【全劇終】《我喺街執咗個失憶嘅女仔返屋企》: 沒有署名的信件

半夜，阿妹終於頂唔順眼瞓，瞓咗喺我大脾。
 
我一邊輕撫佢頭髮，一邊望向天空發呆。
 
唔知過咗幾耐，電話突然響起。
 
我拎出嚟，係阿媽。
 
「喂？」我放輕聲量。
 




「喂？帆帆？」
 
「…咩事呀？」
 
「嗱，我一陣要開會，長話短說嘞，你之前提到嘅羅乜乜，我幫你問咗你阿爸喇。」
 
「…係羅凱撒。」我細聲更正。
 
聯校宿營之後，我打咗俾阿媽，問佢關於羅凱撒嘅事。
 




「是但啦，總之就…你阿爸發現咗啲野，好難喺電話說明，我直接sd俾你睇吓。」
 
心開始砰砰跳。
 
原來搵阿爸阿媽係正確嘅選擇。
 
「…好。」
 
「咁我收線喇。」
 




「好。」
 
「等等先！我好似聽到晴晴嘅呼吸聲？都話佢最鍾意痴住你瞓架啦！」臨收線，阿媽殺出呢句。
 
「因為今晚有突發事件，所以先至…」我未講完，對面已經收咗線。

居然單靠呼吸聲就認到係阿妹…真係唔知由邊度開始吐槽好…
 
下一秒，係收到msg嘅聲。
 
我急不及待打開，係一張圖。
 
一封手寫嘅信。
 
我放大睇，先知道上款用咩咩斜斜嘅字寫住「羅凱撒」。




 
諗住再睇落去，發現呢封信唔係由我認識嘅語言寫成。
 
雖然同英文好似，但夾雜一啲我睇唔明嘅符號（定字母）
 
而且，最下面係冇署名。
 
我即刻覆阿媽，問佢信上面嘅係咩文。
 
得到嘅係「我都唔係好知，總之唔係英文」呢個答咗等於冇答嘅回覆。
 
撇除語言呢點，呢封野係邊個寫俾羅凱撒…？點解會喺阿爸阿媽度…？
 
就憑寫到打風咁樣嘅三個中文字，我覺得呢封野出自一個細路之手。
 




諗落諗落其實一個可能性最大。
 
如果封野喺阿爸度發現，又係細路寫嘅話…
 
就只能夠係我寫。
 
咁樣亦講得通點解羅凱撒話以前識得我。
 
但問題係，我對呢封野嘅印象係零。
 
而且，我睇都睇唔明信上面寫咩，點會出自我手？
 
又係掘頭路。
 
我熄咗電話mon，合埋眼。




 
將至今為止嘅所有野整理一次。
 
開學前一晚，我喺街執咗謎樣生物小悠返屋企。
 
羅凱撒對小悠展現出過度嘅興趣。
 
聯校宿營，羅凱撒同我講咗啲意味不明嘅說話。
 
啱啱收到，一封用唔知咩文寫俾羅凱撒嘅信。
 
如果知道封野嘅內容，會唔會解釋到發生乜事？
 
我張開眼，諗到呢一刻嘅救星——
 




偉大嘅google​ ​translate。