【全劇終】《我喺街執咗個失憶嘅女仔返屋企》: 休比篇：運動會的新項目

第二朝。
 
一打開眼，就見到阿妹同休比趴喺飯枱瞓覺嘅模樣，小悠就攤咗喺梳化。
 
同休比玩成晚嘅代價，就係腰酸背痛，同埋——
 
因為尋晚落晒所有窗簾，所以唔睇鐘嘅話都唔知而家已經朝早。
 
最重要嘅係，今日係返學日。
 




「阿妹，起身呀！」我拍醒正在熟睡嘅阿妹。
 
我同小悠遲到其實唔緊要，至多都係俾學生會班人抽秤吓，不過身為模範生嘅阿妹，絕對唔可以俾呢種過失染污佢中學生涯嘅一頁。
 
「……」阿妹從睡夢中醒來，見到而家幾點之後驚叫一聲，就匆匆忙忙去做梳洗準備。
 
叫醒埋小悠之後，最後我地決定動用僅餘嘅生活費，破例坐的士返學。（一切都係為咗阿妹）
 
落車之後，我地分道揚鑣。
 




距離學校仲有一段路，眼見仲有一分鐘就遲到，我同小悠都加快飛奔嘅速度。
 
不過，因為尋晚睡眠姿勢不良導致腰酸背痛嘅關係，達陣前我明顯落後於小悠。
 
「阿帆你喺度做咩呀？？仲唔快啲跟上嚟？？」小悠講完就捉起我隻手，拉住我跑。
 
踏入校門嗰秒，鐘聲同時響起。
 
今日守門口嘅係羅凱撒。
 




佢一副嘴角含春（即係恥笑）樣望住我同小悠。
 
「呵，我地冇遲到，你係咪好失望呢？」我乘機挑釁。
 
「下次…就唔會咁好彩。」
 
我拿拿聲拖小悠上課室（唔係拖手個拖，係拖行個拖），因為喺剛才極無謂且簡短對話中，居然俾我見到佢同羅凱撒又偷偷交換一個眼神。
 
雖然一直冇親口確認，但由聯校宿營開始，我就知呢兩個人嘅關係比我想像中要親密，甚至去到可以喺半夜三更二人獨處嘅程度。
 
本來識新朋友絕對係一件好事，但都係嗰句，我信唔過羅凱撒。直到而家，我都唔可以否定佢對小悠懷住某啲目的。
 
放學前嘅班主任節，Miss一人派咗一張form落嚟，我就知道又有麻煩事搵上門。
 
「嚟緊嘅運動會，中五級嘅學生要每人報一個項目，記得今個禮拜之前要交報名表俾我，大家加油！！而家放學！！」




 
我頂。
 
但我隨即轉念一笑——差啲唔記得我已經安排好唐夕嵐呢個細作為我辦事，今次運動會我注定可以輕鬆度過。
 
我快速掃視報名表上寫嘅項目，50米、100米、400米…根據唐夕嵐之前講嘅，佢會準備一個新項目，俾我呢種行兩步都嫌多嘅廢柴參加…
 
搵到！
 
我喺報名表最底發現一個從來未見過嘅項目名，但望真之後我感覺到臉上嘅表情一秒凝固。
 
冇任何附加解說，就只係四個字。
 
上面寫住：神秘項目。