【全劇終】《我喺街執咗個失憶嘅女仔返屋企》: 休比篇：禁止耍白痴打賭（二）

我地將列出#禁忌行為嘅A3紙貼滿全屋每一個角落，包括廚房同埋廁所，防止有人偷偷犯禁。
 
搞掂好之後，阿妹宣佈：「紙上列明嘅嘢將會喺聽日朝早八點生效，當日夜晚十二點結束，呢段時間以外乙方，即係小悠，可以自由活動，而甲方即係阿哥，不得提出任何異議，明白嘛？」
 
「點解？！咁實際上咪得十六個鐘？」我抗議。
 
「考慮到雙方都需要休息，我覺得咁樣嘅安排會人性化啲。」阿妹解釋。
 
「聽到未？阿帆真係冇人性。」小悠附和。
 




「…算。」
 
之後，我地修生養息，以準備聽日嘅決戰。
 
原本諗住養足精神，等我可以喺小悠有咩風吹草動嘅時候就捉佢痛腳，但休比就好似睇穿我呢個想法一樣，全晚冇停過咁叫。
 
於是，我同小悠就將休比嘅叫聲當成bgm，各自攤喺自己張床，喺等待入睡期間一邊傾計。
 
「…今日你同羅凱撒練跳高練成點？」我望住天花板問。
 




「會長真係超犀利！教咗我好多跳高嘅心得！」
 
腦海忽然生成一幅幅粉紅濾鏡嘅畫面——
 
 
「唔係咁，等我身貼身咁指導一下你…」講完之後羅凱撒從後抱住小悠。
 
「跳高嘅秘訣就係…」羅凱撒喺小悠耳邊吹一口氣。
 
「小悠，你真係跳得好好…過嚟等會長獎勵吓你…」羅凱撤對小悠作出摸頭殺。




 
 
……
 
我究竟喺度諗咩…！！
 
強行撥走奇怪想法之後，我問：「咁，你聽日放學會繼續搵羅凱撒？」
 
「梗係啦！會長睇好我可以喺運動會拎金牌！」
 
……。
 
為咗防止羅凱撒有所企圖，我堅持有人睇住小悠會好啲。
 
但我首先需要一個藉口。




 
…咪住，我應該一早諗到！
 
「聽日放學，我要跟埋你去。」我對小悠講。
 
「阿帆你又唔識跳高，跟埋去做咩呀？」
 
我坐起身，拋出頭先諗到嘅藉口，同時都係事實：「你唔記得聽日你唔可以耍白痴？我唔跟埋去，你偷偷犯規點算？！」
 
「你又好似講得啱～好啦，為咗令你輸得心服口服，聽日嗰16個鐘你記得一眼都唔好離開我～」
 
「嘰嘰嘰嘰！」休比嘅叫聲就好似附和緊小悠一樣。
 
「話時話，你覺唔覺得休比返嚟之後好似成日喺度叫？」我指嘅係，喺赤城紫悅度返嚟之後。
 




「休比會唔會係發情期呢？」小悠維持躺著嘅狀態，將休比舉高。
 
「唔通，係時候幫休比搵返個女朋友？」
 
「嘰嘰嘰嘰！」
 
「你隻死仔，一聽到有女即刻狂叫…」
 
「如果阿帆真係幫休比搵到女朋友，休比一定會變返以前咁鐘意你！」
 
「…我到而家都唔知休比做咩無啦啦唔睬我，」咪住，而家間房黑媽媽，或者會成功——「小悠，不如我再試吓…？」
 
「隨便～」
 
我深呼吸一口：「…休比過嚟！」




 
……。
 
「哈哈，睇嚟阿帆要再努力啲先得，係咪呀休比～」
 
…同休比修補關係嘅第n次試驗——失敗。