【全劇終】《我喺街執咗個失憶嘅女仔返屋企》: 整電腦（一）

第二日。
 
本來諗住帶埋小悠去同阿妹整電腦，但放學嗰陣佢話要去甜品學會體驗，仲話自己識返屋企咁話，所以我都由佢。
 
雖然係人都知佢目的係鬼體驗，一定係為咗試食甜品！
 
總之，執好書包之後我就一條友喺學校大門等阿妹。
 
佢學校早我10分鐘放學，行到嚟應該差唔多，之後我地就會一齊去附近間舖頭整電腦，整好之後買埋外賣返去，到時小悠應該差唔多返屋企架喇。
 




諗諗吓嗰陣，突然有人喺後面攬住我。
 
我嚇到即刻轉身。
 
「…千惠？」佢隻眼似乎好返，已經拆咗紗布。
 
「登登！係咪估唔到我會嚟呢？」佢手上拎住阿妹個電腦袋。
 
「得你嘅？我阿妹呢？」我四周圍望。
 




「晴晴臨時要補課，所以叫我幫佢拎部電腦俾你。」
 
「唔、唔該晒你。」我準備接過電腦袋，但佢握實唔放。
 
「又玩咩呀？」
 
「你冇諗住報答我架？話晒我特登行兩個街口拎俾你。」
 
「你想要咩報答呀？」突然有種不祥預感，慎防又俾佢偷襲，我退開半個身位。
 




佢笑一笑：「俾我同你一齊去。」
 
「拎部電腦去整呢啲咁簡單嘅嘢，我一個得啦。」
 
「乜係呀？仲諗住話我有嗰間舖頭嘅VIP卡，可以幫你地拎5折添…」佢有啲失落咁講。
 
「5折？！」
 
「嗯，半價。」
 
我即刻用心算計吓半價可以慳返幾多錢。
 
嗱，唔係我計埋啲婆乸數，自從屋企多咗小悠之後，伙食費都翻倍咁升，而家先月中，唔慳啲洗嘅話，月尾又要受阿爸啲長途電話轟炸…
 
30秒之後，我得出嘅答案係慳返嘅錢絕對值得俾佢跟埋去——




 
「我地行啦！」
 
點知一講完，佢就翹實我隻手一齊行。
 
我幾經辛苦半拉半拖咁同佢遠離學校範圍，之後同佢講：「喂！頭先嗰度學校嚟架！」
 
「咁又點呀？」
 
「俾人見到我大鑊喇，對你都唔係咁好啦…」其實俾邊個見到都冇問題，我最怕珀奈見到。
 
「咁而家都離開咗學校範圍，唔怕俾人見到啦？」
 
「雖然邏輯上係，但係…」
 




「唉呀你唔好咁煩啦。」
 
「喂喂！」
 
結果，我俾佢半翹半拖嘅方式拉到附近商場。
 
去到間舖，哥哥仔叫我地放低部機，兩粒鐘之後再返嚟拎，於是我同千惠就出返商場hea。
 
「你趕唔趕時間呀？我驚阻住你。」我客氣地問，話晒成兩粒鐘要過，唔通兩條友尷尷尬尬行商場咩…
 
「唔趕，你唔使驚阻住我。」
 
雖然都預咗佢咁答，不過我仍然暗裏嘆一口氣。
 
佢好似察覺到咁：「做咩呀？我好阻住你？」




 
「唔係…」我換個角度諗：無理由應承帶佢嚟，而家又叫佢返去先咁賤架，都係問吓佢想去邊hea算，「咁我地而家去邊呀？」
 
「你想去邊就去邊。」佢幾乎即刻答。
 
「你確定？」
 
佢好肯定咁點頭，我心入面開始偷笑，然後帶咗佢去一個地方。
 
一個話唔埋佢會悶到想走嘅地方。
 
「係呢度喇。」