
 
唔通，頭先係我錯覺…？我地其實冇掂到？
 
但我好快否定咗呢個諗法，就算我幾on9，都唔會on9到連有冇錫到都分唔到掛？
 
況且，持續嘅時間一啲都唔短，直到而家仍然殘留住嗰種感覺一樣…
 
我掉轉頭望住小悠，諗緊好唔好問佢。
 




佢眼bling bling咁問返我：「做咩呀？」
 
「…冇嘢。」而家太多人都係唔好問住，而且，我真係唔知應該點問。
 
之後，Miss派咗張反思工作紙俾我地，叫我地喺車上面完成佢，都係講吓學到啲咩嗰啲。
 
做咗幾題之後，我又忍唔住去轉身望吓小悠，佢咬住三支pocky，好認真咁寫緊手上嘅工作紙。
 
喺佢察覺到我視線之後，我即刻拎返轉身。
 
因為望住小悠嘅嘴唇，我又回憶起嗰種柔軟觸感…
 
諗住求其做埋張工作紙嗰陣，偏偏下一題好似玩嘢咁問今次旅程中獲得最寶貴嘅嘢。
 
我個腦淨係諗到一個答案，一個充滿士多啤梨味嘅答案。（我絕對冇諗過寫落去！）




 
突然隔離排有人講：「吞咁大啖口水，你個死偷窺狂一定係諗緊啲變態嘢。」
 
我望過去，見到駱以雪一個人坐喺三人位嘅中間。
 
「乜你又坐喺我隔離排？」
 
「對住你呢啲成日搵機會犯校規嘅人，唔好好睇住你點得？」
 
「咁我想問頭先個稱呼係咩嘢事…」
 
仲有，乜我吞口水吞得真係好明顯咩？
 
佢毫不忌諱咁解釋：「你話死偷窺狂呢個？你唔好唔記得晏晝你對我做過啲咩嚟。」
 




為咗降低對話嘅聲量，我走過去坐咗喺佢隔離，佢見到之後即刻彈咗入靠窗個位：「你想點呀？」
 
「我晏晝對你做過咩呀？你講嘢講好啲得唔得？一陣俾其他人聽到就誤會架喇…」
 
「你的而且確有偷窺我。」
 
「…我、我望咗一眼咁多咋喎！」講都未講完，佢一手扯我衫領：「肯認喇咩？」
 
「喂，放手呀…」
 
呢個時候一個急彎，駱以雪成個人挨咗落嚟，我feel到手臂俾啲軟綿綿又富彈性嘅嘢壓住咗。
 
「…對唔住！都叫你放手架啦！」我馬上道歉。
 
我以為佢會打我 ,點知佢只係講咗句:




 
「離我遠啲呀，變態佬。」然後用力放開我。
 
我嘆一啖氣，如果返去同張廷宇講佢每晚嘅洩慾對象（呢個term係張廷宇自己講嘅）係個一等一嘅暴力女，唔知佢會點反應。
 
之後見駱以雪喺度做工作紙，我八掛哄埋去睇吓佢寫乜，但當然係失敗。
 
「借嚟參考吓啫 ,最寶貴嘅東西嗰題你諗住寫咩？」
 
佢摺到張紙實一實：「關你咩事呀？死八公！」
 
「至多我俾你睇返嘞，嗱。」我攤開張工作紙。
 
估唔到佢真係睇，不過我梗係乘機開條件：「你睇完之後記得俾返我睇。」
 




佢諗咗一陣：「俾你睇3秒咁多！」
 
「3秒？唉，算嘞算嘞…殺你。」
 
喺駱以雪睇緊我手上張工作紙嗰陣，電話突然響起。