【全劇終】《我喺街執咗個失憶嘅女仔返屋企》: 學生會補選篇：十一月是你的謊言（上）

點解會喺呢個地方見到佢？
 
自從嗰晚讀書會之後，雖然我有sd訊息同佢道歉，但佢只係「嗯」咗一句就冇咗下文。
 
之後我地都未有機會見面。
 
估唔到，再見面竟然會喺呢個地方。
 
「千惠？」我叫咗佢。
 




佢望向我，表情有啲驚喜，然後又恢復做微笑。
 
「搞咩呀你？入廠呀？」我笑佢著住病人衫。
 
佢只係維持微笑表情，兩秒後答：「…嗯，冇諗過喺度俾你撞到。」
 
雖然相遇只有兩分鐘，但係我已經感覺到佢同平時有啲唔同。
 
平時嘅佢，應該更加有精神：講野再大聲啲，表情再得戚啲，同埋……對我再熱情啲至係。
 




今日嘅佢完全唔係呢種感覺。
 
「…你做咩事入院呀？」
 
入院咁大件事，阿妹知道嘅話冇理由會提都唔提，即係話佢好大機會冇同阿妹講過。
 
我突然有種不祥預感。
 
而佢嘅答案，進一步引證我嘅預感：
 




「你得唔得閒呀？陪我去個地方吖。」
 
我跟佢嚟到一個冇咩人嘅草地。
 
之前幾次放學撞到佢，佢都會翹住我隻手行，但今日冇，只係靜靜地行喺我前面。雖然咁算係好事，不過我硬係凝住佢有啲唔妥。
 
然後，佢回頭：「靚唔靚呀？呢個地方。」
 
我環顧四周，只係一塊普通到冇得再普通嘅草地。
 
「…OK啦。」
 
「我一唔開心，就會嚟呢度睇星星。」
 
「…呢度睇到星星咩？」就算係夜晚，應該都係漆黑一片。




 
「睇到架，你睇。」佢抬頭指向天空。
 
我跟佢一齊抬頭，眼前只有魚肚白嘅天空。
 
「…點睇都係得一片白色，仲有曬到落頭頂嘅太陽。」
 
佢望咗我一眼，然後講：「你合埋眼，俾啲想像力。」
 
我照佢講嘅做…一秒之後，我擘返大對眼：「喂！我唔係嚟呢度FF睇星星架，你可以答我你咩事入院未？」
 
「你陪完我之後，我就答你呢個問題。」佢微笑。
 
「…除咗睇星星，仲有咩做呀？」
 




佢好似諗到啲野：「吖！你有冇聽過一個傳說？」
 
「傳說？」
 
「嗯，只要得到太陽、月亮同埋星星嘅見證，兩個人就可以永遠喺埋一齊。」
 
「見證？見證乜野？」
 
「見證兩個人嘅愛，例如係一個吻，又或者…其他表達愛嘅方式。」
 
我擰頭：「從來冇聽過，你自己作架？」
 
「係我爺爺同我講架。」
 
「我唔信呢啲嘢，況且要講嘅話，求其兩條友趁有太陽嗰陣錫完就可以永遠一齊？會唔會兒戲啲？」




 
佢笑：「你個人真係一啲都唔浪漫，唔怪得係A0。」
 
「…又關事？！」
 
笑咗一陣之後，佢深呼吸一口，然後同我講：「到你喇，你有冇嘢同我分享？」
 
「…吓？」今日嘅佢果然奇奇怪怪，九唔搭八。