【全劇終】《我喺街執咗個失憶嘅女仔返屋企》: 學生會補選篇：衝口而出

羅凱撒走近場邊。
 
許正峰同駱以雪企咗去佢身後。
 
「你地兩個，做得好好。」羅凱撒回頭同佢地講。
 
「咩事？你出現做咩？」我問。
 
「哼哼哼，」羅凱撒奸笑三聲，手裏面拎住我同小悠開波之前簽嗰份乜鬼免責聲明，「睇嚟你唔係好記得自己簽咗乜野。」
 




望住佢副奸樣，唔使問都知頭先簽嗰份根本唔係咩免責聲明：「你地俾咗啲咩我簽？」
 
羅凱撒手一揮，揭起免責聲明嘅上半部分——原來下面寫咗第二段字：
 
本人同意參與本年度學生會補選，定必竭盡所能，為校貢獻。
 
「恭喜兩位已經成為學生會候補人選，補選日將於不日舉行，請積極準備。」
 
小悠依然一臉唔知發生咩事。
 




雖然我都係。
 
「有冇人可以話我知，究竟發生咩事？」
 
許正峰走埋我度講：「嗱，所有野都係會長迫我架咋！佢話唔理我用咩方法都要你同小悠參選，所以…」
 
除咗粗口之外，呢一刻我個腦冇其他野。
 
「咁樣即係屈我參加啫？」
 




「就係知你地會推三推四，所以至會被迫用呢啲旁門左道。」駱以雪一副理所當然。
 
「下次你地直接同我講咪得囉，唔使呢份野我都會應承～」小悠依然氣定神閒。
 
「身為學生會都唔以身作則，使埋啲咁嘅橫手…」我講。
 
「咁其實…你真係唔選嘅話又迫唔到你嘅，份野都係象徵式拋吓你地架啫。」許正峰拎住嗰兩份野講。
 
羅凱撒推一下眼鏡：「咁，你確定你真係唔選？」
 
「唔！選！」
 
小悠聽到之後拉住我：「唔好啦，阿帆都一齊選啦…」
 
「唔選！」




 
小悠扁晒嘴，羅凱撒就嘆一口氣。
 
「哼，我地無謂強人所難。」羅凱撒行到小悠身旁，「嚟緊嘅日子，我地現屆學生會成員將會全力輔助你，同時會擔當指導者角色，透過一連串活動去觀察你係咪真係適合學生會。」
 
「雖然我quit咗學生會，但都會以前任副會長身分協助你參選，」許正峰講到呢度停一停，「即係話，嚟緊我地大把機會見面喇，小悠。」
 
「嗯！請多多指教！」
 
……！！？？？
 
頭先打波嗰陣，佢地十指緊扣嘅畫面又喺我腦入面擅自出現。
 
「等陣！」
 




意識到之前，已經衝口而出。
 
佢地四個一齊望住我。
 
「…我、我突然改變主意。」
 
佢地四個一臉疑惑。
 
「……我係話、我要參選！」
 
小悠一聽，興奮到合上雙手：「阿帆你都一齊玩？太好喇！」
 
「咁咪幾好，睇好你！」許正峰拍拍我膊頭。
 
「唔該唔好用個玩字去形容，參選學生會係件好認真嘅事嚟。」駱以雪睥行小悠。




 
最後係羅凱撒：「哼，我會喺終點嘅頂峰上面等你。」
 
見住佢地一人一句，我先察覺自己好似無意間惹咗啲麻煩事上身。