【全劇終】《我喺街執咗個失憶嘅女仔返屋企》: 學生會補選篇：無名的怒火

晚飯後我坐喺書枱前，開始埋手去做一件參選之後我必須做，但一直未做嘅嘢。
 
學生會競選政綱。
 
聽小悠講，佢好似一早已經寫緊，內容大概係將炸豬扒丼引入小食部同埋將鐘聲改做團子大家族旋律。
 
我嘅話，應該點寫…？
 
如果有歷屆學生會嘅政綱參考吓，我諗唔使咁煩。
 




「有！」我拎起電話，去搵我嘅救星——許正峰。
 
連我都估唔到咁順利，許正峰話佢之前將歷屆學生會嘅政綱擺晒喺雲端，所以一分鐘都唔使我就收到晒。
 
我決定用一晚時間去研究眼前嘅成堆文件。
 
哈，同芝芝風流快活緊（食緊甜品）嘅小悠一定唔知道我會趁佢唔喺度忽然間咁努力。
 
但我必須向佢道歉，因為我認真起上嚟，連我自己都會驚。
 




對住佢呢份炸豬扒政綱，或者我不費吹灰之力就會勝出今次學生會選舉。
 
到時，佢就係我手下敗將！
 
我一邊諗一邊偷笑，最後唔小心瞓著咗。
 
直到俾太陽照醒，我先知已經第二朝。
 
望吓地下床舖，小悠唔喺度。
 




…成晚冇返嚟？
 
我帶住疑惑行出房，點知小悠換好晒校服，準備出門口。
 
「早晨呀阿帆！乜你咁遲架？」
 
「…你咁早起身做乜，唔似你喎。」
 
「咩呀，咪同平時一樣！阿妹都出咗門口好耐喇！得你先咁遲！」
 
「咩話？？？」我望吓鐘，原來已經七點半，「你唔叫我起身？！」
 
「我有叫休比過嚟叫醒你架！不過佢有冇我就唔知喇。」
 
「你真係當休比係神獸咩…唔同你講，趕住換衫！」




 
「記得今日我地要同朋也佢地見面呀！」小悠提醒我，今日又要見到唐夕嵐。
 
我深深嘆一口氣。
 
「唔爭在話埋俾你知！我已經問咗會長今日我地會做啲咩！」
 
「…會長？你問咗羅凱撒？」
 
「嗯！」
 
呢一刻，我在意嘅唔係今日放學我地會做啲咩，而係小悠同羅凱撒私下居然有聯絡。
 
小悠講落去：「就係！候選人政綱辯論！」
 




我回過神：「…辯論？」
 
「嗯！會長話我地會分組辯論！」
 
聽到「會長話」，唔知點解有啲無名火起：「有乜鬼嘢好辯論？你睇你份咁嘅九唔搭八政綱，睇我放學用10分鐘KO你啦。」
 
小悠聽完，一副惱羞成怒樣：「阿帆你都唔明！你唔明炸豬扒丼有幾偉大！」
 
「哈哈，係咩。」屌，我喺度做乜，頭先無啦啦鬧佢做乜鳩呀？
 
「KO你嗰個會係我，你睇住嚟！」講完佢bang門而出，睇嚟係堅嬲。
 
不過，到咗放學嘅時候，我諗都諗唔到事情發展同我想像嘅完全唔同。