【全劇終】《我喺街執咗個失憶嘅女仔返屋企》: 休比篇：被拐去的寵物與不負責任的主人

返屋企嘅全程，我都諗緊陣間要點樣同小悠交代。
 
如果俾小悠知道有陌生人擄走咗休比，雖然未至於會殺死我，但應該會有排嘈。
 
我唯有寄望喺我諗到藉口解釋休比去咗邊度之前，佢唔好返屋企住。（拜託，唔好俾佢咁快排到限量版布甸）
 
不過個天應該好憎我，因為返到屋企之後我發現事實同我渴望嘅完全相反——
 
小悠已經返咗嚟。
 




「你唔係同芝芝排緊限量版布甸咩？！」
 
佢一臉不忿：「本來係呀！但仲爭一個就到我地嘅時候佢先話截龍！」
 
我嘴角勾起僵硬嘅弧線：「咁你唔去食第二間？」
 
「唔喇，芝芝突然間話牙痛…所以之後我自己一個去咗買零食俾休比！」然後佢拎咗幾袋牧草波波出嚟俾我睇。
 
我心頭一虛。
 




話說，呢個芝芝，牙痛又要食布甸…唔係佢晨早拉咗小悠出街，我就唔會自己一個人帶休比去野餐，休比就唔會無緣無故俾人擄走。
 
所以，成件事嘅罪魁禍手…
 
都係我啦。（頭先借啲意發洩吓啫）
 
「休比呢？」小悠對我攤大手板。
 
「休比佢……」我高速思考，尋找適當嘅藉口。
 




「嗯？」
 
「去咗五星級寵物酒店度住，三日之後返嚟。」
 
我冇估錯，小悠好大反應：「吓？點解呀？」
 
我鳩噏：「頭先街邊有人sell寵物酒店，即時入住有半價優惠，我見休比佢好似好想住吓咁，所以…」
 
講都未講完，小悠指住我：「你講大話！休比都唔痴陌生人嘅！點會肯入酒店住？」
 
係鬼！隻死仔一見到陌生大姐姐即刻狗衝過去！
 
——我內心吐槽，當然冇真係講出口。
 
我諗咗第二個藉口：「其實係咁嘅，我帶咗休比去做寵物美容，醫生話三日之後佢就會變得好靚咁返嚟。」




 
「休比本身咁靚仔！使乜做寵物美容呀！」小悠睇嚟依然唔信。
 
順帶一提，剛才我喺小悠嘅說話當中首次確認咗休比嘅性別係囝。（雖然喺呢個時刻，呢樣嘢真心唔重要）
 
拋咗幾個藉口都冇咩用，我反客為主：「你記唔記得我頭先叫你快啲嚟救休比，唔係佢就大鑊先？」
 
「所以呢？」
 
「…所以，」我開始口窒，「所以，休比…跟個陌生人走咗，係暫時！三日之後佢會返嚟！」
 
小悠一聽，臉容扭曲。
 
「…跟陌生人走咗？」佢重覆我講嘅嘢。
 




我見事態不妙，向前鞠躬九十度：「對唔住！」
 
之後，我由帶休比去公園野餐，直到遇見騙子嘅事同小悠講一次。
 
「佢有俾地址同電話我架！我而家即刻同你去拎返休比！」
 
佢望住騙子俾我嘅地址，粒聲唔出。
 
「休比見到你一定會肯返嚟，我地而家行啦！」我再講。
 
點知小悠突然衝咗出門口，我叫都叫唔切：「喂！」
 
我追上去：「係咪去接休比返嚟？」
 
佢搖頭，轉身同我講：「我信你。」




 
「？」
 
「我信你三日之後，會幫我帶休比返嚟。」佢一臉認真，講咗句莫名其妙嘅說話。
 
「咁你而家去邊？」
 
然後佢又變返平日嘅表情：「落街買嘢食！」
 
「…你唔擔心休比咩？明明可以即刻接佢返嚟。」
 
「嘻嘻，」佢笑，「其實呢，我排咗半日隊覺得好攰，唔想再出咁遠嘅街。」
 
…不負責任嘅主人！