【全劇終】《我喺街執咗個失憶嘅女仔返屋企》: 休比篇：禁止耍白痴打賭（四）

小息。
 
平日嘅小悠一定會狗衝埋嚟叫我一齊去小食部，今日嘅佢居然坐定定喺度抄筆記。
 
或者呢個奇景太過罕有，吸引咗一部分同學圍觀。
 
佢地你一言我一語：「小悠，你係咪唔舒服呀？」「做咩今日唔見你落小食部嘅？」「我呢度有啲餅乾呀，你要唔要呀？」
 
小悠望住啲餅，然後搖頭：「唔使喇，我只係有啲跟唔上進度，所以想整理吓啲筆記。」
 




其他同學一臉擔憂：「有唔舒服記得同我地講呀…」「係呀，見到你唔食嘢，我地真係好擔心你架。」
 
我笑出嚟，望住佢地就好似望住動物園入面嘅遊客同一隻剛好生病嘅猩猩一樣。
 
等到啲人散去後，我決定過去逗吓佢。
 
「喂，你係咪忍得好辛苦呀？有人請你食餅都唔要，其實規則冇列明你唔可以食餅，你大可以要咗佢。」
 
小悠搖頭，目光依然放喺筆記本上：「我真係唔肚餓。」
 




「……！」認識佢咁耐，呢次絕對係第一次聽到佢話唔肚餓。所以，我窒一窒，但好快重整架勢，「聽講！今日小食部啲繽紛樂好似買一送一！」
 
只要氹佢落去買繽紛樂…只要佢一食嘢…佢啲白痴氣場一定由內到外咁滲返出嚟。
 
點知佢都係搖搖頭，人生首次拒絕繽紛樂呢樣嘢：「今朝已經食夠喇，如果你想食，自己落去買吖。」 
 
「…豈有此理！」我低聲抱怨。
 
呢個時候，羅凱撒突然經過班房外，用眼神示意小悠出去。
 




「…阿帆唔該借借吖。」
 
我退開，隔住道牆偷聽班房外嘅對話內容：
 
「今日放學我要開會，所以陪唔到你練跳高。」羅凱撒講。
 
「唔緊要，我自己去一樣。」
 
「哼，加油。」
 
「你開會都係呀。」
 
之後，小悠入返班房。
 
「帆？做咩企喺牆邊？」佢問。




 
「…今日放學羅凱撒唔陪你練跳高咩？」
 
小悠搖頭：「佢要開會。」
 
「唔緊要！我搵埋張廷宇過嚟撐你場！順便多個人睇住你有冇乘機耍白痴！」只要把握而家嘅機會，激到佢當場𨂽地，呢場無聊嘅戰鬥就可以宣佈結束。
 
所以我煽多兩句：「哈，不過我都想睇吓你呢隻小學雞可以跳到幾高！唔知一米有冇呢，唔係，應該話連一米都…」
 
小悠突然行前兩步，同我四目相交。
 
「……」一陣bb油味飄散過來，打亂咗我思路。
 
我喺近距離之下，注視屬於小悠嘅一雙紫瞳。
 




雖然好隱約，但此時此刻佢嘅目光埋藏一種…
 
深不可見嘅空洞感。
 
兩秒後，佢將手伸過來：「阿帆你頭髮有啲污糟嘢～」
 
我回過神：「有、有咩？」
 
「我幫你掃走咗喇～」
 
「…唔該。」
 
佢微笑：「唔洗～咁我地放學見。」
 
「放、放學見。」




 
望住佢坐返埋位，我不斷回想頭先腦袋彷彿停擺嘅感覺係咩一回事。