【全劇終】《我喺街執咗個失憶嘅女仔返屋企》: 統測篇：阿妹嘅朋友

拎住一袋二袋返屋企嗰陣，阿妹好似收到訊息。
 
「我幫你拎住先啦。」我接過阿妹手上嘅膠袋。
 
「唔該。」撳咗兩吓電話之後，佢就同我講：「哥，我朋友話唔知我地屋企喺邊…你可唔可以幫我去接佢呀？」
 
「吓？唔係應該你接好啲咩？」我打咗個突。
 
「咁…我要拎啲嘢返屋企吖嘛。」
 




「你俾我同小悠拎咪得囉。」
 
「嗯！我地拎到架！」小悠挽住兩袋嘢講。
 
「總之，你唔好問咁多啦…你幫我去接佢啦。」
 
有古怪。

一定有古怪。
 




話時話，我連阿妹今日會帶咩人上嚟都唔知。
 
「咪住先，我都未見過你個fd，點樣接佢呀？」
 
「佢就喺街口巴士站呀，你一去就會見到架喇。」
 
「…不如都係你去啦。」
 
「你唔好講咁多啦，叫你去轉巴士站渣嘛！有冇咁難呀？」
 




「阿帆你真係好懶，行兩步都唔肯。」連小悠都幫口。
 
「收聲！淨係識得食食食嘅人冇資格講！」
 
「咩淨係識得食呀？我…我有做運動架！」
 
呢個時候，阿妹一手搶走我啲膠袋，然後拉走小悠：「唔好再講喇，我地返去啦。」
 
「喂！唔好走住呀！」
 
目送阿妹同小悠之後，我死死氣行去巴士站。
 
點諗都有古怪。
 
阿妹朋友唔多，主要圈子應該係佢喺學校入面對得最多嘅人，即係同班同學，又或者…學生會。




 
等等！我應該一早就要估到阿妹朋友係邊個！
 
意識到自己中計已經太遲，呃我嚟呢度嘅幕後黑手企咗喺巴士站向我招手：「呢度呀！」
 
「真係你，點解我諗唔到架…」
 
「見到我係咪好驚喜呢？我特登叫晴晴唔好同你講架。」
 
橫睇掂睇，我都係得驚，冇乜點喜。
 
不過今日係我第一次見到千惠著便服，佢戴咗cap帽，下身係短裙。
 
「好遺憾，唔係。」我將視線由佢身上移開。
 




「真係心淡…早知係咁唔買。」
 
「買咩呀？」
 
佢塞咗啲嘢喺我手：「俾你，唔知你鍾意邊個，所以求其揀。」
 
我一望，係個伏黑惠鎖匙扣，應該係佢上次去咒術展打卡嘅戰利品。
 
「點解要係伏黑惠呢？」雖然我幾鍾意佢。
 
「因為我同佢個名都有個惠字吖嘛，咁你見到佢咪會諗起我囉。」
 
「…你會唔會夾硬咗啲。」
 
「你要同我收好佢呀。」




 
「如果我話唔要呢？」
 
我以為佢會用啲咩要脅我，點知佢居然擰咩面粒聲唔出。
 
「喂，搞咩呀？」我拍佢膊頭，佢又fing開我。
 
「你唔要就俾返嚟。」
 
唔知真嬲定假嬲，不過氣氛好似有啲不妙。
 
所以我將個匙扣收入袋：「梗係要啦，多謝你啦吓。」
 
「嘻，咁我地快啲上你屋企啦。」佢一秒恢復笑容，翹起我隻手就行。
 




「等陣！你知唔知我地今日係做咩架？」
 
「我點會唔知呢？就係知你呢排沉迷溫書，所以我先同晴晴提議搞呢個通頂讀書會嘅。」
 
我恍然大悟，成件事原來係佢搞出嚟嘅，而且最重要嘅係：「話時話，有冇過夜嘅必要呢…？」
 
「我認真諗過喇，上次你講得好啱，下個禮拜就係統測，我地唔可以再浪費光陰，所以絕對係有必要嘅。」
 
「又會忽然變得咁勤力，好難叫人相信你唔係有咩企圖…」我細細聲講。
 
「居然將人地努力溫書嘅決心扭曲成變態意圖，唔通你已經…」
 
「冇！仲有，我都冇講變態兩個字！」
 
佢無視我嘅中斷，將下半句擅自接落去：「…幻想緊我今晚會對你做啲咩？」
 
「冇呀！」