【全劇終】《我喺街執咗個失憶嘅女仔返屋企》: 休比篇：運動會（一）

或者千惠所講有關我地似樣嘅言論係正確嘅，因為當我地同老師解釋我地係雙胞胎嘅時候，老師居然信到十足，好快將我地放行。
 
搵到自己班嘅所屬位置之後，我就帶千惠埋去坐低。一坐低，果然吸引咗班上嘅同學走埋嚟八掛：「哇阿飯，雖然一直知你有個讀名校嘅阿妹，但今次真係第一次見面呀，你好呀妹妹。」
 
而千惠亦都好客氣地回應：「大家好，我叫晴晴，係阿飯嘅阿妹。」
 
喺佢地打成一片嘅同時，我望吓周圍。觀眾席上充斥疑似阿爸阿媽嘅物體，有啲睇落就後生啲，應該係讀緊大學嘅阿哥家姐，睇嚟超過一半嘅同學真係帶咗自己嘅親人嚟。
 
「喂，你自己坐陣先，我去買嘢食。」同千惠講完，我就落咗小食部。
 




因為觀眾席唔見小悠嘅話，佢會去嘅地方就得呢個。
 
果然，俾我見到佢喺小食部前面食緊燒賣，膊頭企咗休比。
 
「估唔到學校真係放休比入嚟…話說你俾休比企喺你膊頭，唔怕嚇親其他人咩？」
 
「阿帆你放心啦，我頭先一早帶咗休比同其他同學打招呼！佢地知道休比係我親人嚟架喇。」
 
「哦哦，咁好啦。」
 




「唔同你講喇！我要快啲食完！爭取時間練習多一陣！」
 
「嗯，加油。」
 
話畢，許正峰亢奮嘅聲線又再充斥場地每一角落：「各位同學！大家已經嚟得七七八八啦喂！我宣佈本年度嘅高中運動會正式開始！而家有請校長為我地主持開幕儀式！請各同學儘快趕返看台！觀看呢場盛大嘅開幕典禮！！！」
 
「我重覆一次，請各位同學返回看台。」面對high爆嘅許正峰，駱以雪依然能保持冷靜。
 
「咁我地返去啦。」
 




沉悶嘅開幕典禮過後，第一個項目終於開始，宣佈召集嗰陣，千惠突然催促我：「高田帆，我地快啲去報到啦。」
 
「…點解要報到？」
 
「我唔記得同你講咩？頭先趁你去咗買嘢食，我幫我地報咗親子接力賽。」
 
「…親、親子接力賽？」
 
「冇錯，快啲行啦，一陣當我地冇到架喇～」
 
「喂喂等陣先！我跑步唔掂架！」
 
「有我喺度，你驚咩啫？就算你跑包尾，我都一定可以追返上去。」千惠一臉自信嘅表情。
 
「但係…」




 
呢個時候小悠經過，然後瞬間雀躍：「咦，千惠你都嚟咗？」
 
我將來龍去脈解釋一次，小悠點點頭就話：「阿帆你地有得參加就好啦，我同休比想參加都冇。我都係專心跳高算喇。」
 
「…你唔係以為學校會俾隻龍貓落場跑步吓嘩。」我低聲吐槽。
 
「聽到未呀？連小悠都覺得我地應該去參加，快啲行啦！」
 
「嗯，你地要加油！我同休比會幫你地打氣架！」
 
就係咁，我就俾千惠帶咗去報到地點。除咗我地之外，仲有幾組都喺度準備緊。
 
我望真啲，原來羅凱撒都係當中嘅一分子。