【全劇終】《我喺街執咗個失憶嘅女仔返屋企》: 統測篇：意外畫面（下）

個校草唔知喺珀奈耳仔邊講咗啲咩，珀奈聽完笑得好開心。
 
「個男嘅同個女嘅都幾襯吖？」千惠喺我隔離講。
 
「襯？個咁嘅校草食女食到出晒名呀襯。」
 
「你又話唔識佢地？」
 
「使乜識呀？呢啲全校都知啦，總之珀奈一定係…我指個女仔一定係俾人呃。」我好肯定咁講。
 




「哦～個女仔叫珀奈。」
 
「…呢種校花級數嘅女仔全校都知佢個名，我知佢叫咩名唔代表我識佢。」我拿拿聲兜。
 
「原來係校花同校草添，咁人地一齊都好正常吖，你呷咩醋啫？」
 
「我幾時呷醋？都話我唔識佢地！」
 
佢無視我嘅解釋：「不過你拖住我隻手又呷第二個嘅醋，唔知算唔算欺騙緊我感情呢？」
 




呢句提醒咗我，原來頭先開始我地兩個一直拖住手。
 
我即刻放開：「明明就係你拖我隻手…」
 
「佢地走咗喇～我地行得未呀？」
 
我望望校門，珀奈唔知幾時已經走咗。
 
「…你要去邊呀？」
 




「我地上次行嗰度搞咗個咒術迴戰展，有1：1五条悟公仔！！」我好似見到佢眼裏有心心。
 
雖然聽落幾吸引，不過頭先見到嘅嘢令我冇乜心情，況且返到去仲要溫書。
 
所以我都係拒絕咗：「我都係唔去喇。」
 
「好快渣嘛，你陪我去打卡啦！反正你返到屋企都冇嘢做架啦。」講完佢又想拉我走。
 
我鬆開佢隻手：「邊個話我冇嘢做？我幾忙你知唔知？」
 
「你有幾忙呀大忙人？」
 
「…忙溫下個禮拜嘅統測囉。」
 
講完之後，佢反應居然同張廷宇一樣：「吓？我有冇聽錯？統測都要溫？」




 
「你地一個二個咩反應呀？統測唔可以溫架？」
 
「唔係話唔可以溫，係唔使咁早溫啫。」
 
「仲早？下個禮拜一就係喇，得返幾日時間咋！」
 
「幾日時間仲唔夠呀？不過睇唔出原來你咁勤力嘅～」
 
「要統測嗰個又唔係你，你梗係咁口響啦。」
 
「 sorry，我地學校都係下個禮拜統測，但我溫都未溫過。」
 
「你地又係下個禮拜統測？！」
 




「呃你做乜啫？俾你睇嘞。」之後佢開咗學校app，上面張通告真係寫佢地下個禮拜統測。
 
「有我同你一齊唔溫書，而家你冇藉口唔陪我啦？」
 
我諗咗一陣：「都係唔得，你唔溫係你嘅事，我就點都溫架嘞。」
 
佢鼓埋泡腮望住我：「你唔去就算，我自己去。」
 
之後，佢就自己走咗。
 
我望住佢背影兩秒，然後都轉身走人。