【全劇終】《我喺街執咗個失憶嘅女仔返屋企》: 學生會補選篇：排球戰（上）

返課室嗰陣，收到許正峰嘅訊息，內容係放學約我去體育館同駱以雪打排球。
 
我諗起之前佢的確有提過呢件事，不過估唔到佢猴禽到呢個地步，統測一完就即刻成事啫。
 
本來對排球冇興趣嘅我諗住一口拒絕，但諗起下年就冇得用體育館（因為聯校宿營輸咗俾阿妹學校...），加上好耐冇活動過身體，所以最後都係應承咗。（絕對唔係因為同許正峰一樣期待緊波濤洶湧嘅畫面先應承）
 
「小悠！你今日放學自己返屋企，我有野做！」
 
「我地不嬲都係各自返屋企架啦，況且今日唔係得你有野做，我都有野做。」佢一臉得戚。
 




「超，你有邊度去？咪又係去甜品學會又食又拎…」
 
「唔係喎，不過你串我我唔話俾你聽。」
 
「好叻呀？我夠唔話你聽…」
 
呢個時候嘅我當然唔知，呢場看似有益身心嘅課後活動會係史上最大嘅騙局。
 
放學後。
 




我照許正峰講嘅時間嚟到體育館。
 
排球場入面除咗許正峰之外，仲有兩個熟悉嘅身影。
 
身穿PE衫嘅駱以雪喺度做緊熱身運動。
 
而喺佢隔離嘅，係同樣著住PE衫嘅小悠。
 
「阿帆嚟喇！」小悠好快發現我。
 




許正峰同我揮手，而駱以雪依然專心喺熱身上，應該冇諗過理我。
 
「點解你會喺度？」我一嚟就問小悠。
 
「今朝以雪約我嚟架。」
 
駱以雪聽到之後抬頭：「唔好叫得咁親切，係許正峰叫我請埋你。」
 
我望向許正峰。
 
佢好似窒一窒：「…總之今日呢，純粹我地四個人嚟玩！」講完之後佢急不及待推我上場，仲喺我耳邊講：「之前咪同你講過，同阿雪打排球嘅機會千載難逢呀！」
 
「咁你叫埋小悠嚟做乜？」
 
「…咁、唔通得我地3條友咁零丁咩，屌你唔好問啦，我都係被迫架咋！」




 
有古怪。
 
上場之前，駱以雪拎咗兩份野出嚟隊俾我同小悠：「簽咗佢。」
 
「咩嚟？」我問。
 
「呢份係體育館嘅免責聲明，因為出年體育館嘅使用權唔喺我地學校度，所以而家做緊啲交接工作，而喺呢段期間，如果我地學校嘅學生喺體育館進行任何活動嘅時候受傷，由對面學校嚟負責就會好奇怪，所以先產生咗呢份免責聲明。」駱以雪背書咁背出嚟。
 
「哦！即係簽完之後，我地就算喺度死咗都唔關任何人事！」小悠用自己嘅文字理解完份野之後，好爽快咁簽咗。
 
「聰明，你理解能力真係好優秀。」我已經分唔清駱以雪呢句係曲定直。
 
我拎份野上手望，上面係密密麻麻嘅免責條款。
 




「…仲唔簽？」許正峰催我。
 
「我唔簽。」講完我放返低。
 
點知駱以雪反應遠超我預期：「你以為係邊個特登喺聯校宿營輸俾隔離學校，將成座體育館拱手讓俾人？如果唔係你而家使乜簽份咁嘅野？」
 
「嗰次…！」我駁唔到，因為的確係我放棄聯校宿營嘅優勝。
 
「你以為我地好得閒整份咁嘅野俾你地簽？份野係體育館叫我地進行任何活動之前都要簽，我同許正峰啱啱都簽咗，你以為有人想乘機陷害你咁款做乜？你係咪被害妄想？」駱以雪繼續鏟我。
 
「……」
 
連許正峰都幫口：「係、係呀！份野我同阿雪頭先都簽咗架喇！你乖啦！快啲簽啦！」
 
「唉簽呀簽呀。」我抵受唔住壓迫，確認眼前嘅（應該）確實係一份免責聲明之後，喺上面揮筆。




 
「好！咁我地正式睇…開波！」許正峰拍拍手，宣佈球賽開始。