【全劇終】《我喺街執咗個失憶嘅女仔返屋企》: 學生會補選篇：鬥志燃起？

冇動力嘅話，就搵個理由俾自己。
 
尋日，阿妹咁同我講。
 
選學生會嘅理由。
 
雖然直到呢一刻，我都冇乜意願加入學生會，但話唔定係相反，正因為我冇動力，至會缺少入學生會嘅意願。
 
阿妹講得啱，咁大個人除咗上次統測，好似冇乜認真做過一件事。
 




以前覺得入學生會就等於進入公務地獄，但諗落呢樣唔係必然，至少我可以做一條學生會入面嘅廢柴！將啲野塞晒俾羅凱撒同駱以雪兩條友做！
 
諗起佢兩個俾我激到反枱個樣，忍唔住笑出嚟。
 
呢個時候，膊頭俾人拍咗一吓。
 
我轉頭：「…珀奈！？」
 
「おはよう。」
 




呢句我聽得明，係早晨咁解，於是我都用半鹹淡日文回應：「餓蝦唷。」
 
珀奈嘅笑容簡直為死氣沉沉嘅平日早上染上一層又一層鮮豔色彩…
 
「我聽caesar講架，今次學生會補選好似有你份？」
 
「係、係呀！」
 
「加油呀！我睇好你架！」
 




「嗯！為咗全校學生！我會俾心機！」雖然講完都覺得好假，但喺珀奈面前，梗係要扮吓熱血。
 
「嘻嘻、學生會嘅大家果然都係閃閃發光。」
 
我突然諗起尋日ig個post。
 
如果我真係當選嘅話，就會成為珀奈口中「閃閃發光」、「有點帥」嘅存在！！
 
咁樣一諗，我好似搵到阿妹所講嘅動力。
 
然後，乘住呢股氣勢…
 
「珀奈！！！」
 
「嗯？」




 
「…我有啲野想問吓你。」
 
「咩呀？」
 
我吸一大啖氣，向前彎腰九十度：「如果我今次成功當選嘅話！你…你…你聖誕節可唔可以同我出街？」
 
空氣靜默。
 
但我好清楚時間依然無情地流動，靜止嘅只有我嘅內心。
 
果然…太突然，嚇親人？
 
打定輸數嗰陣，前方傳來珀奈嘅輕快笑聲。
 




我慢慢抬頭，佢真係喺度笑，笑到咯咯聲。
 
「你…都係當我…」冇講過啦——
 
「いいよ。」
 
「…吓？」
 
珀奈呼一口氣：「我係話，『好』咁解呀！バーーカ。」
 
バカ我聽得明，即係傻仔。
 
咁即係，珀奈應承咗…？
 
「你…係話可以呀？」




 
「係呀！傻、仔！」
 
我知我而家一定笑到成個變態佬咁，但呢種係由心發出嘅笑容，遮都遮唔住。
 
「你唔好笑得咁開心住！你仲未選到！」
 
「為咗你…同我聖誕節有節目！我一定會選到俾你睇！」
 
珀奈聽完，又笑咗兩聲：「うん、待ってるよ。」
 
呢句聽唔明！不過唔緊要！遲吓我一定會親口問珀奈，以男朋友嘅身分。
 
為咗達到呢個目的，對唔住都要做一次。
 




至多我當選之後，叫小食部將炸豬扒丼納入常規餐牌。
 
但係，學生會副會長呢個位唔會屬於小悠。
 
而係屬於我！！！