【全劇終】《我喺街執咗個失憶嘅女仔返屋企》: 學生會補選篇：逆襲

返到屋企，我摷勻學校ig secret嗰700幾個follwers，希望進一步引證自己嘅想法。
 
結果，俾我搵到一個疑似屬於唐夕嵐嘅ig。
 
一望佢嗰80幾個post（佢個ac係公開），我內心已經急不及待歡呼。
 
果然，唐夕嵐嘅突破口就係佢——
 
我回憶起今日放學小悠執到嗰抽鎖匙扣。
 




眼前呢80幾個ig post。
 
仲有，我喺樓梯撞到佢嗰次，唔小心整跌佢嘅一張張畫紙。
 
上面全部都係同一個角色。
 
 
和泉紗霧。
 
 




唐夕嵐嘅每一個ig post都喺度表達佢對和泉紗霧嘅愛，甚至尊稱佢做#老師。
 
可以勾起佢興趣嘅，原來唔係語言，而係和泉紗霧。
 
然後，我嘅視線忽然俾某個post嘅caption所吸引。
 
配圖係一張畫得好靚嘅和泉紗霧fan art，然後cpation係：
 
如果有人畫呢幅畫俾我，我咩都應承佢…可惜我自己永遠畫唔到呢個水平#埃羅芒阿老師#情色漫畫老師#和泉紗霧#和泉紗霧好きな人と繋がりたい
 




學妹計劃（封測版），如無意外兩日之後就會完結。
 
即係話，下次再見唐夕嵐，會係兩日之後。
 
兩日時間。
 
我內心忽然昇起一個大膽嘅想法。
 
兩日後。
 
我將準備送俾唐夕嵐嘅神秘禮物收埋喺身後，等佢唔為意嗰陣再拎出嚟。
 
「登登！神秘禮物——和泉紗霧手繪一張！！」
 
唐夕嵐一秒愕然，然後眼角湧現淚水：「…學長，你竟然真係畫咗幅和泉紗霧俾我，原來你咁想同我修補好關係…枉我之前對你咁冇禮貌，嗚嗚嗚…」




 
「唔緊要，知錯能改！以後你記住我係學長就得嘞！」
 
「嗚嗚嗚嗚，知道…」
 
「而家畫就畫咗俾你，係咪真係咩都應承先？」
 
「嗯！做牛做馬都肯！」唐夕嵐攬到張和泉紗霧實一實。
 
我趁機拎返嗰封上款寫住「羅凱撒」嘅謎之信件出嚟：「幫我譯咗佢，記住譯好啲。」
 
「知道，學長！」
 
連喺隔離食花生嘅學生會同小悠都拍爛手掌。
 




「真係一個賺人熱淚嘅畫面…我羅凱撒由今日開始認同你。」
 
「原來你係咁有親和力，我以後唔會亂咁用暴力對待你…」駱以雪抹一吓眼淚講。
 
「我決定將學生會副會長呢個位內定俾你！唔使選喇！」多謝許正峰。
 
「嗚嗚，阿帆你真係好叻，辯論又得畫畫又得，我呢個豬隊友企喺你隔離真係自愧不如…」使乜講…！
 
完美。
 
要將上面堆FF化為現實，我首先要趕得切喺下次同唐夕嵐見面之前，畫一張佢夢寐以求嘅和泉紗霧俾佢。
 
我打開書櫃，喺最底嗰格搵返封塵嘅畫簿同畫具出嚟。
 
然後坐喺書枱前，伸一個懶腰。




 
今次係相隔幾年之後，我再度執起畫筆。
 
為咗同唐夕嵐修補關係。
 
為咗有機會喺聖誕節同珀奈行街街。
 
為咗…嗰一封唔知由咩文寫成，寫俾羅凱撒嘅信。
 
今次作戰名為——
 
和泉紗霧的逆襲。