此刻嘅我正瑟縮梳化前,兩側髮碎就快俾自己搲甩晒。
 
我做咗啲咩好事我做咗啲咩好事我做咗啲咩好事我做咗啲咩好事我做咗啲咩好事…
 
明明想同唐夕嵐打好關係,結果仲衰過之前!
 
先唔講學生會評分嗰筆,而家搞到咁,下次同佢見面一定仲老尷!
 
不如,淨低嗰兩次見面我都詐病請假算…
 




到底我一開始選乜Q嘢學生會…?
 
我以一吓仰天花板大喊總結心情:「啊!!!!!」
 
呢個時候,小悠哼住上次嗰隻團子大家族歌入屋。
 
「我喺門口都聽到你大嗌喇,你肚餓冇嘢食呀?」
 
「唔係!再者大嗌同肚餓有咩關係?你以為人人都好似你咁咩?」
 




小悠轉動手中鎖匙,一臉得戚:「等我仲諗住同你分享今日發生咗啲咩好事,而家唔講~」
 
「哈,我本身都唔想知,多謝晒。」
 
佢徹底無視我,兼推翻自己頭先講嘅野:「就係呢,我諗到我嘅競選政綱!」
 
俾佢一講,我忽然記起:「係喎!要寫競選政綱!」每個候選人都要寫,所以我都唔例外。
 
「除左小食部有得賣炸豬扒丼之外,我仲要同校長提議將鐘聲改做團子大家族嘅旋律!!」
 




「…你認真?」我對眼應該變咗做兩個等號。
 
「係!咁樣我地唔理上堂定落堂,定係小息!都可以聽到團子大家族~」佢一臉陶醉講。
 
我冷笑:「都話你好鍾意嗰個叫朋也嘅低form架啦,又唔認。」
 
「唔…部分正確!我鍾意嘅,係呢間學校。」
 
佢繼續講:「可以盡情做自己鍾意嘅事,識到唔同性格嘅人,我覺得呢個先係學校應該有嘅模樣。」
 
見到佢表情咁認真,我窒一窒:「…如果你同我掉轉,你對住唐夕嵐,我相信你唔會講得咁口響。」
 
「點解呀?乜夕嵐好曳咩?」
 
「係相反,乖到我唔知點同佢相處。」




 
乖到慣性掛上營業式笑容。
 
乖到爆seed鬧我之前都要快速掃視操場一周望吓有冇人先。
 
「咁每個人都有乖同唔乖嘅一面嘅~你覺得唔知點同佢相處,一定係你未搵到佢嘅突破口!」
 
我伸個懶腰:「而家得返兩次見面機會,都唔知點樣搵你所講嘅突破口…」
 
「唔緊要!聽日唔洗返學,你有兩日時間去諗呢個問題!」
 
小悠一講,我先醒起聽日教師發展日,放假一天。
 
都好,有一日時間去緩衝,聽日唔使見到唐夕嵐。
 
已有 0 人追稿